Sunday, July 11, 2010

رغى ... رغى

مممممممممممم
أولا : موضوع الحكماء من الجانبين ... كل ماتحصل مشكلة بين طرفين تبتدى تظهر الجملة دى ويبتدى البحث عن الحكماء من الجانبين اللى حيقعدو مع بعض ويصالحو الناس ويروقو الجو خالص
القضاة والمحاميين
المصريين والجزائريين
مشاكل الصعيد و على رأسها مواضيع الفتنة الطائفية ... المسلمين والمسيحيين

طيب لما هو فيه حكماء ... ليه مابيطلعوش الا بعد ماتحصل الكوارث ...؟؟
ليه لما هما حكماء مابيسعوش ومابيخططوش من الأول بشكل سليم عشان ماتحصلش المشاكل أصلا
أكيد عندهم حكمة فى كده ... :D
----------------------------------------------------------------
أنا مؤمن بشكل قاطع ان مفيش حاجة اسمها سلام مع إسرائيل ... الموضوع كله مجرد لعبة القط والفار مابيننا ومابينهم لحد ماييجي الوقت ونكسرهم بشكل نهائى ... لأن المشكلة معاهم مالهاش حل ... حلها انهم يمشو من هنا ... كل واحد منهم يرجع بلده ... ودا طبعا موش حايحصل
----------------------------------------------------------------
الأحزاب المصرية ... بلا وكسة ... شوية طراطير ولا ليهم أى لازمة
كلهم تحس ان الحزب الوطنى ماسك لهم ذلة
-----------------------------------------------------------------
إيه موضوع الأفارقة اللى كل يوم بيحاولو يتسللو لإسرائيل عن طريق حدودنا ...؟؟
كل يومين مسكو تلاتة ... قتلو اربعة ... هو الموضوع دا كان بيحصل من زمان بس ماحدش كان واخد باله او بيتم التعتيم عليه ... ولا هو فى سبب ... انهم كترو اوى فى اخر كام سنة بشكل مريب
-----------------------------------------------------------------


المطالب السبعة للجمعية الوطنية للتغيير
1- إنهاء حالة الطوارئ.
2- تمكين القضاء المصري من الإشراف الكامل على العملية الانتخابية برمتها।
3- الرقابة على الانتخابات من قِبل منظمات المجتمع المدني المحلي والدولي.
4- توفير فرص متكافئة في وسائل الإعلام لجميع المرشحين، وخاصة في الانتخابات الرئاسية.
5- تمكين المصريين في الخارج من ممارسة حقهم في التصويت بالسفارات والقنصليات المصرية.
6- كفالة حق الترشح في الانتخابات الرئاسية دون قيود تعسفية؛ اتساقًا مع التزامات مصر طبقًا للاتفاقية الدولية للحقوق السياسية والمدنية، وقصر حق الترشح للرئاسة على فترتين.
7- الانتخابات عن طريق الرقم القومي، ويستلزم تحقيق بعض تلك الإجراءات والضمانات تعديل المواد 76 و77 و88 من الدستور في أقرب وقت ممكن.

الجمعية الوطنية للتغيير


ردود الحكومة على المطالب السبعة للجمعية الوطنية للتغيير

طبعا مستحيل ننهى حالة الطوارئ لأن كده البلد حاتعمها الفوضى وماتنسوش ان قانون الطوارئ هو اللى بيحمى البلد من الارهابيين والمخدرات ( زى خالد سعيد وعمال المصانع اللى بيتظاهرو عشان حقوقهم والمتظاهرين ضد الفساد) ...

كله فى صالح مصر و شعبها

طبعا مرفوض تمكين القضاء من الاشراف على الانتخابات ... القضاء ليه هيبته ايه اللى حايخللى القضاة ينزلو للصناديق ... ثم منين نجيب قاضى لكل صندوق ( عشان التزوير يبقى براحتنا وكويس اننا لاهيناهم فى مشكلتهم مع المحاميين ) ...

كله فى صالح مصر و شعبها

مفيش حاجة اسمها رقابة خارجية على الانتخابات المصرية ... لأنها شأن داخلى ( احنا ناقصين فضايح قصاد العالم ) ...

كله فى صالح مصر و شعبها

عايزيننا نشغل الناس عن متابعة المسلسلات وماتشات الكورة ببرنامج كل مرشح للرئاسة وخطته للبلد ايه والسياسة والاقتصاد والتعليم ( احنا ناقصين قرف ونتعب نفسنا ونفكر ونخطط كفاية عليهم ... فكر جديد - من أجلك انت ) ... كله فى صالح مصر و شعبها

والله لما ييجو يعيشو فى مصر يبقو يختارو رئيسهم ( التصويت اللى من برة دا موش حانعرف نلعب فيه ) ... كله فى صالح مصر و شعبها

عشان كل من هب و دب يقول لك انا عايز ابقا رئيس جمهورية ( و جيمي حبيبنا يرشح نفسه فى مدغشقر يعنى ولا ايه ...؟؟؟ ) ... كله فى صالح مصر و شعبها

لا رقم قومى ولا بطاقة انتخابية ايه رأيكو بقى ...؟؟؟ احنا عارفين مصلحتكم أكتر منكم ... كل واحد يخليه فى بيته واحنا حانختار له الأنسب والأصلح له ... كله فى صالح مصر و شعبها

6 comments:

Tears said...

