Monday, March 10, 2008

فرقة أيامنا الحلوة


يوم الجمعة اللى فاتت 7 مارس ,, روحت انا واختى ساقية الصاوى ,, كانت دى أول مرة نروح فيها هناك
يومها كنا رايحين نحضر حفلة لفريق أيامنا الحلوة
أصل الموضوع ان اختى مهووسة بـ سلمى مقدمة برنامج شبابيك على دريم واللى هى فى نفس الوقت عضوة من أعضاء فريق أيامنا الحلوة
بصراحة الحفلة كانت تحفة ,, الفرقة كلها كانت روعة جداا
انا كنت ماسك فى ايدي قايمة العرض اللى مكتوب فيها مين عليه الدور يغنى وحيغنى ايه وماسك قلم وعمال اكتب ملاحظاتى على كل واحد
ماشاءالله كلهم تحفةةةةةة
الجميل فى الفرقة انها قدمت اكتر من لون فى الغنا ,, واعضاء الفرقة كل واحد اسلوب مختلف عن التانى
قدمو اغانى لنجاة وفيروز ومحمد عبد الوهاب ولوردة وعبدالحليم وسيد درويش وصباح ومدحت صالح ومحمد منير وانغام و محمد الحلو واسماعيل ياسين كمان
كانت ليلة جميلة جدااا ,, وطبعا اختى ماسابتش سلمى الا لما اتصورت معاها
الساقية نفسها من أكتر الأماكن المحترمة دلوقتى ,, يكفى ان التدخين ممنوع هناك ودا كفاية بالنسبالى عشان تبقى مكان محترم

9 comments:

shorouk said شروق سعيد said...

أنا بصراحة أول مرة أسمع عن الفرقة دي و مكنتش أعرف أن سلمي بتغني
بس واضح إنها فرقة لذيذة
و ساقية الصاوي هي المركز الثقافي المصري الوحيد اللي يستحق إنه يتقال عليه مركز ثقافي

مؤنس فرحان said...

اهلا شروق
انا بردو ماكنتش اعرف عنها قبل كده احنا نعتبر عرفناها عن طريق سلمى

لكن طلعت تجنن .. والساقية ماشاءالله مكان يفرح بجد .. حاجة الواحد يفتخر بيها
شكرا على مرورك .. يارب تنورينا علطول

JuSt_hUmAn said...

أنا برضو أول مرة أسمع عن الفريق دا رغم إني بشكل ما متابع الساقية
عموماً..بس شكله فريق حلو فعلاً.. ياريت لما تبقى فيه حفلات فيما بعد تعرفنا يا مؤنس.

مؤنس فرحان said...

اهلا عمروو .. الفريق فعلا حلو جداا
واللى عرفته انهم تقريبا بيعملو بمعدل حفلة كل شهر فى الساقية فإن شاء الله حفلة شهر 4 نعرف ميعادها قبلها بفترة
على فكرة على موقع الساقية بيحطو برنامج الشهر كله لكل الحفلات والندوات والمسرحيات .. كل نشاطات الساقية طول الشهر
اللى موجود حاليا طبعا برنامج شهر 3
انشطة شهر 4 لسه مانزلتش .. دا الموقع
http://www.culturewheel.net/

*سمر* said...

واضح ان اختك واخداك معاها فى كل حته :)

انا على فكرة من عشاق الساقية..وانت بجد قلت التعبير المثالى عليها ..هى فعلا مكان محترم جدا

مؤنس فرحان said...

سمر

حكم القوى بقى .. بس الساقية ونا هناك حسيت بالفرحة كده
كنت فخور ان فى مكان زى دا فى مصر

*سمر* said...

فعلا هى مكان يدعو للفخر ..انا كنت لسه هناك امبارح :)

ٍSOU said...

من الحاجات اللى نفسى فيها انى اروح ساقية الصاوى..اسمع عنها لكن عمرها ماروحتها و لا اتوقع انى ممكن اروحها..بس بردوا يبقى الامل ددائما:))

مؤنس فرحان said...

سوو

الساقية مكان جميل جدا ومحترم جدا
وإن شاءالله تتاح لك الفرصة وتزوريها