Thursday, March 27, 2008

التعصب

الغباء
عدم النضج
ضيق الأفق
كل دى كلمات بتوصف او ممكن تبقى مرادفات لكلمة التعصب
مابحبش اللى يتعصب للأهلى أو للزمالك أو لأى فرقة تانية
مابحبش اللى بيتعصب لمبدأ ما حتى لو كان صح
توضيح : انا ضد فكرة التعصب اصلا حتى لو لشئ كويس ومفيد
ماأحبش اقعد فى ركن لوحدى ,, عارفين كلمة متطرف ,, يعنى شخص ساب الناس وراح اخد له ركن
قعد فى طرف لوحده
احب دايما ابقا فى الوسط ,, ليا أرائى الخاصة بيا ,, لكن موش متعصب ليها ,, اقبل اناقشها وان ثبت لى خطأها,, فورا اعلن دا
طبعا أشهر أمثلة على التطرف أو التعصب ,, هى التعصب الكروى والدينى والسياسى
الشخص المتعصب بينزل على عقله غشاوة ,, ومابيشوفش غير اعتقاده و رأيه هو بس
وإللى بيهرب من النقاش منهم دا معناه ان اسباب تعصبه واهية وضعيفة وهو عارف كده
الأمثلة دى الواحد قابلها كتير أوى سواء على النيت أو فى ايام الدراسة
وطبعا أشهرهم المتعصبين كرويا و دينيا
كرويا ودوول ناس أغبيا جدااااااااا
دينيا و دوول أغبا من اللى فاتو
انا مااحبش ادخل منتدى او مدونة او موقع ما او مكان ما ايا كان والاقى شعارات او لافتات مثلا ضد شخص
او ضد رمز دينى
بأحس ان صاحب المكان بيحصر نفسه فى مكان ضيق أوى
كمان فى تعصب من نوع تانى
تعصب اجتماعى
تلاقى شخص يقولك انا مابحبش الفئة دى من الناس او مابحبش اتعامل معاهم
الفئة دى ممكن تكون طبقة معينة
او ستايل معين
ممكن دا راجع انه بقت عنده عقدة بسبب موقف قديم وهو عمم الوضع
تانى بقولها
الغباء
عدم النضج
ضيق الأفق

كل دى كلمات بتوصف او ممكن تبقى مرادفات لكلمة التعصب

9 comments:

Mafrousa said...
This comment has been removed by the author.
Mafrousa said...

الكلام جميل جداا.. و قوى جداااا
انا معاك التعصب.. اي ان كان.. بيخلى الواحد ما بيسمعش كويس.. و لا يشوف كويس...ومايفكرش خالص و يقول اى حاجة

مؤنس فرحان said...

مفروسة .. شكرا على ردك

التعصب لشئ ممكن مانحسش بيه خالص

انا عن نفسى كل شوية بأقفش نفسى فى حالة تعصب لشئ ما او ضد شئ ما .. واحاول أقوم نفسى بمعنى انى اكون عقلانى فى كلامى

مثلا أنا موش بطيق حاجة اسمها تدخين او مدخنين .. التدخين دا أذى وضرر من كل الجهات
وحسيت انى وصلت فى بعض الأوقات لدرجة التعصب ضدهم
وبدأت أهدى نفسى .. وافكر واقول ان اغلبية المدخنين بيبتدو دا وهما صغيرين ومفيش عندهم نضج كافى وعلى مايقدرو يفهمو المشكلة اللى هما فيها دا ان فهموها بيكون اصبحو مدمنين مايقدروش يبطلو إلا قلة منهم

وحاولت أماثل التدخين بأى عادة سيئة انا بعملها وموش معتقد انها غلط او موش مهم انى ابطلها

حاولت انى اوجد لهم اعذار حتى ولو مالهمش عذر .. بس بسبب انى حسيت انى بدأت اكون متعصب انا كمان من غير مااحس

شكرا على زيارتك الكريمة

*سمر* said...