جايز كلامى مالوش علاقه مباشرة بالمكتوب بس لو دققت ح تلاقى ان هو نفس الشىء

شوف فيلم عسل اسود ح تعرف ان مافيش فايدة

بجد متلمكنى شعور باليأس

سمراء said...

فرق تسد

الكلاب تعوي والقافلة تسير

إنها جمل مأثورة

أما عن المثل الشعبي فيقول

ياواخد السمنة من كتف النملة حرمت عليك التقلية

اهو اللي نعرفة احسن من اللي منعرفوش

وانا واخويا على ابن عمي وانا وابن عمي على الغريب

رتب الجمل وهتعرف ان دي ثقافة شعب وحكام من قديم الازل

اشكرك على الزيارة
سمراء

مؤنس فرحان said...

تيرز

بصى هو اليأس مفيش منه فايدة .. اليائس هو لوحده اللى تعبان .. لكن الأمل بيخلى عند الواحد دافع انه يكمل خطوة كمان فى انتظار اللى جاى لأنه فى علم الغيب

موش حانقول ان مصر كلها سيئة وان التمانين مليون كلهم وحشين
لكن حانقول فى ناس كويسين بيحبو بعض وبالتالى بيحبو مصر .. ناقص انهم ياخدو فرصة ويثبتو دا وانهم يأثروا على صنع القرار فى مصر

وعشان دا يحصل لازم عددهم يكتر ويبقو أقوى ويوعو اللى حواليهم
مفيش حاجة حاتحصل واحنا قاعدين .. لازم نشتغل
كل واحد فى مكانه وبإللى يقدر عليه .. حتى لو حس ان اللى بيعمله دا تأثيره قليل خالص او موش حيعمل حاجة

نورتى المدونة يا تيرز

مؤنس فرحان said...

العزيزة سمراء

أنا من أشد المعجبين ياليهود .. برغم تاريخهم المنيل فى العالم كله .. لكن بيعجبنى فيهم تخطيطهم للمدى البعيد .. البعيد أوىى .. وبيعجبنى فيهم ذكاءهم او نسميه مكرهم او لؤمهم العالى جداا .. بإنهم بحركات صغيرة أوى ممكن يعملو تغيير وتأثير كبير أوى بس بيظهر مع مرور الوقت

-------------------------
ثقافة الشعوب ممكن تتغير .. طبعا حاتقوليلى يا مين يعيش و يحينا ويحييك ربنا

دى نقطة تانية .. كل الناس اللى نفسها مصر تتغير للأحسن وان الناس أوضاعها تتحسن .. عايزين دا يحصل بسرعة .. دلوقتى .. واحنا اللى نشوفه ونحس بيه

لما بقولك انى معجب باليهود ... اليهود ممكن يخططو لحاجة حاتكون فى مصلحة أحفادهم أو أحفاد أحفادهم كمان بعد 500 سنة

ماهو مفيش حل غير انى اعمل اللى عليا حتى لو كان بسيط جدا .. كل تغيير للأحسن فى نفسى وفى غيرى هو بداية للتغيير الكبير

عندك حل تانى ..؟؟
يعنى نيأس زى مابتقول تيرز ..؟؟
ولما نيأس بردو موش حل .. نروح فين .. نسيب لهم البلد ونمشى .. ونسيب العصابة دى تبرطع فيها .. دا كده يبقى بنحقق لهم حلمهم ومناهم

عارفة الكيرف بتاع الساين ..؟؟

SIN CURVE

لو مالكيش فى الرياضة هو كيرف ماشى بالعرض عبارة عن قمة تليها قاع تليها قمة تليها قاع
زى اللى فى الصورة دى
http://www.reviewsheetscentral.com/rs/11/mathb/image025.jpg

اقصد بكده ان كل قاع او كل هبوط او كل نكسة او وكسة لازم بعدها انفراجة وصعود وعلو .. وحنرجع تانى للهبوط .. دا حال الدنيا والدوام لله وحده .. مفيش شئ ثابت على حاله

و أكيد إن شاءالله الصعود قادم

نورتينا

Sharm said...

الافارقة دول بيدخلولنا ازاي اصلا ؟؟

مؤنس فرحان said...

غالبا بيدخلو عندنا سياحة .. وبعد كده بيحاولو يهربو على اسرائيل من الحدود

هما يهود أفارقة .. وظروف مجتمعاتهم فى الحضيض .. وإسرائيل بالنسبالهم حلم .. رغم التفرقة العنصرية الشديدة اللى بيقابلوها فى اسرائيل و إللى أساسا بدأت ترفض تديهم تأشيرات دخول لأراضيها و دا اللى دفعهم لمحاولة التسلل عن طريق مصر

تساؤلى أنا هو عن سبب زيادة الموضوع دا فى الفترة الأخيرة بشكل كبير أوى

هل الحدود الأول كانت سداح مداح واللى يعدى يعدى ماحدش واخد باله ولا حاسس بحاجة ... ودلوقتى عشان المشاكل والقلق بسبب المعابر مع حماس وغزة بقى فى تشديد أكثر فابتدينا نحس بالموضوع دا

ولا فى سبب تانى ..؟؟

شكرا يا شارم على زيارتك .. نورت