مفيش فايدة ... كل ما أقول موش حتكلم فى السياسة ... كفاية إكتئاب ... أتكلم فى أى حاجة تانية تفرفش الواحد شوية
مفيش فايدة ... أرجع تانى
أسعار الطماطم والخضار والفاكهة اللى وصلت لحد فظيع ... بتجبرنى أتكلم فى السياسة
زحمة المواصلات فوق و تحت (أقصد المترو) اللى بتزيد كل يوم عن التانى ... بتجبرنى أتكلم فى السياسة
كم الحوادث الرهيب اللى أصبح كل يوم وفيات واصابات بسبب سوء حالة الطرق والمرور ... بتجبرنى أتكلم فى السياسة
الأخبار فى الجرايد والتليفزيون ... تحرق الدم ... حركة متخلفة تم استخدام فيها جوز (كلمة موش كويسة – كل واحد و خياله) عشان يقتلو جريدة الدستور وينهو مشوار ابراهيم عيسى الصحفى
مفيش فايدة ... لو فكرت أتكلم فى الكورة والرياضة ... و وكسة المنتخب من يومين وادارة الاتحاد وخناقهم على منصب رئيس الاتحاد ... (اللى المفروض انه منصب تطوعى بدون أجر – أومال بيقتلو بعض عليه ليه ..؟؟) ... الأخبار دى بردو بتجبرنى أتكلم فى السياسة
أنا عايز أستخبا فى حتة ... أهرب ... فى مكان مافيهوش لا تليفزيون ولا جرايد ولا زحمة مواصلات ولا أسعار مجنونة ولا راديو
ولا حتى ناس ... عشان ماحدش يتكلم فى المواضيع دى ولا يفكرنى بيها
ححاول أقاوم و ماأتكلمش فى السياسة خالص ... حتكلم فى الفن
الفن (لوحة زهرة الخشخاش والفساد والاهمال فى وزارة الثقافة اللى له عقود من الزمن ومات بسببه ناس فى حريق مسرح بنى سويف وآثار اتسرقت واتهربت برة مصر بملايين) مفيش فايدة
حتكلم فى الأفلام والمسلسلات والأغانى ... النوعية دى من الفنون بتوضح الذوق العام للناس والمجتمع (يادى النيلة) ولما يكون الذوق دا هابط او فيه مشكلة يبقى فى مشكلة فى التعليم والثقافة وقصور فى التربية والمؤسسات الدينية (يييييييييه)
أنا قلت مفيش فايدة
انا حتكلم عن الحب
حلوة أوى الكلمة دى كمعنى عام ... وبتثير فينا خيال واحاسيس مرهفة وشعور بالأمان و أحلام و أمانى
لكن ... متهيألى ان الكلمة دى بتكون نتاج كل اللى فات ... يعنى لازم يبقى فى مجتمع سوى تعليم وتربية وتوجيه وعمل ونظام عشان الكلمة دى يبقالها معنى ... و متوفر لها ظروف صحية عشان تنمو وتتواجد
بجد مفيش فايدة
8 comments:
معاك حق يا مؤنس فى كل اللى قلته
النظام ده جاب لنا اكتئاب
ربنا قادر ياخدهم عشان احنا مش قادرين و لا عندنا حد جدع يقدر زى زمان
الله يرحم الضباط الاحرار و المناضلين
٩٠% من مشاكل البلد سببها الزيادة السكانية والرغبة في الإنجاب
تعداد مصر سنة ١٩٨٠ كان ٤٠ مليون
يعني خلال ٣٠ سنة حجم البلد تضاعف
أو ممكن تقول إن البلد بقت بلدين في بعض
الشعب لمصري هو المسئول الأول عن أوضاعه المعيشية ووضع البلد، مش السياسة أو الحكومة إللي مسئولة
بقولك ايه
انا مفرووووووسة لوحدى
و مش عاوزة اتفرس زيادة
بص انا حروح تشيلي
تيجي معايا؟؟
اهو هناك بياخدوا بالهم من الناس
و بيقعدوا 69 يفكروا ينقذوا الناس من غير اي خساير فى الارواح
و نجحوا بفضل الله
انا بفكر آخد الجنسية التشيلي دبه
تعالى معايا و نكسر زير ورانا
السياسة انها تتبعك كظلك
تيرز
ربنا يبدلهم بإللى احسن منهم
بس مرة كنت سمعت تحليل لتاريخ مصر فى النضال .. لازم يكون فى قائد شخص او زعيم يلتف حواليه الناس ويصدقوه ويؤمنو بيه
ولحد مانلاقى واحد زى كده ربنا معانا
Anonymous
يعنى ايه زيادة سكانية ...؟؟
يعنى ان عدد السكان يفوق موارد وامكانيات البلد القادرة على توفير عيشة كريمة لمواطنيها
فيحصل عندهم أزمة
طيب سؤال .. ليه بلاد تانية تعدادها أكتر مننا بكتير ومساحتهم الجغرافية ومواردهم الطبيعية أقل مننا بكتير لكن متقدمين فى مجالات كتير ومتفوقين علينا بكتيير أوى زى ماليزيا .. ماليزيا كثافتها السكانية أكتر مننا والكثافة يعنى تعداد السكان مقسوم على مساحة الأرض
فيطلع لك المفروض يبقى عندك كام شخص فى كل كيلومتر مربع
و اندونيسيا نفس النظام
و ألمانيا دلوقتى وصلو 82 مليون نسمة تقريبا
وكتيير غيرهم
يعنى الموضوع هو إدارة بتعرف توفق بين امكانياتها ومواردها بالتخطيط السليم والتنظيم للمستقبل واستغلال كل مواردها
شئ كمان .. حتى لو قلنا ان المشكلة فى الناس .. هو مين اللى وصلهم لكده ..؟؟
ثقافة الانجاب اللى عمال على بطال.. موش كل دا سببه جهل وبطالة وسوء تخطيط فى التعليم بالأساس
البلد فيها كوادر كويسة كتير فى كل المجالات .. لكن اختيار الشخص المناسب فى المكان المناسب موش موجود عندنا
لكن موجود عندنا مصالح متبادلة ومشتركة وفساد ورشاوى وتملق ونفاق
دى الامكانيات اللى بيحددو بيها الشخص المناسب للمكان المناسب
مفرووسة
فكرة تشيلى حلوة
وفى غيرها بلاد كتير الناس فيها بتهتم ببعضيها... ببعضيها ... ببعضيها
لأن الحكومة هى فى الآخر المفروض انها من الناس ومن البلد دى
موش عارف ليه عندنا الحكومة حاسس انها عاملة زى الاحتلال الانجليزى هما مستوى والشعب مستوى تانى موش مهم عندهم ولا فارق معاهم فى اى حاجة
مجرد طبقة بتخددم عليهم .. لازم حد يقوم بـ دور الشعب
فى الإمارات بيحترمو بعض
فى اليابان بيحترمو بعض
فى أى مكان فيه ناس بتفكر مجرد بس انها بتفكر .. حاتلاقيهم بيحترمو بعض
رشا
فعلا السياسة هى انعكاس لحياتنا .. مستحيل نهرب منها
Post a Comment