من وحى أسبوع

ليا أسبوع مادخلتش نيت خالص

وكل يوم مر محتاج بوست لوحده

لكن قلت على قد ما أقدر ألخص كل اللى جوايا فى بوست واحد

.................................................................................

الوجدان الجمعى ,, كلمة غريبة شوية ,, معناها اننا جميعا كبشر أو كمجتمعات مشتركين فى وجدان واحد كبير ,, مشاعر وثقافة وحتى ذكريات واحدة مشتركة متوارثة من جيل لجيل

حاجات كتير علماء النفس بيفسروها عن طريق كلمة الوجدان الجمعى

علاقتى أنا بقى بالوجدان الجمعى بأحسها فى كذا حاجة

لما أكون بأتابع دورة ألعاب أوليمبية مثلا او بطولة رفع اثقال أو ألعاب قوى ,, بكون متحمس أوى مع كل لاعب حتى لو فى لاعبين مصريين معاهم بكون بقلبى مع الكل ,, لأنى بحس ان اى انجاز واحد فيهم بيحققه فهو لينا بردو هو انجاز بشرى بإسمنا ضد قوى الطبيعة المختلفة وعلى رأسها الجاذبية الأرضية ,, انا طبعا انا اقصد الألعاب اللى مافيهاش تنافس وجه لوجه

حاجة كمان

لما بأسمع خبر العثور على مقبرة جماعية فى اى مكان لأى شعب من الشعوب بتيجي علطول فى ذهنى كلمة إنتحار ,, لما الإنسان يقتل جزء منه فهو بينتحر

......................................................

يبقى انت أكيد فى مصر

برنامج حلو على قناة أو تى فى ,, له بعض الحلقات المميزة أوى لكن بردو فى حلقات موش قد كده

ويمكن أكتر الحلقات اللى ماعجبتنيش خالص ,, هى حلقة النظافة الشخصية ( دلوقتى الكل حيقول عليا معفن ) ... مذيع البرنامج كان بيقول ان المصريين موش بيهتمو بنظافتهم الشخصية وبيضيف : يعنى هو اى واحد وهو نازل الصبح ماعندوش كوباية ميا يغسل بيها وشه ؟؟

وبعد كده جاب ريبورت للناس فى الشارع وطبعا كانو مركزين عالناس اللى شكلها مبهدل وكلها عرق وكمان جاب الناس اللى بيكونو واقفين على عربيات بيبيعو اى حاجة او اللى ماشى بعربية تين شوكى او واحد قاعد بيشحت فى الشارع وميكانيكي

انا شايف ان كل دا اونطا ,, طبيعى ان الناس اللى معظم يومها فى الشارع فى وسط التراب ماتبقاش على سنجة عشرة

طبيعى ان عسكرى المرور اللى جابه فى التقرير اللى واقف اكتر اليوم فى وسط السيارات مايبقاش على سنجة عشرة

طبيعى ان اى واحد ينزل الصبح يركب المواصلات ويتبهدل فيها ويوصل شغله او جامعته مايبقاش على سنجة عشرة

......................................................................

كنت من زمان بأستغرب أوى من فكرة الجهاز

ان الأب والأم يبدأو يشيلو بعض الأجهزة ( خلاط- مفرمة-مروحة-سجادة-طقم حلل - الخ ) وان الحاجات دى جهاز فلان او فلانة لما يكبرو ,, بعد كده اخدت بالى لما كبرت شوية من فكرة الغلاء اللى عايشين فيه والحاجة اللى كل مالها عمالة تغلا اكتر واكتر

.................................................

كل واحد مننا بيبحث عن أدوار بطولة وبنبحث عن أبطال لكل دور بنتمناه حوالينا عشان نكمل مسلسل حياتنا اللى بنحلم بيه

أحيانا الإحتياج لصديق ولأن دور الصديق ممكن يكون شاغر فنبحث له عن بطل حتى وان لم يكن هو افضل شخص

الاحتياج لحبيب

الاحتياج والد

الاحتياج لأم

الاحتياج لإبن

................................................................

موضوع الإضرابات والاعتصامات ,, يا ترى بتحصل ليه ,,؟؟

فى طاقة غضب وثورة ورفض للوضع الحالى ,, ولازم الطاقة دى تطلع

ولأن مفيش قنوات طبيعية لتفريغ الطاقة دى فممكن تخرج بشكل فوضوى ويكون ضرره أكثر من فايدته

والقنوات الطبيعية هى الأحزاب والديمقراطية وان الناس تقول رأيها وان يبقى فى جهات رقابية محترمة الناس تثق فيها

لكن لان دا كله غايب والناس بقت حاسة انها فى وادى والحكومة فى وادى كأنها حكومة لبلد تانية وكأننا احنا شعب لحكومة غيرهم

حصل الشكل الفوضوى والغباء المتبادل مابين الشعب والحكومة

لما يبقى فى احزاب حقيقية موش صورية

لما يبقى فى انتخابات ديمقراطية

لما تبقى المناصب المؤثرة عالناس بالانتخاب زى المحافظين موش تعيين

لما الناس تحس بالأمان والثقة فى الحكومة

لما دا كله يحصل وان شاءالله يحصل وطبعا موش مرة واحدة

حد يبقى يرن لى

...........................................................

سؤال : هو احنا ليه موش بنسمع برة انهم بيحتفلو بعيد ميلاد رؤساء جمهورياتهم

سؤال تانى : هو احنا ليه موش بنحتفل بعيد ميلاد رئيس الوزراء و وزير الداخلية و وزير الخارجية و المحافظ و مدير عام هيئة البريد

............................................................

زيادة الأسعار على الأغنياء بس وفى صالح محدودى الدخل

أينعم زيادة سعر الوقود حيرفع أسعار النقل عامة وبالتالى كل البضايع والسلع والمواصلات

لكن مين قال ان محدودى الدخل حيتأثرو بالكلام دا

لأنهم موش محتاجين يركبو مواصلات ولا ياكلو ولا يشربو ولا يشترو هدوم وبالتالى موش محتاجين يتعلمو ولا يتجوزو

محدودى الدخل دوول كائنات من كوكب تانى لها عادات وطقوس واحتياجات غير احتياجات البشر على كوكب الأرض

............................................................

النهاردة الخميس فى ساقية الصاوى حفلة لفرقة أيامنا الحلوة الساعة الثامنة مساءا فى قاعة الحكمة

........................................................

كالعادة مفيش أى تناقض فى كلامى

.......................................................