Sunday, March 15, 2009

مجرد كتاب

كتب كتير أوى اتجمعت عندى
حاجات اشتريتها من معرض الكتاب ولسه ماقريتهاش .. كتب اليكترونية عمال بجمع فيها انا ومجموعة من اصدقائى قربت على 30 جيجا تقريبا

كتب كتب كتب فى كل المجالات تقريبا .. وموش لاقى وقت خالص أقرا اى حاجة .. كل فترة بأختلس فترات اقرا فيها كتاب ومابحبش ابدأ فى كتاب من غير ما انهيه

البشر ...كل واحد منهم كتاب مختلف عن التانى ... سواء فى الجلاد او التغليف او الصورة اللى برة او اسم المؤلف او المحتوى
لما فكرت فى موضوع تشبيه البشر بالكتب لقيت ان
شكل الكتاب من برة هو مماثل لشكل البنى آدم يعنى ممكن يكون كتاب شكله فخم .. او جلدته مقطعة .. ممكن يكون حجمه كبير .. او صغير .. ممكن يكون ملون وعليه رسومات وممكن يكون ابيض واسود ومفيش فيه اى بهرجة خالص ... كمان الكتاب الجديد ممكن يجرح بكل سهولة لان حواف اوراقه بتكون حادة وقاسية والكتاب القديم بتكون أوراقه لينة او مهترئة حسب عمره(هل بتكون عنده خبرة ومعرفة انه مايقسوش على قراءه ومتصفحيه .. بعكس الكتاب الجديد معدوم الخبرة فى التعامل مع البشر)
اما بالنسبة للمؤلف .. فالمؤلف هو بمثابة الأصل .. المصدر .. الأب و الأم
المؤلف هو (الكل) اللى بيعطينا (جزء) منه
كمان حجم الكتاب .. هل هو ثابت ..؟؟؟
معظم الكتب حجمها ثابت .. قليل منها حجمها بيكبر مع الزمن .. زى اليوميات والمذكرات وبعض معاجم المصطلحات
يمكن موضوع ارتباطى بالكتب من صغرى هو اللى خلانى اربط بين البشر والكتب .. طبعا مجرد تشبيه قاصر لكن بستريح له
ساعات بأشترى كتاب بالشئ الفلانى لمجرد اسم مؤلفه .. وبعد كده أندم انى اشتريته
وساعات بأشترى كتاب بالصدفة .. و يفضل مركون (مركون : أى موضوع فى ركن ما) قدامى فترات طوييييلة ومفيش عندى أى شغف انى افتحه وأقراه .. ولما يحصل .. أندم بردو انى إتأخرت كل دا فى قراءته

فى كتب عمرى ما أنساها أبدا .. وكتب كل ما أقراها أشعر بشعور أول مرة قريتها من المتعة والفايدة (شعور زى النور اللى بينور جواك فجأة)
وكتب تانية بكملها بالعافية وبحس انها تقيلة على قلبى اوى .. ومرة وحيدة مقدرتش اكمل كتاب ورميته من غير مااكمله

فى كتاب ونا شايله فى ايدي الناس تنظر لك بإستهزاء او سخرية .. وكتاب تانى بينظروا لك بإكبار واحترام .. وكتاب تانى بيخوفهم منك

انا اتعلمت ومؤمن ان الغريب غبى .. بمعنى بما انى غريب عنك فأكيد حكون بالنسبالك غبى فى حاجات كتير والعكس بالعكس
اتعلمت انى مااستغربش حاجة مهما كانت من غير ماأتأكد انى عرفت كل خلفياتها وجوانبها

لما بأقابل شخص جديد .. مثلا زميل جديد فى الشغل .. طبيعى ان جهاز التصنيف والتنميط جوايا بيشتغل ويحددله (Category) خاص بيه

بس بقيت بأحتفظ بأفكارى وارائى دى جوايا موش بظهرها ابدا لحد ما اقراه كله .. اقصد اتعرف عليه اكتر من التعامل معاه

ادعولى اقدر الاقى وقت اقرا الكتب اللى عندى .. و أنا آسف عالفترة اللى فاتت واللى جايا كمان لان الظروف هى هى .. بس ان شاءالله على قد مااقدر ححاول اتابع جو المدونات من تانى لان كل مدونة عبارة عن كتاب بردو
دا إيميلى .. سواء عالماسنجر او الفيس بوك عشان تتعرفو بالكابتن حنتيرة
samerawy@hotmail.com

5 comments:

JuSt_hUmAn said...

