رقم واحد : ليه الكل بيعزى البابا شنودة ....؟؟ ليه مش بيعزو أهالى الضحايا ... مع العلم ان العدد موش كبير وان المسئولين موش حايلفو كتير ... دوول كلهم فى الاسكندرية ...؟؟؟
عارفين ليه ... لأنهم مش هدفهم التعزية و المواساة فعلا ... هدفهم انهم يظهرو فى التليفزيون وهما بيعزو البابا شنودة كممثل ورمز للمسيحيين الأرثوذوكس فى مصر
الـ شو الإعلامى
رقم إثنين : نص الضحايا تقريبا مسلمين ... ليه ماحدش بيجيب سيرتهم خالص ...؟؟ كل التركيز على الضحايا المسيحيين ولو دورت على أى موقع أو أى قناة تليفزيونية حاتلاقيهم جايبين أسماء الضحايا المسيحيين بس بدون أى ذكر للمسلمين منهم . . . يا ترى ليه ..؟؟
لأن الـ شو الإعلامى مهتم بالأجواء المسيحية دلوقتى
اليومين اللى فاتو كانو بيلمو تبرعات لضحايا الحادث ...؟؟؟ هل حصل وسمعتم قبل كده عن جمع تبرعات لضحايا أى حادث إرهابى ...؟؟؟ حتى حادث نجع حمادى .. ماحصلش الكلام دا ... حادث الحسين ماحصلش ... شرم الشيخ ماحصلش ... سواء كانو الضحايا مسلمين أو مسيحيين
فاكرين من كام سنة لما قطار الصعيد ولع واتحرق بإللى فيه لما كان الناس مسافرين قبل العيد الكبير لبلادهم يقضو العيد هناك ....؟؟؟ حد وقتها جمع تبرعات ...؟؟ هل الحكومة صرفت تعويضات زى اللى اتصرفو للسياح ضحايا القرش بتاع شرم الشيخ ...؟؟؟
طبعا لأ ... لأن دوول ماحدش كان مهتم بيهم ولا سأل عنهم ولا فى جمعيات خارجية فى أمريكا واستراليا واليونان وكندا بتسأل عنهم و ممكن تشوه صورة حكومتنا قدام العالم بسببهم ...!!!
بردو ليه ...؟؟ عشان الـ شو الإعلامى الوقت دا مركز على الحادث دا ... و ممكن سؤال خبيث يطلع كمان كام يوم ... هى التبرعات دى للضحايا كلهم ولا للمسيحيين بس ..؟؟
رقم ثلاثة : فى واحد اسمه سيد بلال مات من التعذيب أثناء استجوابه عن الحادثة دى فى الاسكندرية ... ياترى أهل الشخص دا حد حيعبرهم ...؟؟؟ ولا حايبقا خالد سعيد جديد .... ؟؟؟
رقم أربعة : إيه أهمية الـ شو الإعلامى ...؟؟؟ حاجات كتييير أى
الناس كلها فجأة نسيت كل الكلام عن الانتخابات المزورة لمجلسى الشعب و الشورى .... التزوير المخجل الغشيم
نسيت اننا داخلين على انتخابات رئاسية
خلو الناس تتكلم عن الوحدة الوطنية ..... ونعيد كل الأفلام اللى بتتكلم عن الموضوع دا .... ونفتكر (فجأة دلوقتى) كل مشاهير مصر فى كل المجالات المسيحيين منهم .... وسبوبة حلوة لكل المطربين و الملحنين والمؤلفين ... حانلاقى سيل أغانى عن الوحدة الوطنية
وكأن كل الكلام دا حيحل كل المشاكل الموجودة بين المسلمين والمسيحيين
شـو إعلامى مكثف تركيز على كل ماهو مسيحي ... برامج أفلام أغانى ... وممكن كمان الوزارة الجايا نزودهم واحد ولا اتنين مسيحيين
موضوع دور العبادة الموحد ننجز فيه أكتر .... موضوع الزواج الثانى نشوف له حل ... وكام حاجة كده ترضيهم وتسكتهم ... عشان نضمنهم فى الانتخابات
السؤال فعلا .... هل دا هو اللى حايرضى المصريين المسيحيين ...؟؟؟
الإجابة نعم ... للأسف لأن الحكومة بردو موش بتتعامل مع شعب عنده مشاكل عايز تتحل من جذورها
الحكومة بتتعامل مع موظف هى عينته وراضية عنه ... البابا شنودة ومفتى الجمهورية وشيخ الأزهر .... والمحافظين والوزراء .... كل دوول مجرد موظفين عند الحكومة والنظام الحاكم
مشاكل كتيييير ظهرت فى الـ 15 سنة الأخيرة فى ظاهرها مشاكل طائفية .... لكن فى حقيقتها هى مشاكل اجتماعية وسياسية وتعليمية
مشاكل ضمن سلسلة مشاكل طويلة يغرق فيها الناس ويبعدو بتفكيرهم عن كل مايمت بـ صلة للبلد وسياستها و النهب المنتظم لخيراتها ومواردها
خلاصة الموضوع
شعب طيب جداا .... مستغل أقصى إستغلال من حكومته عن طريق أدوات سيطرة ... متمثلة فى الآلة الإعلامية وشوية الموظفين الحكوميين اللى بيتقال عليهم ... شيوخ و علماء وباباوات وقساوسة ومحافظين وعمد ووزراء
نظام ساقط بالثلث ... فاشل بالثلث ... طالما موش قادر يوفق بين موارد البلد ومتطلباتها ... فشل إدارى وفشل سياسى و فشل إجتماعى
فســـــــــــــاد فـج ... بجــح ... غشيــم
إيه ذنب الناس اللى راحت فى العملية دى ...؟؟؟ مسلمين ومسيحيين ...؟؟؟
