Sunday, August 14, 2011

قراءة الإنسان





تجربة مثيرة جدا مليئة بالإثارة و الشغف و المتعة و الإنفعالات المتضاربة

عارفين متعة قراءة كتاب كبير دسم مليان أفكار

نفس الشعور تقريبا بس يمكن أكتر إثارة

أنا بأتكلم عن تجربة قراءة المدونات

كل فترة بأنتقى مدونة معينة و أقرأها كاملة من أول بوست إنكتب فيها لحد آخر واحد

التجربة دى عملتها لحد دلوقتى حوالى 15 مرة تقريبا

شعور غريب ... إنك تتابع ردود أفعال و أفكار ... و حتى تعليقات و تفاعل قراء المدونة مع صاحبها

كأنك بتتابع تطور شخصية إنسان قدامك على مدار سنة او اتنين او تلاتة ... بفترات حزنه و فرحه ... خوفه و يأسه و أمله وابتهاجه

فيه بعض الملاحظات اللى شدت إنتباهى

أول ملاحظة .. هى طابع الحزن الشجن اللى بيغلف غالبية التدوينات و الشعور بالوحدة و شعور المدون ان اللى حواليه موش فاهمينه و موش قادر يتواصل معاهم او يوضح لهم او يحسسهم بإللى جواه

الملاحظة التانية .. هى الأمل ... دايما هناك شعور خفى بالأمل .. ان أكيد فى وقت من الأوقات حايلاقى شخص يتفهمه ويستطيع التواصل معاه

الملاحظة التالتة ... الشعور الطاغى بتمنى مقابلة الشخص اللى قرأت له المدونة فى الواقع .. شعور بيسيطر عليا بشكل رهيب

فى بعضهم بأكون قابلتهم قبل كده .. لكن بعد قراءة مدونته بالكامل بأحس انى حأتعرف على إنسان جديد مختلف .. لم تسمح لى الظروف سابقا انى اتعرف على جوانب كتير فيه




painting-of-man-reading-by-candlelight

painted by: Matthias Stomer

6 comments:

krkor said...

انجاز جميل

دراسة تصرفات الانسان شي حلو والحلو اكثر لما يكون هالانسان تعرفه شخصيا

موفق خير

سمراء said...

الحقيقة مجربتش اعمل كده بس عندي انطباع ان لو عملت ده هلاقي الناس افكارها اتغيرت
يمكن علشان انا شايفة ان اللي بكتبه هو ما اعتقد فيه اليوم وليس بالضرورة ان يكون مناسبا للغد
اشكرك على مرورك
سمراء

مؤنس فرحان said...

krkor

أهلا بيكي

نورتى المدونة

دراسة تصرفات الآخرين تنعكس على تصرفاتنا .. ونتعلم منها لنصبح أفضل

شكرا لك

مؤنس فرحان said...

العزيزة سمراء

أكيد إحنا بنتغير .. عشان كده أنا ونا بعمل التجربة دى .. بتعجبنى كتير تدوينات معينة وبيكون عندى رد عليها لكن .. مابكتبوش .. لأن حالة البوست دا انتهت بالنسبة لصاحبها
لكنها أثر من الآثار فى شخصيته

شكرا لمرورك

*سمر* said...

حلوة اوى الحكاية دى .. مجربتش اعملها بنفس الشكل قبل كده .. بس يمكن بشكل تانى انى اقرأ كذا تدوينة لنفس المدونة ..

اتفق معاك جدا فى الملاحظات التلاته .. اللى انا شخصيا حساها فى نفسى .. الشجن .. والوحدة .. والامل

احمدابوالفتوح said...

بصراحة عجبتنى المقاله واشاركك الراى فى الملاحظات اللى كتبتها ،،،، وممكن يكون فى عامل مشترك بين اصحاب المدونات وانا بصراحة هاحاول اجرب ده لو قدرت وبجد عجبتنى المقاله