Sunday, June 27, 2010

تلاميذ أحمد سعيد


أول امبارح كنت راكب مترو الأنفاق .... وشوفت ست قاعدة جانبى وماسكة جريدة الأهرام وبتقرا فيها
استغربت جداااا
موش لأن الستات مابتعرفش تقرا
ولا لأن ممنوع قراءة الجرايد فى المترو
لكن انا بقيت بأستغرب جدااا جدااا جداااا لما ألاقى حد بيشترى الأهرام او الاخبار او الجمهورية او اى جريدة حكومية
او من اللى بيتابع الاعلام الحكومى ويصدقه
---------------------------------
عارفين انتم عساكر الأمن المركزى .... الناس الغلابة دى اللى كلهم أميين ومايعرفش هو رايح فين ولا جاى يعمل ايه بالظبط وولاعمره سمع عن أى حاجة فى الدنيا و كلهم جايبينهم من قرى و نجوع مفيش فيها أدنى مستوى من البنية التحتية

وكتير من الناس بتتريق عليهم ويقولو عليهم بهايم .... ودا ظلم كبير ليهم لأن الذنب موش ذنبهم .... الذنب فى النظام اللى وصلهم للمستوى دا وخلاهم كده .... لأنه عايزهم كده وبيستفيد بيهم كده
---------------------------------
أرجع تانى للإعلام الحكومى ... بقيت معتقد ان الاعلام الحكومى هو معمول وموجه لعساكر الأمن المركزى او من على شاكلتهم من حيث مستوى الوعى بإللى حواليهم

أكثر من قناة تليفزيونية عالمية وعربية و عدد كبير من الصحف العالمية والمصرية المستقلة غطت زيارة الدكتور البرادعى للاسكندرية الجمعة اللى فاتت و زيارته وتضامنه مع اسرة الشاب خالد سعيد
وبعد كده تنظيم اعتصام سلمى انضم ليه أسامة الغزالى حرب وأيمن نور وجورج اسحاق و غيرهم كتير
والعدد زاد عن اربع الاف شخص فى الاعتصام وطبعا كان فى جيش من الأمن المركزى محاوطهم عشان يمنع ان العدد يزيد

مصدر_1
مصدر_2
مصدر_3
مصدر_4

نشوف بقى الصحف الحكومية قالت ايه عالخبر دا
زى ماحنا شايفين فى الصورة .... جريدة المسا غطت الخبر بكل حيادية
:D
نضغط كليكة ماوس عالصورة عشان تكبر و نقرا الخبر
---------------------------------------------------------------
احمد سعيد الاذاعى المصرى الشهير فى عهد عبد الناصر .... الناس اللى عاصرت النكسة أكيد تفتكر صوت احمد سعيد وهو بيقول اننا وقعنا تلاتين طيارة وتانى يوم وقعنا خمسين طيارة و ان قواتنا اسرت كام كتيبة .... و غير النكسة على طول عهد عبد الناصر كان اى شخص او جهة مختلفة او معارضة للنظام ... يطلقو عليهم احمد سعيد شتيمة وسخرية واخبار ملفقة واشاعات الخ

وقتها كان كل دا عن طريق الاذاعة بس ... كانت هى دى امكانيات العصر
دلوقتى تلاميذ احمد سعيد لسه على ولاءهم للنظام سواء بقى صحف او قنوات او اذاعات وبرامج

ربنا يستر عالبلد


2 comments:

Tears said...

ما عشان لسه فيه ناس بتصدقهم همه مستمرين

انا بيبقى نفسى اتصور مع اى حد بيقرأ جرايد الحكومة لانه بجد بالنسبة لى بيكون عجيب جدا وش عارفه بيفكر من اى زاويا بالضبط

مؤنس فرحان said...

أهلا تيرز

فعلا لسه فى ناس بتصدقهم .. وهما بيسعو ان الناس دى تبقى كتير

بيحاولو (يربو) شعب أليف مستأنس يسمع ويقول آمين ومهما تضربى فيه وتحرميه من الأكل ييجي ويلعق رجليكي

و للأسف هما ناجحين انهم يشغلو الناس طول الوقت بالسعى والجرى ورا حياة ربع كريمة .. وبالتالى مايبقاش عندهم فرصة للتفكير فى شئ تانى