حمد الله ع السلامة يا ريّس
مش عارف حاسس فكرة تشبيه الإنسان بالكتاب فكرة نمطية شوية، أي نعم فيه شوية أوجه للشبه، بس في رأيي لو دورنا على أوجه للشبه بين أي شيئين هنلاقي برضو!
بعدين الكتاب أنت اتختاره حسب اسمه (اللّي المفروض بيعبّر عنّ) ونوعه، فين حين إن البشر مالهمش اسم يعبّر عنّهم، ومالهمش نوع معين، بمعنى ما تقدرش تقول دا إنسان شعري أو تاريخي أو كدا.
بعدين تشبيه الإنسان بالكتاب بيهمل الناحية الإنسانية، فيه إنسان لو قيمته بالشكل دا هتلاقيه كتاب أي كلام ولا يستحق إنك تشوف خلقته من أصلاً، لكن عشان الجانب الإنساني والعواطف والكلام دا أنت بتحبه جداً.
المهم يا سيدي وكل سنة وأنت طيّب، ربّنا يديك ويرضيك (f)

سمراء said...

الفرق ان لما ترجع تقرا الكتاب هتلاقي اللي مكتوب هو هو يمكن تفهمة بطريقة مختلفة لانك اكيد هتكون اتغيرت فيك حاجات
لكن الناس المكتوب جوها بيتغير لما ترجع تقرا الناس هتشوفهم بطريقة مختلفة علشان هم وانت اكيد هتكون فيكوا حاجات اتغيرت

سمراء

مؤنس فرحان said...

عمروو
وانت طيب وبالف صحة وسلامة يارب .. ايييييه كبرنا خلاص وبدأنا فى العقد الرابع
--------

موضوع تشبيه الكتاب بالانسان تشبيه قاصر زى ماقلت .. لان النواحى الانسانية معقدة أكتر لكن الفكرة ان الكتاب هو جزء من انسان ما وهو المؤلف .. جزء صغير اوى .. حتة منه
......
شكرا يا عمرو على ردك ومتابعتك
الهى يكرمك ويرزقك ببنت الحلال ياخويا

مؤنس فرحان said...

سمراء
نورتى المدونة كالعادة
----------
كلامك بيوضح اهمية ربط الكتاب بتاريخ اصداره .. ان فلان الفلانى كتب الكتاب الفلانى فى التاريخ الفلانى .. ودا بيظهر لنا فى الفترة دى جزء من فلان دا بخبراته ومشاعره وافكاره فى المرحلة دى من عمره.. اللى أكيد بتتغير وتتبدل وتطور بعد مرور فترة زمنية
----------------------
شكرا على مرورك بالمدونة

Tadwina said...

مرحباً
لقد قام أحد المعجبين بمدونتك بإضافتها إلى تدوينة دوت كوم، بيت المدونات العربية.

قام فريق المحررين بمراجعة مدونتك و تصنيفها و تحرير بياناتها، حتى يتمكن زوار الموقع و محركات البحث من إيجادها و متابعتها.
يمكنك متابعة مدونتك على الرابط التالى:
http://www.tadwina.com/feed/694

يمكنك متابعة باقى مدونات تدوينة دوت كوم على الرابط التالى:
http://www.tadwina.com

لعمل أى تغييرات فى بيانات مدونتك أو لإقتراح مدونات أخرى لا تتردد فى الإتصال بنا من خلال الموقع.

و لكم جزيل الشكر،

فريق عمل تدوينة دوت كوم.
http://www.tadwina.com