Wednesday, May 7, 2008

من وحى أسبوع

ليا أسبوع مادخلتش نيت خالص
وكل يوم مر محتاج بوست لوحده
لكن قلت على قد ما أقدر ألخص كل اللى جوايا فى بوست واحد
.................................................................................
الوجدان الجمعى ,, كلمة غريبة شوية ,, معناها اننا جميعا كبشر أو كمجتمعات مشتركين فى وجدان واحد كبير ,, مشاعر وثقافة وحتى ذكريات واحدة مشتركة متوارثة من جيل لجيل
حاجات كتير علماء النفس بيفسروها عن طريق كلمة الوجدان الجمعى
علاقتى أنا بقى بالوجدان الجمعى بأحسها فى كذا حاجة
لما أكون بأتابع دورة ألعاب أوليمبية مثلا او بطولة رفع اثقال أو ألعاب قوى ,, بكون متحمس أوى مع كل لاعب حتى لو فى لاعبين مصريين معاهم بكون بقلبى مع الكل ,, لأنى بحس ان اى انجاز واحد فيهم بيحققه فهو لينا بردو هو انجاز بشرى بإسمنا ضد قوى الطبيعة المختلفة وعلى رأسها الجاذبية الأرضية ,, انا طبعا انا اقصد الألعاب اللى مافيهاش تنافس وجه لوجه
حاجة كمان
لما بأسمع خبر العثور على مقبرة جماعية فى اى مكان لأى شعب من الشعوب بتيجي علطول فى ذهنى كلمة إنتحار ,, لما الإنسان يقتل جزء منه فهو بينتحر
......................................................
يبقى انت أكيد فى مصر
برنامج حلو على قناة أو تى فى ,, له بعض الحلقات المميزة أوى لكن بردو فى حلقات موش قد كده
ويمكن أكتر الحلقات اللى ماعجبتنيش خالص ,, هى حلقة النظافة الشخصية ( دلوقتى الكل حيقول عليا معفن ) ... مذيع البرنامج كان بيقول ان المصريين موش بيهتمو بنظافتهم الشخصية وبيضيف : يعنى هو اى واحد وهو نازل الصبح ماعندوش كوباية ميا يغسل بيها وشه ؟؟
وبعد كده جاب ريبورت للناس فى الشارع وطبعا كانو مركزين عالناس اللى شكلها مبهدل وكلها عرق وكمان جاب الناس اللى بيكونو واقفين على عربيات بيبيعو اى حاجة او اللى ماشى بعربية تين شوكى او واحد قاعد بيشحت فى الشارع وميكانيكي
انا شايف ان كل دا اونطا ,, طبيعى ان الناس اللى معظم يومها فى الشارع فى وسط التراب ماتبقاش على سنجة عشرة
طبيعى ان عسكرى المرور اللى جابه فى التقرير اللى واقف اكتر اليوم فى وسط السيارات مايبقاش على سنجة عشرة
طبيعى ان اى واحد ينزل الصبح يركب المواصلات ويتبهدل فيها ويوصل شغله او جامعته مايبقاش على سنجة عشرة
......................................................................
كنت من زمان بأستغرب أوى من فكرة الجهاز
ان الأب والأم يبدأو يشيلو بعض الأجهزة ( خلاط- مفرمة-مروحة-سجادة-طقم حلل - الخ ) وان الحاجات دى جهاز فلان او فلانة لما يكبرو ,, بعد كده اخدت بالى لما كبرت شوية من فكرة الغلاء اللى عايشين فيه والحاجة اللى كل مالها عمالة تغلا اكتر واكتر
.................................................
كل واحد مننا بيبحث عن أدوار بطولة وبنبحث عن أبطال لكل دور بنتمناه حوالينا عشان نكمل مسلسل حياتنا اللى بنحلم بيه
أحيانا الإحتياج لصديق ولأن دور الصديق ممكن يكون شاغر فنبحث له عن بطل حتى وان لم يكن هو افضل شخص
الاحتياج لحبيب
الاحتياج والد
الاحتياج لأم
الاحتياج لإبن
................................................................
موضوع الإضرابات والاعتصامات ,, يا ترى بتحصل ليه ,,؟؟
فى طاقة غضب وثورة ورفض للوضع الحالى ,, ولازم الطاقة دى تطلع
ولأن مفيش قنوات طبيعية لتفريغ الطاقة دى فممكن تخرج بشكل فوضوى ويكون ضرره أكثر من فايدته
والقنوات الطبيعية هى الأحزاب والديمقراطية وان الناس تقول رأيها وان يبقى فى جهات رقابية محترمة الناس تثق فيها
لكن لان دا كله غايب والناس بقت حاسة انها فى وادى والحكومة فى وادى كأنها حكومة لبلد تانية وكأننا احنا شعب لحكومة غيرهم
حصل الشكل الفوضوى والغباء المتبادل مابين الشعب والحكومة
لما يبقى فى احزاب حقيقية موش صورية
لما يبقى فى انتخابات ديمقراطية
لما تبقى المناصب المؤثرة عالناس بالانتخاب زى المحافظين موش تعيين
لما الناس تحس بالأمان والثقة فى الحكومة
لما دا كله يحصل وان شاءالله يحصل وطبعا موش مرة واحدة
حد يبقى يرن لى
...........................................................
سؤال : هو احنا ليه موش بنسمع برة انهم بيحتفلو بعيد ميلاد رؤساء جمهورياتهم
سؤال تانى : هو احنا ليه موش بنحتفل بعيد ميلاد رئيس الوزراء و وزير الداخلية و وزير الخارجية و المحافظ و مدير عام هيئة البريد
............................................................
زيادة الأسعار على الأغنياء بس وفى صالح محدودى الدخل
أينعم زيادة سعر الوقود حيرفع أسعار النقل عامة وبالتالى كل البضايع والسلع والمواصلات
لكن مين قال ان محدودى الدخل حيتأثرو بالكلام دا
لأنهم موش محتاجين يركبو مواصلات ولا ياكلو ولا يشربو ولا يشترو هدوم وبالتالى موش محتاجين يتعلمو ولا يتجوزو
محدودى الدخل دوول كائنات من كوكب تانى لها عادات وطقوس واحتياجات غير احتياجات البشر على كوكب الأرض
............................................................
النهاردة الخميس فى ساقية الصاوى حفلة لفرقة أيامنا الحلوة الساعة الثامنة مساءا فى قاعة الحكمة
........................................................
كالعادة مفيش أى تناقض فى كلامى
.......................................................

