Sunday, January 16, 2011

كلمة وجعتنى

أولا ... مبروك لـ تونس

وربنا يكرمهم ويعدي الفترة دى على خير لحد ماتتنظم الأمور من تانى ... و عقبالنااااااااا يارب

اليومين اللى فاتو ... كل العالم  كان بيتابع تونس وأحداثها ... وكل صحف العالم اشتغلت تحليل ومقارنة بين تونس وكل الحكومات العربية المشابهة فى الظروف

مقالتين ...  واحدة فى صحيفة انجليزية والتانية فى صحيفة أمريكية ... الاتنين اتفقو ان الثورة موش حاتنتهى فى تونس لكنها حاتستمر وتنتشر فى أكتر من دولة عربية

لكن كمان اتفقو ان مصر من الصعب انه يحصل فيها اللى حصل فى تونس

ليــه ...؟؟؟

تونس تعدادها عشرة مليون ... ودخل الفرد فيها أعلى من دخل الفرد فى مصر بـ أربع أضعاف ... ونسبة البطالة فيها خمسة فى المية

و فى مصر نسبة البطالة أعلى بكتير طبعا

و مع ذلك  استبعدو ان اللى حصل فى تونس يحصل فى مصر

بسبب ان المصريين الـ تمانين مليون ... أكثر جهلا و أقل ثقافة ... و أقل تنظيما و أكثر تشتتا

الحكومة ظبطت الشعب زى ماهى عايزة .... شعب جاهل وتفكيره سطحى .... المهم عنده الأهلى والزمالك وجوزيه  .... شعب نصفه تقريبا أميين فعليا ...  والباقى متعلمين اسما

الآلة الإعلامية الحكومية ... مسيطرة على التوجه العام

أنا رأيى ان حالتنا موش سيئة للدرجادى ... ممكن الموضوع يتأخر عندنا شوية ... لكن حيحصل حيحصل  

4 comments:

Mafrousa said...

ربنا يستر و ما يحصلشي
اناا مش عاجبنى الدمار ولا السرقة اللى هناك
هنا فى مصر معتمدين على ان فيه حرية "شوية"
و الناس بتنفس بالكلام
هناك كان فيه قمع حتى على الكلام
انا مبسوطة لتونس
بس خايفة عليهم برضه

Anonymous said...

هو صحيح الكلمة توجع لكن مش صحيحة...اصل احنا مش متفرقين اوى و قلوبنا ضعيفة للدرجة و لو كنا كدة ماكنش الرسول عليه الصلاة و السلام قال علينا خير اجناد الارض>>>
فرجة قريب ان شاء الله

على فكرة انا نقلت من البلوج ؤطيارة ورق على ا لورد بريس بدل ما افضل محتارة بين الاتنين

Known as PHYSCO said...

اقرا آخر مقالة لأحمد خالد توفيق فى الكومنت اللى بعد ده... بيقول نفس اللى انت بتقوله

اللى بيقول إنه خايف من إن اللى يحصل هناك يحصل هنا .. هناك الوضع مرعبجا وأنا كمان هاكون ميتة من الرعب لو مكانهم .. بس إحساسى إنى أنا اللى أقدر أحدد بقى مستقبل بلدى ومصيرها .. حماسى للكلام ده هينسينى خوفى .. خوفى هيكون بس بيغذينى علشان أفضل صاحية ومنتبهة إن ماحدش يحاول يضحك علىّ ويسلبنى كل اللى حاربت علشانه

هنا الوضع مش وردى على الإطلاق .. وهامش الحرية المتساب .. ده بمزاجهم شوية يعلوه وشوية يخنقوا .. وماحدش عارف امتى الفترة دى بتخلص علشان تيجى الفترة اللى بعدها

أنا مبسوطة لتونس
وخايفة عليهم
وخايفة علينا اكتر من كتر سكوتنا ورضانا عن الوضع بتاع النضال الفيسبوكى

Known as PHYSCO said...

مقالة أحمد خالد توفيق

http://ahmed-khaled-tawfik.blogspot.com/2011/01/blog-post_2889.html