Saturday, October 18, 2008

نون .. ظل الأفعى .. الأنثى

نون
ظل الأفعى
--------------
من فترة قريبة خلصت رواية نون لـ سحر الموجى
ساعة ماخلصتها بعت رسالة لواحد صاحبى كان دا نصها
I finished NooN
Sooooo Humantik
Sooooo Astrojinitek
Toutched my inside very deep
كنت حضرت قبل كده ندوة وكانت سحر الموجى هى اللى بتديرها بس وقتها ماكنتش لسه قريت نوون و شتان ما بين حالتى واهتمامى وقتها بالشخصية دى وحالى بعد ما قريت نوون
الرواية دسمة و ممتعة جدا واللى يقراها من غير ما يعرف مؤلفها ,, حيحس علطول انها مؤلفة أنثى فاهمة كويس اوى وبتعبر بشكل جميل جداا عن مشاعر الأنثى
الرواية اجتماعية بتتناول أكتر من جانب من جوانب حياتنا وخاصة الجوانب العاطفية منها ,, وبتوضح لنا أكتر من نقطة زى احتياج الحبيبة لشعور الأب والأمان فى حبيبها واحتياج الحبيب لشعور الأم والحنان والسند فى حبيبته شعور كل واحد منهم انه ملجأ للآخر وان الآخر ملجأ ليه
كمان نقطة الإستغراب من تغير شخصياتنا بمرور الزمن مع إختلاف المؤثرات والضغوط المختلفة
و شئ كمان هو مناقشة نقطة اننا لما بنكون فى حالة حب وتنتهى الحالة دى بأى شكل ونشعر بحنين للفترة دى ,, هل شعورنا دا للشخص أو الإنسان اللى كان مشاركنا الحالة دى ولا شوقنا دا للحالة نفسها بكل مشاعرها وافراحها والامها وجنانها وسعادتها بـغض النظر عن الشخوص او الانسان دا تحديدا
دى سطور من الرواية
( لا يمكنك أن تقترب من الورود و لا يجرحك شوكها ,, و إن لم تنزف تجمع الدم الفاسد فى شرايينك فسممها فمت )
( إرتجف صوتها ببحة دموع تتأهب للمجئ : كان لسه عندنا حاجات كتير نعملها مع بعض .. أفلام هنشوفها و كتب هنقراها و صناديق قديمة لينا قلنا هنفتحها و نشوف عقدنا و مشاكلنا ونبقى مع بعض و إحنا بنحلها .. كانت لسه دنيتنا واسعة )
---------------------------------------------------------------------------------------
من حسن حظى أو قدرى انى بعد ما خلصت رواية نون بدأت فى رواية ظل الأفعى لـ يوسف زيدان
يمكن كنت اتكلمت قبل كده عن الدكتور يوسف زيدان مؤلف رواية عزازيل
رواية ظل الأفعى بإختصار كده بتتكلم عن الأنثى فى الثقافة البشرية وعلوها ودنوها من زمان لزمان ومن مكان لمكان
يمكن جمعيات حقوق المرأة حتعجبهم أوى الرواية دى
أحداث الرواية بكاملها بتدور فى سبع ساعات تقريبا ,, يمكن فى ظلم شوية لشخصية الرجل او بمعنى أصح ماينفعش نعمم حالات او صفات معينة سواء على الرجل أو المرأة
انا حسيت انها دراسة او بحث اكتر منها رواية ,, لكن فى المجمل عجبتنى أوى وخليتنى أفكر كتير
------------------------------------------------------------------------
الفترة اللى فاتت حصل عندى زحمة فى دماغى ,, حاجات كتير كنت عايز اكتبها عالمدونة هنا وموش لاقى وقت او فرصة ,, وقررت انى فى اول فرصة أبدأ بالروايات اللى خلصتها الأول وان كان تعبيرى دلوقتى عنها اكيد ناقص وفقير جدا عن تعبيرى بعد انتهائى من قراءتها مباشرة

10 comments:

ست الحسن said...