12 comments:

Miss. Sosa said...

السلام عليكم

حلو الكولكشن اللي بتتكلم فيه ديه يا مؤنس
ومنتظرين التكملة

بس انا عايزة منك طلب
لو عندك صورة قط عجوز بطقية ياريت تحطلى اللينك بتاعها

وميرسي مقدما :)

سمراء said...

عزيزي مؤنس
بالنسبة لموضوع تبقي انت اكيد في مصر - اتفق معك تماما انه لا يجوز تعميم ظاهرة الا بعد دراستها دراسة متأنيه ومستندة الى معايير علمية
ــــــــــــــــــــــــــــ
اما عن الجهاز فرغم الحقيقة الواردة فية عن ارتفاع الاسعار الا اني اري ان ذلك احد اشكال انتهاك الاهالى لحقوق ابنائهم في اختيار ما يناسبهم في الوقت ذاته وقت بناء حياتهم الخاصة وهو ما يمثل سعادة خاصة بهم
ــــــــــــــــــــــــــــــ
بالنسبة لادوار البطولة فان احتياجنا لمثل هذة العلاقات هو احتياج انساني
من الضرورة اشباعة الا اني اتفق معك تماما في انه يجب ان يكون بالشخص المناسب حيث يزعجني عندما اري زوجين يلعب احدهم دور الابوة او الامومة
فتلك العلاقة غير صحية
ـــــــــــــــــــــــــــــــ
فعلا لازم طاقة التحرر تحرر من داخل هذا الشعب
ــــــــــــــــــــــــــــــ
انا مبحتفلش بعيد ميلاد مدير عام هيئة البريد علشان معرفوش وعلشان بيتغير كل شوية لكل الباقي علاقتنا وعلاقة ابائنا واولادنا ويمكن احفدنا مستمرة معاهم ان شاء الله
ــــــــــــــــــــــــــــ
نعم هم كائنات من كوكب تاني هنعترض بقي على امر الله - هنكفر ولا اية؟؟؟؟؟؟؟؟؟؟؟؟؟
تحياتي
سمراء

JuSt_hUmAn said...

http://www.worth1000.com/entries/124000/124099gLok_w.jpg

http://images.jupiterimages.com/common/detail/83/55/23325583.jpg

http://www.for-cats-only.com/images/submittedPhotos/advice/adviceHowtoSylvester02.jpg

اللينكات دي لـ miss. sosa
..
نيجي للبوست بقى..
أنا ما شفتش الحلقة اللّي أنت بتحكي عليها..بس دي سفالة وقلة أدب..الناس فقدت الإحساس بآدميتها أصلاً نظراً للظروف الزفت اللّي عايشينها..فنظافة شخصية ايه اللّي جايين يتكلموا عنها؟
بعدين الصيف اللّي فات كان كل يوم الصبح الميّه بتفضل قاطعة عندنا..يا راجل دنا لما كنت في التربية العسكرية كنت بضطر أحلق دقني على الناشق من غير ميّه ولا معجون!
..
المشكلة في فكرة الأجهزة والكلام دا إن الحاجات دي بتبقى أثرية على ما الأولاد بيتجوزوا وكدا
..
عجبني كلامك عن إن الاحتياج ساعات بيخلينا نشوف أي شخص "يبدو" مناسب
..
بالنسبة للليلة بتاعة محدودي الدخل مش هيتأثروا والفيلم دا فعاوز أقول للحكومة: "أحسنوا الكذب".

dododody said...

