Monday, September 13, 2010

العيد .. و الأفلام

كل سنة وانتم طيبين وعيد سعيد عالجميع وان شاءالله السنة الجايا يكون أحسن واجمل وأسعد

مفردات العيد السنوية اللى اصبحت معتادة .. من تحرشات جماعية ومراكب بتغرق فى النيل بإللى فيها وناس بتاكل أكل مسموم وغالبا رنجة أو فسيخ .... و أسوأ و أهيف و أتفه و أسخف و أسفف أفلام ممكن تنزل فى السينمات على مدار السنة هى اللى بتنزل فى العيد

ابو الطيب المتنبى كان قال :

عيدٌ بأيّةِ حالٍ عُدتَ يا عيد

ُ بمَا مَضَى أمْ بأمْرٍ فيكَ تجْديد

فـ ردا عالمتنبى فهو مفيش تجديد ... والحمد لله على كل حال

--------- --------------- --------------------

كنت عايز أتكلم عن شوية أفلام شوفتها الفترة اللى فاتت

The Lake House

My Name is KHAN

ميكانو

فيلم منزل البحيرة يمكن هو قديم شوية بس انا لسه شايفه قريب ... عجبنى أوى أوى فيه قدر من الرومانسية عالى وفانتازيا الزمن و ألاعيبه .. فيلم لذيذ

My Name is KHAN

الفيلم دا تحفة فنية ... من تمثيل وإخراج وموسيقى تصويرية و قصة وسيناريو .... فن و إبداع .. واللى حايتفرج عليه يعمل حسابه على علبة مناديل جنبه .... لأن فى حنفية دموع حاتشتغل .... و مهما اتكلم عنه موش حعرف أوصف مدى جماله

ميكانو

خالد الصاوى انا متيم بيه .... و نور ممثلة عالية أوى و تيم الحسن عمل دوره بإتقان كبير جداا ... فيلم بردو مليان مشاعر جميلة أوى و فكرة جديدة الى حد ما

موش عارف ليه بقيت مابيعجبنيش الا الأفلام اللى بأسح فيها دموع .... ان ماكانش الفيلم ينزل دموعى يبقى موش حلو .... محتاج أزور طبيب نفسى

9 comments:

Tears said...

فيلم ميكانو جميل و يعبر عن اتجاه سينمائى مختلف و كان يستحق احتفاء اكثر من القائمين على الصناعة

ماجد معجزة said...

شوف فيلم " عائلة ميكى" فيلم عيد صحيح بس مش تافه
و لبلبة عاملة دور فبه رائع

سمراء said...

يبقي زي ما فيلم ميكانو متهيالى كان عايز يقول
ممكن تفقد الذاكرة وتنسي وتبتدي من الأول
غالبا الدموع بتنزل لآننا لسة متخلصناش حقيقي من الم جوانا

سمراء

Anonymous said...

هوا انت احلى حاجة علمتها انك غيرت بداية المدونة بتعتك
مش اول اما افتح القى فرج فوده ونجيب محفوظ

مؤنس فرحان said...

أهلا تيرز

الفيلم بصراحة عجبنى أوى ... بس يمكن عشان مافيهوش رقص ومسخرة مانجحش على مستوى الجماهير ... ولأنه مافيهوش اسامى كبيرة النقاد مااهتموش يتكلمو عنه

مؤنس فرحان said...

اهلا ماجد نورتنا

لا لسه ماشوفتوش يا ماجد
ان شالله يكون حلو فعلا
اهلا بيك

مؤنس فرحان said...

العزيزة سمراء

للأسف عشان الأوبشن دا يبقى متاح ... ان الواحد يفقد الذاكرة ويبدأ من الأول فلازم يكون جنبك حد بيحبك بجد وبيخاف عليك ... زى كده فى فيلم ميكانو لما كان اخوه جنبه

....................

هى الدموع بتحسسنى انى لسه بنى آدم.. وان القسوة بتاعت المجتمع لسه ماتملكتش منى بشكل نهائى لحد دلوقتى
.....................

مؤنس فرحان said...

محمد باشا

كفاية انك نورتنا ... اللى تحب اجيبهولك فى اول المدونة قول لى عليه

ان شالله تطلب صورة سيادة الريس موش حتأخر

:D

Anonymous said...

انت عرفت ان انا طب مدام كدا هتلى اغنية اخترناه