الرئيس مبارك عمل عمليته فى المانيا
البابا شنودة كل علاجه فى أمريكا
جمال مبارك مراته وقت الولادة راحو على انجلترا
شيخ الأزهر عمل العملية فى فرنسا
وغيرهم وغيرهم ... كل الوزرا والناس الكبار علاجهم دايما فى الخارج ... عملياتهم مهما كانت بسيطة فى الخارج
هل للدرجة دى فقدو الثقة فى الطب فى مصر ...؟؟؟
هما يا ترى متأكدين أوى ان النواحى الطبية فى مصر سيئة للدرجادى وكله ساكت على أساس انهم بيقدرو يسافرو برة
لكن بقية الشعب ... يولع
طبعا أنا موش بتكلم عن المستشفيات الحكومية .... لأن المستشفيات دى بالعاملين فيها .... ماينفعوش يوصلو لدرجة بنى أدمين أصلا
واللى حظه التعس وداه فى يوم لمستشفى حكومى أكيد عارف وشاف بنفسه
لكن اللى اقصده ان فى مستشفيات خاصة ... اينعم أسعارها ولعة ونار ... لكن بالنسبة للناس دى فعلاجهم على نفقة الدولة أو الشعب
لكن حتى المستشفيات الخاصة بردو فاقدين الثقة فيها
طيب موش الأحسن بدل مانصرف فلوس الدولة على العلاج على نفقة الدولة برة مصر ... اننا نصلح منظومة الطب والعلاج فى مصر بدءا من الأطباء والتمريض والامكانيات والخدمات ...؟؟؟
موش عارف ... دى حاجة من ضمن الحاجات
هى بلدنا سيئة للدرجادى .... ؟؟؟
3 comments:
اديك قلت ...حاجة من ضمن الحاجات ...يعنى هم كتير فيصلحوا ايه و لا ايه ..بدل ما يحتاروا يسيبوها على حالها
حاجة كمان هم ماعندهومش ثقة فى الشعب و امكانياتة لانهم مابيعملوش حاجة للشعب عشان يشكرهم عليها و الشعب مابيثقش فيهم فبالتالى مافيش تبادل ثقة بين الطرفين
و اكيد اكيد البرسيتج داخل فى الموضوع :))))))))))
ده اعتراف منهم بفشل النظام
هوا الموضوع مش انهم فقدوا الثقة فى الطب فى مصر
ولا ان النواحى الطبية سيئة فى مصر
انما موضوع العلاج مش على نفقة الدولة
على جيبك الخاص علشان محدش يفهم غلط
ودى حاجة عمله زى العربيات مثلا ليه تركب 128 فيات مثلا
وانت قادر تركب هامر اتش ثرى
ليه تتعالج فى مصر لما ممكن تتعالج فى الخارج
وبعدين لما الشعب كله يكون بيساهم فى العلاج ده انت بقى مضايق ليه ام حاجة غريبة صحيح
ومنظومة ايه اللى انت عايز تصلحها هوا فى منظومة اصلا قصدى هوا فى منظومة اصلا حد اشتكى منها
Post a Comment