مساء الخير

على فكرة أنا جيت هنا من فترة طويلة
وافتكر اني قعدت كتير
بس للأسف مريت من غير ما اسيب أثر


لما جيت تاني
لقيتك كاتب عن نون
وعن يوسف عزازيل

وللأسف انا مقرتش أي رواية من دول
فمش عارفة أتكلم معاك عنهم

بس واضح ان الكتب بتأثر فيك
ودي حاجة كويسة جداً
لأن ده معناه انك بتقرا باهتمام حقيقي

...
تحياتي
..

على فكرة
هحاول ألاقيهم واقراهم
وهاجي تاني علشان أتناقش معاك

..

ن said...

السلام عليكم ورحمة من الله وبركاته
تحياتى إلى كل المدونين الجادين وأتمنى أن يشاركونا الرأى والأجتهادات للخروج من تخبط الأراء التى كثرت عن الدين ودرء الشبهات التى تلصق الى الأسلام بتصيد بعض الأخطاء التى الصقت ببعض المفاهيم ..وعبر هذه المدونة علينا أن نبحث فى مصداقية الروايات السابقة وتخير الأجتهادات الحالية بما يخدم الأسلام وقضاياه .
مع خالص تحياتى
أمل فتحى عزت

مؤنس فرحان said...

ست الحسن

أهلا بيكي .. وشكرا على ردك

فعلا الحاجة اللى بأقراها وتأثر فيا بحاول اكتب عنها هنا عالمدونة على اساس يبقى مجرد رأى لأى شخص تانى ممكن بيفكر يقرا الكتاب دا

انا بردو لما بأختار كتاب ما او رواية ما عشان اقراها دا بيكون من خلال كلام سمعته او قريته عنها او سابق قراءة للمؤلف دا واعجابى بفكره واسلوبه فى الكتابة
.........................

عفوا على تأخرى فى الرد .. ومتابعتى للمدونة

مؤنس فرحان said...

أمل فتحى عزت .. شكرا على زيارتك
واهتمامك الدائم بكل ماهو محترم و جاد

JuSt_hUmAn said...

كل سنة وأنت طيب يا مؤنس (f)

محمد ياسر said...

قريتها و عجبتني برضه مع بعض الملحوظات ان مثلا المرأة المثقفة فى الرواية كلهم يعني كانوا متعلقين بشرب البيرة و ما الى ذلك او يعني عامة حسيت ان سلوك الناس دى غير طبيعي او مألوف
لكن اجتماعيات و احساسيس حلوة

اول مرة اجيلك و مش الاخيرة باذن الله

تحياتي

مؤنس فرحان said...

عمرو
وانت طيب وبالف صحة وسلامة دايما

مؤنس فرحان said...

محمد ياسر

اهلا بيك
كلامك فعلا صح .. ودا بألاحظه دايما فى الروايات اللى مؤلفينها كاتبات .. دايما نظرة المرأة المثقفة بيخلطوها او بيشتقوها من النظرة الغربية للمرأة المثقفة او المتحررة

دا مايمنعش ان الفكر دا موجود فى مجتمعنا .. وانا اجمالا موش ضده .. انا شايف ان المجتمعات القوية هى المجتمعات اللى فيها تنوع وحركة فوران دايما تظهر الجيد من السئ
نظام المجتمع اللى بيكون كله ستامبا واحدة موش موجود .. لانهم بينقرضوا

سعيد جدا بزيارتك وردك

Nada said...

لقد مررت هنا من خلال بحث عن "ظل الأفعى" ل يوسف زيدان...وكنت ايضا قد قرأت "نون" فـلفت انتباهي...

لقد استمتعت بالروايتين كثيرا..وأظن ان قد يعجبك "the witch of portobello" by paulo coelho...

أظن أنه شيء مبشر ان يهتم الناس بهذه الثقافة وتقبل الأفكار الأخرى بغير الانحباس وراء جدران الدين والمجتمع ...

مؤنس فرحان said...

أهلا ندا
وشكرا على ردك .. الروايتين فعلا ممتعين
------------------------
ساحرة بورتوبيللو انا بدأت فيها فعلا وان شاءالله لما اخلصها حكتب عنها بوست بردو
---------------------------
شكرا على مرورك مرة تانية