Wednesday, March 19, 2008

هععععع

إحم
هععععععع
مكالمة تليفونية : أنا : لو سمحت يا طانط احمد موجود
طانط : ايوا اقول له مين ؟
أنا : سمير
سكوت لمدة ثوانى
طانط : حاضر
احمد : بيقهقه ويقوللى امى حسبتك واحدة متصلة
الموقف دا حصل من حوالى سبع سنين
من قريب أوى بقى
تليفون بيرن
أنا : الو
هى : لو سمحت اختك موجودة
انا : ايوا ثوانى
بعد المكالمة اختى تقوللى صاحبتى كانت بتحسبك اخويا الصغير
.......................................
الموقف دا طبعا بيتكرر بإستمرار وكتير بيكلمونى على انى طفل صغير او واحد بالكتير فى اعدادية
من يومين جيبت برنامج عالتليفون يسجل الصوت وقعدت اتكلم مع اصحابى واسجل واسمع واحلل صوتى عشان اشوف انطباعات الناس عنى لما تسمع صوتى
ولد عمره اربعتاشر سنة بالكتير
وكمان كلامه سريع اوى وتحس انه متلهوج ومستعجل
دا كان تحليلى لصوتى للأسف
دا معناه ان دا الشعور اللى بيوصل لأى شخص يسمع صوتى
قررت انى لما اتكلم فى التليفون اخد نفس عميق افكر واتكلم ببطء وهدوء عشان الصوت يبان فيه رزانة ونضج وقبل اى مكالمة لازم ازعق بعلو صوتى زى الغول واقول
هعععععععععععع

6 comments:

*سمر* said...

ايه ده يا مؤنس ..انت طلعت سمير :]]

انا على فكرة عندى نفس مشكلتك دى

مؤنس فرحان said...

والله يا سمر دا موضوع صعب خالص

وبالنسبة للبنات عادى .. موش مشكلة كبيرة .. لكن بالنسبالى حسيت قريب انه مشكلة .. الأول ماكانش فى بالى.. وكان لما حد من اصحابى بيقوللى كنت باخد الموضوع بهزار .. لكن لما الواحد ابتدا يحتك بناس بقى غير الاصحاب .. شغل معاملات .. الخ
بدأ يتكسف من الموضوع دا
اقربها لسه من يومين واحدة كلمتنى 10 دقايق كاملة على انى مدام سمير.. مراتى يعنى

مندوبة دار نشر واتصلت تحدد معايا موعد .. اول مارديت قالتلى حضرتك مدام سمير .. انا بصراحة فرحت قلت بقالى مدام

المهم اتكلمت معاها طول المكالمة على انى مدام سمير

فكل مرة يكون الانطباع لإما واحدة لإما واحد عنده 14 سنة بالكتير
............

انا اسمى سمير سعيد محمود
اخدت سمير سعيد وجيبت المرادف بتاعها
مؤنس فرحان

:)

*سمر* said...

فكرة حلوة اوى انك ترجمت اسمك .. :)

بس ايه حكاية مندوبة دار النشر دى ..انت هتنزل كتاب ولا ايه :)

وبعدين يا سيدى لا مشكلة ولا حاجه ..هى المشكلة الحقيقية فى تعليقات الناس ..وكمان المشكلة فى ان فى مصر هنا او المجتمعات العربية تقييم الانسان بيكون بناءا على معايير شكلية فى المقام الاول..وده اكبر غلط ..انا اتكلمت عن الموضوع ده قبل كده فى عنوان (غيرة البنات ) فى المدونة بتاعتى

اكرر اعجابى بالمدونة...واتمنى مزيد من التواصل :)

مؤنس فرحان said...

لا والله ابدا يا سمر .. انتى عارفة موضوع مندوبين المبيعات .. دى حاجة زى كده ... بيتصلو بيكى ويبدأو يعرضو خدماتهم والكتب اللى عندهم والموسوعات وانهم ممكن يوصلوهم لغاية البيت مجانا.. و هكذا
..............

عارفة انتى كلمة .. الانطباعات الأولى تدوم
شكلك .. صوتك .. طريقة لبسك .. حركتك .. اسلوب كلامك ..حتى رمشة عينيكى .. كل البيانات دى بتدخل على الكومبيوتر (عقلنا وذكرياتنا وخبراتنا)
ويبدأ التحليل والمقارنة بينه وبين اشباه ليه.. وناس الواحد عرفهم قبل كده .. وتبدأ توضع استنتاجات وتخمينات مبنية على المظاهر الأولية دى

والتعامل المباشر هو اللى يثبت الاستنتاجات دى او يلغيها او يصححها

ٍSOU said...

كان عندى نفس مشكلة السرعة فى الكلام لدرجة انى كنت ساعات بتعمد انى اسرع عشان اللى قدامى مايفهمش حاجة و يتريئ على و نقلب هزار لما اكون مش عايزة اشرح حاجة او اقول على اللى حصل..بمثابة كدة ماديش عقاد نافع
بس مع الوقتلقيت انى لازم كلامى بيقى بطئ شوية عشان اللى عايزاهم يفهموا يفهموا لانى ماكنتش متحكمة فى حكاية السرعة..و الحمدلله مع الوقت حاولتاهدىفى كلامى و خاصة بماانى عصبية جدا و ماليش طققان على الاجابة على الاسئلة الكتيرة او انى اقول حاجة و اعيدها مرتين تلاتة..فبقت مش بتكلم كتير و لما ارد ارد بهدوء رد يقول اللى قدامى اوعى تسال تانى احمد ربنا انى جاوبت اولانى

مؤنس فرحان said...

نورتي يا سوو

المشكلة يا سو انى جيبت برنامج كده صغنون عالموبايل اللى هو بيسجل المكالمات وبعدين سمعت مكالماتى مع الناس سواء اصحابى او ناس اصحاب بابا تبع الشغل
لقيت اسلوبى موش حلو خالص مالص

يعنى انا لو مكان الراجل افهم انى قليل الذوق مثلا و اهوج ومستعجل

يعنى موش كفاية انه صوت واحد فى اعدادى لأ
وبيتكلم بسرعة كمان

انا بحاول فى كل مرة انى افتكر انظم نفسى واتكلم ببطء خالص وابقى مركز كده