أيام عيد واحتفال وتضرع ودعاء وتوديع سنة فاتت واستقبال سنة جديدة .... عادة كل سنة بيبقى اليوم دا احتفال رسمى للمصريين كلهم بمختلف طوائفهم ... والسنادى أصبح يوم نكد عالكل
يمكن كلامى كله يظهر انه نقد وهجوم على الحكومة وانها السبب الرئيسى فى اللى حصل .... وهنا أنا ماأقصدش الناحية الأمنية بس .... لأن الناحية الأمنية ممكن يكون معاهم عذرهم فيها .... لأن الإرهاب بيضرب فى كل مكان فى الدنيا وماحدش عارف يوقفه .... لكن أنا انتقادى للحكومة انها وصلتنا للوضع دا .... الوضع اللى يسمح للأفكار دى انها ممكن تدخل عندنا تانى بعد ماكنا انتهينا منها فى فترة التسعينات
والحلول دايما موش أمنية ... الصح انك ترجع للجذور وتعالج الأسباب والدوافع والذرائع ... اللى ممكن تؤدى لمشكلة وتبطلها فى مهدها
لكن توفر التربة الخصبة للفكر دا وبعد كده نعيط
ليه الناس بتسمع شرائط دينية وتتابع فضائيات دينية ... قد يكون بعضها بيبث فكر متشدد أو فكر خاطئ من أساسه ....؟؟؟
لأن الدين مهم عندنا كلنا ... والفطرة السليمة بتخليك تدور عليه وتسعى له ... فأن ماتوفرش بشكل سليم فى مكانه الطبيعى ... الناس حاتدور عليه فى مكان تانى
والمكان الطبيعى اللى اقصده ... هو المدارس و التعليم ... لو أولادنا بيتعلمو دين صح ... موش مجرد آيتين يحفظوهم وحديثين وقصة العنكبوت والحمامتين (اللى هى أصلا موش صحيحة) ماكانوش طلعو فارغين و فاضيين من جوا وعندهم استعداد انهم يتلقو الكلام دا من مصدر تانى ممكن يكون له أهداف أخرى موش سليمة النية ...
إحنا اللى سمحنالهم ووفرنالهم عقول فاضية عطشانة محتاجة للى يملاها
ربنا يرحم مصر والمصريين ... ويرحم كل أمواتنا ... ويصبر أهاليهم ... آمين يارب .... ويشيل من علينا الغمة قادر يا كريم
7 comments:
امين يارب العالمين
متفقة مع حضرتك جدا ونفس التساؤلات تشغلنى وتستفزنى بشكل بالغ
بس حضرتك بتقول اختيار الاصلح
مين يختار ؟
هو احنا بنختار حاجة ؟
اى شخص الشعب بيختاره وبيحبه بيتحارب بضراوة
وبيبعد عن الساحة فى لحظة
احنا مش بنختار
لا نقدر ولا عارفين
احنا مستنين الفرج
وصابرين
وبس
تحياتى
الحل النظام يتفور
جربناه كتير و خربها
ياريت توسع ثقافتك شوية أكتر من كده
وتحاول تعرف الدنيا ماشية ازاى خلف الكواليس
لأنك بتتهم ناس بالظلم وبتبرأ ناس بالظلم
وان ثقافتك زى ثقافة كتير غيرك بيتعاملوا مع مفهوم الثقافة على انها شوية معلومات وشوية فكر راقى واحترام متبادل وخلاص
أرجوك اقرأ للجميع لمن تحب ومن لا تحب وللجميع الاطياف ولا تستهين بوجهة نظر أحد وحاول تاخد كل الكلام على محمل الجد
وان شاء الله بتوسم فيك خير كتير
تحياتى
حاجات جوايا
أهلا بيكي .. فعلا احنا موش بنختار ... عشان كده لازم نرجع نختار تانى ... ودا موش حيحصل إلا لما الغمة تزول ... الغمة اللى طابقة على نفسنا ومتمثلة فى شلة حرامية ... عصابة .. ماسكانا
تيرز
النظام موش حايتفور لوحده ... أديكي شوفتى تونس ... لازم الناس هى اللى تفوره
Anonymous
مفيش حد بيظلم حد كده ... الظلم دا وجهة نظر ... من خلال معلومات أتيحت ليا فحكمت على فلان انه كذا
شكرا عالنصيحة ... أنا بأحاول على قد مااقدر انى مااستهينش بوجهة نظر حد
يمكن لو كان دا حاصل فى الحكومات ماكناش وصلنا للى احنا فيه من تخلف وفساد وانهيار أخلاقى ودينى واقتصادى وعسكرى .. على كافة المستويات
أنا من ساعة الحادثة دى وانا مصممة إن اللى حصل ماكنش هدفه استهداف مسيحيين على الإطلاق .. ده كان هدفه الشارع المصرى عامة .. علشان كده أنا ضد الحكومة لما دفعت للضحايا دول بالذات أكتر بكتير من غيرهم من الضحايا رغم إن ده اللى المفروض يحصل .. بس ساعتها كتير أوى كانوا بيغلوا ويقولوا طيب واحنا يا مسلمين لما بنروح فى شربة ميّة هو حد بيعبرنا .. والاتنين نسيوا إن اللى مات فى قطر مقلوب ولا اتحرق وبيت وقع و عبّارة غرقت .. كان فيهم مسلمين ومسيحيين .. وساعتها الحكومة ما عبرتش الاتنين .. والحكومة مش بتحابى حد على حد .. الحكومة مالهاش غير مصلحتها وده اللى كان فى مصلحتها وقتها .. فعملته
شهر واحد ده كان طويل أوى .. وحصلت فيه أحداث تكفينا على الأقل 6 شهور قدام
Post a Comment