صدفة
شعور جميل أوى .. شعور الصدفة
لما تقابل واحد صاحبك صدفة
لما تلاقى حاجة كنت بتدور عليها بالصدفة
لما تكون بتقلب فى القنوات وتلاقى فيلم كان نفسك تشوفه
لما توصل لحل مشكلة ما بالصدفة وانت بتفكر فى شئ تانى بعيد خالص عنها
الاسبوعين اللى فاتو دوول قابلت 3 من اصحابى صدفة
كنت واقف منتظر اختى تخرج من الكورس بتاعها ولقيت اتنين جايين من بعيد كده وواحد منهم بأشبه على عينيه
عينيه كنت فاكرهم اوى مع انه مربى شنبه ودقنه بس عرفته من عينيه .. طلع أحمد مختار كان زميلى فى هندسة وماشوفتوش من أكتر من 6 سنين تقريبا
مرة تانية كنت نازل فى الأسانسير فى عمارتنا ولقيت اللى بيشدنى من ايدي .. طلع محمد عبدالله زميلى بردو فى هندسة و اخو احمد عبدالله دفعتى .. وايام العاشر وذكرياتها اللى عمرها ماحاتتنسى
يوم التلات اللى فات كنت فى مكتبة الشروق فرع الكوربة .. كنت بأحضر مناقشة كتاب أما هذه فرقصتى أنا لغادة محمد محمود وبردو لقيت اللى بيسلم عليا .. طلع باشمهندس حسام اللى عرفته عن طريق مصراوى وتاريخ مصراوى معايا ماينتهيش وبردو كنت ماشوفتوش من اكتر من 4 سنين تقريبا
ان شاءالله الصدف كلها تبقى صدف سعيدة
Sunday, March 16, 2008
صدفة
Subscribe to:
Post Comments (Atom)
5 comments:
أنا كمان بنبسط قوي لمّا أفتح التليفزيون و ألاقي فيلم بحبه..و بفرح قوي برضو لمّا بلاقي أغنية بحبها على الراديو..حتّى لو عندي ع الكمبيوتر بس بيبقى ليها طعم تاني لمّا تسمعها في الراديو بالصدفة.
المهم بقى يا سيدي..كل سنة و أنت طيب و ربنا يحققلك كل أحلامك و تعيش في سعادة يا رب.
وانت طيب وبالف صحة وسلامة يارب
الله يكرمك يا عمرو ويسعدك دايما
إيييييييييه أيام وبنقضيها
الصدفة بتفكرنى ان فى قدر وان فى غيب و ان فى سيناريو ممكن يتغير فى اى لحظة .. وان فى أمل فى الحياة انها تتغير من الأسوأ للأفضل فى اى وقت
وان مفيش أمان للدنيا ابدا
ازيك يا مؤنس
بيقولوا رب صدفة خير من الف ميعاد
وفعلا الكلام ده صحيح الواحد يبفرح
لما بيلاقى قريب له صدفه دى حصلت
معايا انى شفت والدى صدفه كنت ساعتها خارجه ولقيته بالصدفه من بعيد لكن هو ماخدش باله منى وفضلت انده لحد ما صوتى اتنبح . بس بجد كانت احلى صدفه لانه وصلنى ورحمنى من المشى :)
دودو ,, انا الحمد لله بخير .. ايه النور دا
طبعا كل شئ حوالينا هو قدر ومكتوب علينا باللحظة والثانية ومكتوب لنا نشوف فلان فى اللحظة دى ونعرف كذا فى الوقت دا وهكذا
ولأننا طبعا مانعرفش الغيب ودا رحمة لينا .. فبنقول صدفة .. ولما بتكون صدفة سعيدة بتأثر فينا أوى و بتبعث فينا لحظة أمل جميلة
مسير الحي يتلاقي
علشان كدة بنبزل جهد نسيب زكري طيبة
في نفوس بعض
دة اللي بيخلي الصدفة واللقا من تاني حاجة حلوة
تحياتي
سمراء
Post a Comment