السلام عليكم ورجمة الله وبركاته

بالنسبة لحلقة برنامج او تى فى ده فيه تشويه لصورة المصريين ما طبيعى ان الناس اللى شغلها فى الشارع زى البائعين المتجولين حيكونوا مبهدلين ومتربين !!! ليه دايما بيعرضوا الجانب السىء فى حياة المصريين

اما بالنسبه لادوار البطوله فالانسان دايما بيحتاج لصديق او اخ او حبيب فالانسان بطبعه كائن اجتماعى وايضا احتياج المرأه للرجل هو احتياج يكمل بعضهم البعض

بالنسبة لفكرة زيادة الاسعار على الاغنياء فقط وان محدودى الدخل لن يتأثروا فهو نفاق

مؤنس فرحان said...

عفوا يا ميس عالتأخير

عالعموم عمرو ربنا يكرمه جابلك طلبك
شكرا على زيارتك وان شاءالله تتكرر

مؤنس فرحان said...

سمراء
شكرا على ردك ومتابعتك

موضوع الجهاز فعلا حجر على الأبناء لأنهم وقتها بيكونو مضطرين يرضو بـ ذوق ونمط معين اتفرض عليهم فرض
دا غير ان بيكون كتير حاجات بقت قديمة من ناحية ذوقها ونوعها وموديلها
لكن فى وجهة نظر تانية بتقول : ان الكلام دا للمرفهين
وان معظم الناس اللى دخلها على قدها بيحاولو على قد مايقدرو يشيلو فى جهاز الأولاد بنظام اللى بتشتريه دلوقتى بكرة ببلاش والاسعار كل مالها بتغلى والقرش اللى نشترى بيه ملكناه
واهو الحمل يخف عليهم لما ييجو يتجوزو

الغرض والنية حسنة طبعا
حتى وان اختلف الأبناء معاهم

شكرا على ردودك

مؤنس فرحان said...

Just Human

اهلا عمروو

والله الواحد مابقاش عارف يلاقيها منين ولا منين .. الناس ماشية تكلم نفسها
والضغوط كل مالها بتزيد ,, وبعد كل دا تلاقى واحد طالع يقولك النظافة الشخصية عند المصريين
دى سقطة للبرنامج دا رغم احترامى لمواضيع تانية اثاروها قبل كده
..
وفعلا بالنسبة لموضوع الجهاز بيكون ذوقه قدم أوى لكن الفكرة دى من العادات المصرية الأصيلة فى الاحتيال على غلاء المعيشة
ربنا يكرم الجميع

شكرا على ردك يا عمروو

مؤنس فرحان said...

أهلا دودو

بالنسبة لأدوار البطولة فمشكلتها ان احتياجنا ساعات بتخلينا لا نحسن الاختيار او التفكير والتأنى

مجرد شخص ما يصلح

شكرا يا دودو على ردك

Tamer Nabil said...

بوست مميز واتكلمت فى عن مشاكل كتر موجودة

يعنى عيد ميلاد الريس يمكن الدول بس الغير اوقراطية هيا اللى تحتفل بية وتهتم

وكمان على ما الوضع يتغير هتستنى كتير على ما حد يرن عليك

--

اخر موضوع عندى ساخر عن كيف تكون رجل اعمال اتمنى اشوف رايك فى ويكون بنا تواصل دائم فى افكار حرة 1

تحياتى

مؤنس فرحان said...

أهلا بيك تامر

شكرا لزيارتك و ردك الجميل

المفروض ان رئيس الجمهورية موظف حكومى وموش من المفروض انه يبقاله هالة التقديس دى اللى احنا كعرب دايما بنحيط زعمائنا بيها وكأنهم صنف تانى من البشر او حتى اعلى من البشر
................

أكيد تواصلنا دائم ان شاءالله
شكرا ليك

Tamer Nabil said...

السلام عليكم

ازيك ياصاحبى

اخبارك اية


فى انتظار جديدك

تحياتى

مؤنس فرحان said...

أهلا تامر

معلش والله انا ليا اسبوع موش عارف انام حتى .. مشغول فى الشغل جداا حتى يوم الجمعة
لكن كل فرصة بقدر ادخل حاتلاقونى ان شاءالله

شكرا يا جميل على سؤالك