Monday, July 19, 2010

المصريين و الإهمال

لحد إمتا حاتفضل صفة الإهمال هى الصفة الملاصفة لينا علطول كمصريين ...؟؟
لحد إمتا موش حانتعلم من أخطائنا ...؟؟
لحد إمتا حنفضل نرمى التهمة على الماس الكهربائى والمختل عقليا واللفافة اللى بتتبلع ...؟؟
لحد إمتا كل مانيجي نحاسب المسئول ... مانلاقيش مسئول ويفضل كل واحد يرمى المسئولية عالتانى ...؟؟

مجموعة من 19 بنت صغيرين فى إعدادى أغلبهم ومعاهم مشرف من الكنيسة اللى كانت مطلعة الرحلة غرقو فى مركب فى النيل فى حلوان
لحد دلوقتى طلعو 11 جثة والباقيين فى المستشفى بين الحياة والموت

غلطة مين ...؟؟
المشرف اللى كان معاهم ... لأنه هو المفروض الناضج اللى فى الرحلة واللى مهمته يخلى باله منهم
المراكبى اللى ماعندوش ضمير
شرطة المرافق اللى سمحت له يشتغل سواء كان معاه ترخيص أو لأ
خفر السواحل اللى وصلو بعد حادث الغرق بـ تلات ساعات عشان ينقذو مايمكن انقاذه

كل واحد من دوول له رئيس أو مشرف أعلى منه ... ولو كل واحد فيهم حاسس ان فى رقابة عليه و ان فى محاسبة وثواب وعقاب بعدل و جدية وحزم
لو كل واحد فيهم يعرف ربنا وبيراعيه فى السر والعلن
لو كل واحد من دوول عنده ضمير

لو أى واحد منهم بنى آدم ... ماكانش كل يوم تحصل لنا كوارث بالشكل دا ويضيع بسببها أبرياء

والألم بيبقى اكبر و أكبر لما يكونو أطفال صغيرين

ربنا يرحمهم ويجعل مثواهم الجنة ... ويصبر أهاليهم

و ربنا ياخد اللى كان السبب بداية من أصغر واحد لحد اكبر واحد فى منظومة الفساد اللى بقينا عايشين فيها

4 comments:

نبيل سامي said...

الفساد والاهمال والتطنيش وعدم اللامبالاة وموت الضمير وقلة الذوق وفساد النيه ليست في مصر فقط وانما في كافة انحاء الوطن العربي

تحياتي

baby said...

بلد بايظه من كل حاجه مفهاش نظام ولا اخلاق ولا ضمير ... دى غلطه كل مسئول سمح لنفسه بالاهمال فى حقوق البشر واستحل لنفسه اى شىء على حساب غيرة... ربنا يرحمناااااا

مؤنس فرحان said...

أهلا نبيل

فعلا كلامك مظبوط .. لكن للدقة حانقول ان اى ظروف خالية من الرقابة والثواب والعقاب الرادع لكل مهمل أو مستهتر .. حانلاقى فيها البلاوى دى

شكرا على زيارتك .. نورت المدونة

مؤنس فرحان said...

أهلا بيبى

عليكي نور .. مافيهاش نظام .. هو النظام .. و أقصد الحكومة .. لما الحكومة بتكون فاسدة كل اللى تحتيها بيفسد .. احنا وصلنا لمرحلة السرقة والنهب والرشوة عيني عينك بكل بجاحة و كأن دا حق أصيل ليهم

فكل واحد موش مهتم بإلتزامات منصبه وواجباته .. فبالتالى بيحصل العك اللى البلد فيه دا

ربنا معانا

شكرا يا بيبى على زيارتك
نورتينا