Thursday, April 22, 2010

الشحاتين بيشوهو صورة مصر و إحنا موش معاهم

 

الشحاتين بيشوهو صورة مصر و إحنا معاهم

 

إمبارح كنت فى مطار القاهرة منتظر وصول عمتى

 

ونا رايح المطار ركبت التاكسى الأبيض الجديد أبو عداد  .. انا من أكتر الناس اللى فرحو بالتاكسى الجديد دا .. عشان بأستريح فى الحساب

 

لكن الطبع يغلب التطبع .. مفيش فايدة .. زى ماكنا بنقول قبل كده عالتاكسى الاسود العادى انهم موش بيقدرو المشوار يتكلف كام .. لكن بيقدرو الزبون ممكن يدفع لحد كام  .. فحتى ابو عداد بردو بيعملو الحركات دى ..  لغاية ماوصلت المطار العداد عمل 15 جنيه ونص قمت طلعت 16 جنيه  ناولتهم له وبنزل من التاكسى .. لقيته بيقوللى يا باشمهندس .. لوهلة قلت فى نفسى معقولة حيرجع لى النص جنيه ..؟؟ لقيته بيقوللى بنبرة لوم انت كده بالظبط يعنى دانا حرجع فاضى وانت شايف المشوار .. قلت فى نفسى ( مفيش فايدة الشحات بيفضل شحات طول عمره ) مهما يحاولو ينضفوهم وتاكسيات جديدة وبدل مايشتغلو بكرامة .. بردو طبع التسول ( والاستقطاع ) فيهم

 

مفيش فايدة طبعا .. المهم ماعبرتهوش ونزلت  .. بعد ساعتين بيتكرر المشهد بس طالع من المطار انا وعمتى وبحاول اوقف تاكسى بردو من الابيض ابو عداد .. وقفت أول واحد بأقول له مصر الجديدة الميريلاند فقاللى تدفع كام .. قلت له كام ايه ..؟؟ موش حسب العداد ..؟؟ قاللى لأ من هنا مفيش عداد .. قلت له كام يعنى .. قاللى 60 جنيه

على هذا المنوال لمدة نص ساعة المشوار اللى انا جيته بـ 15 هما عايزين فيه 60 و 55  كلهم متفقين على نفس السعر وان من المطار مفيش عداد لكن بالمقاولة

 

 

جوا البلد بقى مفيش مرة يطلع العداد بـ 7 او 8 او 9 وتديله 10 جنيه ويرجع لك باقى .. هما طول الوقت مفيش معاهم فكة فإما تكون ماشى بفكة او تسيب الباقى

 

وهكذا .. موش عارف ليه الإصرار على تشويه الصورة الحلوة .. بدل مانبدل التاكسيات عايزين نبدل  مفاهيم الناس وأخلاقهم ..

انا ماروحتش لبنان قبل كده .. لكن كل اللى راح بيرجع يشكر فى الأدب والذوق المتناهى فى التعامل مع الأجانب والأغراب عن البلد تحديدا

وبالعكس الصورة المعروفة عن مصر وخاصة لكل الأشقاء العرب انه من ساعة مايدخلو مصر من المطار من أول سواق التاكسى .. فكل واحد بيحاول يستغلك على قد مايقدر بشتى الصور وبكل أنواع الشحاتة والنصب

 

كل يوم بأركب الـ C.T.A   من التحرير لمصر الجديدة .. حفظت شكل الشحاتين .. ممثلين بارعين جدا و أداءهم ثابت على مدى سنتين تقريبا هما هما بنفس كلامهم وطريقتهم

كل سنة مع موسم الصيف يبتدى موسم الشحاتين .. والشحاتة أنواع و أشكال

 إضافة :

كل نظام حكم فى العالم له مساوئ وله مزايا .. ونظام الحكم الحالى فى مصر بردو له مميزات وله مساوئ .. وأكبر مساوئه انه جعل الشعب يتمنى التغيير  و خلاص .. أى حد غير الناس دى .. أى حد .. لو اللمبى رشح نفسه  حايلاقى مؤيدين ..

 

أيمن نور .. عمرو موسى .. محمد البرادعى .. إلخ

 

الناس كلها عندها فكرة ان اى شخص واى حكومة تانية أكيد أكيد أفضل من اللى موجود لأن مفيش أسوأ من كده

 الإضافة الأخيرة تابعة لنفس عنوان البوست 

4 comments:

Mafrousa said...

بزمتك بعد كل ده
ما اتفرستش؟؟؟؟؟
اهي هيه ديه الحاجات اللى تفرس

بس عاوزة اقولك لبنان بلد جميله
انا رحتها
و الزوق كله فى شعبها انا معاك
و ناس رايقة
و بيحبوا الضحك و مش بيحبوا يشيلوا هم
بس الفكرة بقا انت بتشوفها كده لما يكون فيه ناس مستنياك...و تنقلاتك عليهم
بس بقا لو جيت تركب تاكسي لوحدك
حتلاقى 100 لبناني يقولولك اركب المشروع
مش تاكسي خاص
لان التاكسيات الخاصة
بتسفح الناس برده كده
و يا سلام لو عرف انك مش لبناني
ولا عداد ولا نيلة و لو مش عاجبك بقلة ادب يقولك انزل

اما المشروع ده بقا
اللى هو تاكسي بالنفر عندنا
يظهر و الله اعلم ان الفساد و قلة الزوق سادت العالم كله

بس ارجع و اقولك احنا مالناش زى خااالص
احنا نفرس نفرس يعنى بجد
مع ان ديننا مش بيحثنا على هذا
و مع ان اغلب الناس منظر بس متدينين
ربك يلطف بينا
تحياتي

مؤنس فرحان said...

اهلا يا مفروسة منورة

بلاش تفرسى نفسك كتير عشان الضغط والسكر .. احنا بلد تجيب لأهلها المرض
------------

الموضوع عبارة عن دايرة مغلقة حكومة وشعب .. شعب عايز حكومة كويسة والحكومة الكويسة موش حاتيجي الا من شعب كويس .. لا جدال

الحكومة دى مننا موش مستوردة من تايوان

فحنرجع للنقطة الأولى .. ان كل واحد يبدأ بنفسه وبأولاده وبإللى حواليه

الإصلاح يبدأ من كده

أع ـقل مـ ج ـنـونــة said...

الشحاتين اتعودو ع الشحاتة وشايفينها حق مكتسب

محتاجين ازالة عقول وزرع بطيخ مكانها

او العكس .. مش فارق O_o

الاضافة الاخيرة بئة .. لسة كنت بتكلم مع بعض زمايلي بخصوص النقطة دي

من كتر ما احنا كمان بقينا " بنشحت التغيير" مش بنفكر مين اللي هايغيرنا وازاى !

تقبل مروري واتمني التواصل دائما

مؤنس فرحان said...

أهلا بيكي أعقل مجنونة

عجبنى تعليق بنشحت التغيير .. فعلا الشحات العادى موش بيهمه بياخد من مين او بياخد ايه
الشحات البجح هو اللى ممكن يفكر فى الحاجات دى


يارب نبقى شحاتين بجحين .. احسن من مفيش

--------------------------

نورتى المدونة وعالم التدوين كله