مدونتك جميلة ما شاء الله ..
فعلا انا معاك جدا ..جميل انك يكون ليك رأى مش منعزل .وفى نفس الوقت متتعصبش ليه ..
سبحان الله انا و صحبتى كنا لسه بنناقش الموضوع ده :)

بس انا شايفة ان فى فرق بين التعصب لرأى ..والسكوت على الغلط لمجرد انى ميتقاش على نتعصب ..يعنى انا و صحبتى دى كنا بنتكلم على ستار اكاديمى ..هى شايفة ان هم صح ..وشايفة ان اختلافى معاهم ده تعصب ...فاهمنى ؟؟

انا رديت على كل تعليقاتك عندى ..وزيارتك اسعدتنى بشكل فظيع ..اتمنى تتكرر ..و حطيت مدونتك عندى فى المفضلات

http://wa7di-ofakker-137.blogspot.com/

مؤنس فرحان said...

أهلا يا سمر
ممممم على بالى بوست دلوقتى حكتبه كمان شوية
المهم
نورتى المدونة
.....

شوفى يا ستى .. بالنسبة لستار أكاديمى .. الفكرة العامة .. فكرة اختيار مواهب ورعايتها وتعليمها والاهتمام بيها عشان تقدم بعد كده فن جميل .. دى فكرة ممتازة

لكن طريقة عمل وتنفيذ الفكرة بالشكل اللى احنا شوفناه دا .. موش تمام خالص
العيال طول النهار عمالين يحضنو ويبوسو فى بعض .. والبنات طالعين بلبس النوم معظم الوقت

كمان غير كده من ضمن عيوب البرنامج .. فكرة تصويت الجمهور .. لان الناس بتختار وتصوت بعاطفتها وغالبا الموضوع بيقلب تعصب قبلى .. الخليجيين يصوتو للخليجيين.. اللبنانيين لللبنانيين.. المصريين للمصريين وهكذا

وبيبعدو عن المستوى الفنى للطلبة ايا كان
لكن طبعا البرنامج فى الاساس مشروع تجارى والناس اللى عاملينه يهمهم يكسبو ودا بيجيلهم بالتصويت والرسايل والاعلانات الخ

وحاتلاحظى ان من بعد خمس سنين دلوقتى أصبح مقياس التصويت مختلف جدا عن المفروض
اصبح كل عنصر من الطلاب عايز يجذب النظر له .. لو شاب تلاقيه عامل اراجوز او مقالب فى اصحابه او قصة حب مع بنت من المجموعة
ولو بنت تلاقيها بتلبس لبس من غير هدوم ولا بتترقص طول الوقت

الفكرة خرجت من منافسة اصوات وقدرات تمثيلية .. لرشاوى بتتقدم لجمهور المتفرجين عشان يصوتولهم

انا رغيت كتير حاسس انى بكتب بوست موش رد
............

الفكرة اننا طالما بنناقش الموضوع بعقلانية ونقول اللى لينا واللى علينا خلاص يبقى مفيش تعصب .. التعصب انى اعاند حتى ونا غلطان

شكرا يا سمر جدا على ردك
:)

المـــفـــــــقــــــــوعـــــة مــرارتـهــا said...

يارب ارحمنا من التعصب لأي فكرة اذا كانت صح او غلط الاعتدال كويس

مؤنس فرحان said...

أهلا يا مفقوعة
التعصب يعنى جمود فى التفكير .. وعدم النظر للأمام لقابلية التطور

شكرا على زيارتك وتورينا دايما

سمراء said...

ادعوك لرؤية فيلم انا مش معاهم
كان بيتكلم في الشعرة اللي بين التعصب والتدين والتطرف
رغم ان القضية دينية الا انه يجوز ان تنسحب على اي شئ
فهناك شعرة بين الاعتزاز برايي والتعصب له والتطرف في الا عتزاز به
فبالضرورة الراي يحتمل الصواب او الخطأ اذا نظرنا من وجهات النظر المختلفة
اوافقك تماما في هذه الرؤية

تحياتي
سمراء

مؤنس فرحان said...

سمراء

أحيانا غباء الطرف الآخر يحول اعتزازنا برأينا لحالة تعصب ضده
...........
أنا فعلا لسه ماشوفتش الفيلم دا ححاول اجيبه ان شاءالله