Sunday, March 23, 2008

دردشة و منتدى و مدونة


دردشة ومنتدى ومدونة

التطور الطبيعي للحاجة الساقعة.. دا أحسن وصف
على الشات كان الواحد بيعرف أو بيستنبط شخصية اللي قدامه من حاجات كتير.. الاسم اللي داخل بيه.. اللوجو اللي مستعمله كصورة له.. تعليقاته وأسلوبه في الكلام والرد والهزار و آراؤه.. دا طبعا كله بيظهر على مدى طويل جداااا لأنه كل فين وفين لما يتفتح موضوع ما أو تلاقى رووم ما بيتكلم عن شئ مشترك
بعد كده الواحد لما عرف المنتديات وعاش معاها ذكريات أكثر من رائعة
منتدى ابن مصر النسخة الأولى منه
منتدى المصرى
وغير دوول الواحد شارك في منتديات كتير لكن مش بشكل كبير يمكن أخرهم
منتدى نورماندى

على المنتديات أسهل كتير انك تعرف إنسان.. من موضوع لموضوع بتعرف أسلوبه وفكره و رأيه

بالنسبة للمدونة فهي كأنك جمعت مشاركات شخص بعينه من منتدى ما وحطيتهم على موقع لوحده.. مدونتي هي أنا بكل بساطة.. بس ناقصة حتة.. (مع الاعتذار للشاعر على سلامة).. الحتة اللي ناقصة هي اللي بعد ما اكتبها ارجع امسحها تانى واكتبها من جديد بشكل تانى أو بأسلوب تانى
........................
الاسم المستعار
Nick Name

أهميته انه بيدل عليك على طريقة الانطباعات الأولى بتدوم
وبيختلف نوع الاسم من اسم تدليل أو رأى شخصي الواحد شايفه في نفسه
أو اسم شئ ما الواحد معجب بيه أوى.. الخ الخ (الخ الخ.. كلمة يحاول بها المتحدث ان يظهر انه يعلم أكثر مما يقول)

بالنسبالى كان فكرة المرادف عاجبانى.. سمير سعيد.. مؤنس فرحان.. دا طبعا فيه جانب من الحظ

8 comments:

عاشــــــ النقاب ـقــــة"نونو" said...

السلام عليكم اخي
اول زيارة ومناااااابعةباذن الله
تحليلك واضح في محله
خصوصا النيك نيم دي
وربنا يجعلك على طول مؤنس فرحان
تحياتي ليك ولمدونتك ام دم شربات
لاني تصفحتها وضحكت من قلبي
الله يكرمك ارفع الوردبيرفيكشن من التعليق

مؤنس فرحان said...

ميس دوت أهلا بيكي .. ولا يهمك الجايات أكتر من الرايحات .. ونشرك للمدونة فى ميزان حسناتك ان شاءالله وانا حكون اول زواركم ان شاءالله
تنورينا دايما

مؤنس فرحان said...

وعليكم السلام ورحمة الله وبركاته
اهلا نونو وشكرا على كلماتك الجميلة وخلاص يا ستى الوورد بيرفيكشن اتشال
تنورينا دايما ان شاءالله وشكرا على زيارتك و ربنا يكرمك ويسعدك يارب

Unknown said...

المرة دي انا جيت عشان اعلق
ينفع؟؟؟؟

كلامك حلو اوي
و علس فكرة فيه فرق بين المنتدي و بين المدونه انك ف المدونه محدش يقدر يشيل موضوعك و لا يغير فيه و لا يعملك بااااااااااان

ياللا زقطط و هيص تعليق بحق و حقيقي

ميس دوت
نوجا

مؤنس فرحان said...

ينفع طبعا يا أهلا وسهلا

إحم هو حضرتك كان بيتعمل لك بان فى المنتديات ويحذفو مواضيعك
أهلا وسهلا أنعم و أكرم أنعم و أكرم

:)

فعلا كلامك صح .. مدونتك هى انتى بجد .. من غير تعديلات أو رتوش أو شروط للكتابة .. زى بعض المواقع سواء شات او منتديات .. ممنوع الكلام فى السياسة
ممنوع الكلام فى الأديان
إلخ إلخ

شكرا يا ميس دوت على زيارتك
أستأذنكم ثوانى اروح اجيب بمب وصواريخ أزقطط وأهيص بيهم

kaydahom said...

مقدرش اقول غير انك انسان مريض علمانى مهما حاولت انك تثبت لنفسك وللحواليك العكس

kaydahom said...

دى اول مشاركة منى وقريت المدونة كلها وصدقنى اتشديت ليك جداااا بسبب تخلفك الملحوظ وأبلغ دليل على كدة انك خريج العاشر
وللكلام بقية مدام للمتخلفين فى منهم بقية من امثالك وياريت اى تعليق منك يكون فى حدود الادب واللياقة

مؤنس فرحان said...

Kaydahom

شكرا على زيارتك للمدونة .. و آسف ان وقتك ضاع فى قراءة المدونة وبعدين طلعت لواحد متخلف

ياريت تبقى تزورى المدونة كل فترة كل كام شهر كده احتمال أتغير .. احنا شخصياتنا موش ثابتة وبتتغير بإستمرار ممكن للأفضل وممكن للأسوأ

ان شاءالله يكون للأفضل

بس ياريت ردك يبقى واضح يعنى قولى ايه بالظبط اللى ماعجبكيش ايه اللى شايفاه بيدل على التخلف
كمان قلتى علمانى .. بردو ماحددتيش على اى اساس او انهى بوست تحديدا اللى وصل لك الرأى دا

شكرا مرة تانية على
أسلوبك المهذب