Wednesday, April 23, 2008

عايزة أتجوز

إمبارح حضرت ندوة فى فرع مكتبة الشروق اللى فى الكوربة كانت مع غادة عبد العال صاحبة كتاب ومدونة
حضرت هناك الساعة 7 حسب الميعاد اللى كان متحدد ,, طلعت لقيت القاعة فيها مجموعة بنات قاعدين وسألت واحد تبع المكتبة قاللى غادة لسه ماجاتش .. 10 دقايق وتكون على وصول إتفضل
بصراحة اتكسفت اقعد ونا لاقى كل اللى موجودين بنات فقلت له طيب انا ربع ساعة كده وجاى تانى ونزلت اتصلت بـ شريف قاللى لسه فى البيت واحتمال ييجي أو لأ لسه موش عارف
اتصلت بـ حسام قاللى انا حنزل حالا اهوه
فضلت اتمشى تحت وطلعت بعد شوية لقيت غادة لسه ماجاتش والبنات فى القاعة زادو ,, فنزلت تانى وفضلت ألف فى المنطقة لحد ما شريف وصل طلعنا على فوق كانو ابتدو ليهم تلت ساعة تقريبا
ماشاءالله غادة عبد العال ورحاب بسام ( اللى كانت موجودة فى الندوة بردو بس للأسف مشيت بدرى وماعرفتش اكلمها ) و غادة محمد محمود ,, التلات بنات اللى نشرو مدوناتهم فى كتب مع مكتبة الشروق حاجة تفرح بجد
الندوة كانت لذيذة جدا ,, وتقريبا موضوع الكتاب اللى هو بيتكلم عن فكرة العرسان اللى اتقدمو سواء لغادة او لمعارفها عن طريق جواز الصالونات كان بيفتح الكلام عن كل حاجة فى مجتمعنا .. طبعا غادة مقدمة الفكرة بشكل ساخر وأسلوبها روعةةةةةةةة
وطول الندوة كان فى مصورة خواجايا اخدت حوالى الفين صورة لغادة والندوة من كل الزوايا و الأركان والاوضاع .. ساعات كنا نلاقيها مستلقية عالأرض فى وسط القاعة وبتصور وساعات تقرب أوى من وش غادة وهى بتتكلم وساعات تنزل لها من فوق ومرة طلعت لها من تحت الكرسى ,, المهم
فى آخر الندوة قعدنا معاها شوية كتبت لنا الإهداءات على الكتاب
ما بعد الندوة
لما خرجنا انا وشريف و حسام بعد الندوة طبعا كان كلامنا كله عالكتاب والمدونات والجواز .. ولقينا فعلا ان موضوع الجواز بيفتح معاه كل المواضيع والمشاكل التانية
أى بنت مولودة وهى حاصلة على لقب عروسة ,, مجرد ما توصل لعمر الجامعة يبتدى الكل يتكلم عن العريس المنتظر
أما بالنسبة للشاب فالوصول لـ لقب عريس فموش بالساهل كده ,, عريس يعنى عندك دخل ثابت ومحترم يعيشك حياة كريمة ,, يعنى عندك شقة وتقدر تجهزها ,, يعنى تقدر على الدفعة الكبيرة فى الأول ( مهر - شبكة - الجهاز ) لما توصل للمرحلة دى وكلها مادية بالأساس تقدر تقول على نفسك عريس وممكن تفكر فى العروسة
هنا احنا موش بنتكلم عن أى جوانب إنسانية خالص ,, لسه فى الجانب المادى الصرف
موضوع بقى جواز صالونات ,, جواز عن معرفة سابقة ومشاعر متبادلة بين الطرفين.. إلخ إلخ ... كل دا بييجي بعد مانخلص من الشق المادى
كنت بأقول ان غادة فى كتابها أو مدونتها عايزة أتجوز هى فى مرحلة الإختيار علطول والمرحلة دى مع البنت من أول مابتتولد ,, لكن بالنسبة للشاب فالأمر مختلف هو موش بيتولد عريس ,, دا لازم يوصل للمرتبة دى .. ويدينا ويديكم طولة العمر

11 comments:

*سمر* said...

جميلة جدا المدونات دى ..ان متابعها ....
بس فعلا هى مدونة غادة بتناقش حاجة مهمة جدا ..موضوع الجواز,وكل المواضيع المرتبطه بيه ..انا كان عاجبنى اوى حاجة هى كتبتها ..بتقول فيها .ان البنت من وهى صغنونة ..بتعد نفسيا وتهىء انها لازم تكون عروسة ..وهو ده النجاح الحقيقى لها ..واى حجة غير كدة ..مهما وصلت .بيكون ملهاش لازمة طالما انها مش متجوزة ..كلامها صح جدا..ده سوء تربية ...مفهوم غلط ..لازم يتغير ...

انا بس حبيت اقول حاجة من الحاجات اللى عجبتنى فى الكتاب..بما انك اتكلمت عنه ..

والسلام ..ختام :)

سمراء said...

اشكرك على زيارتك
اسعدتني فعلا
كما اسعدتني تعليقاتك

عن موضوعك
الثقافة الشعبية المصرية غرست في البينت المقولة الشهيرة
البنت ملهاش غير الجواز
كما غرست في الرجل
ان الرجل ميعيبوش الا جيبه
رغم كل التطور الثقافي الذي حدث من تعلم المرأة وحصولها على مناصب عليا في الدولة
ورغم مساندتها للرجل ماديا
الا ان ما تم غرسه كان اقوي
كما ان متطلبات الحياة اليوم اصبحت مختلفة فيختلط في الاذهان ما هو اساسي وما هو على سبيل الترفيه والكمليات
فلخلوي اليوم اساسي والقنوات الفضائية اساسية وهكذا

يتطلب الوضع موقف جريء يطرح تلك الافكار جانبا ويغلب العلاقات الانسانيه عليه

اشكرك
سمراء

Mafrousa said...

ليه و الله انا كنت باسمع زمان لما الولد يكبر يقولوا ماشاء الله بقى عريس....بس يظهر مع المتطلبات الماديه اللى تخض و تقطع الخلف...الناس بقت تخاف على اولادها من انهم يحسوابالاعباء ديه بدرى و كله فى الاخر قسمه و نصيب

JuSt_hUmAn said...

"لكن بالنسبة للشاب فالأمر مختلف هو موش بيتولد عريس ,, دا لازم يوصل للمرتبة دى .. ويدينا ويديكم طولة العمر"

ههههههههههههههه
الجملة دي مسخرة بجد..وطبعاً معاك حق فيها

FaceMoon said...

انا قريت الكتب التلاتة ومتابعة المدونات كمان وفرحت اوى لما لقيت حد غير البنات متابع وموافق على مواضيع الكتب دى
وعندك حق فى كل كلامك طبعا البنت لو
عدى عليها 24 سنة ولسة مش ارتبطت حيقولوا عليها عنست وفيها خلل نفسى ولا عقلى ولا اى حاجة وبيطلعوا العيب منها مش من النصيب كأن البنت لو مش اتجوزت تبقى حياتها انتهت مع ان ممكن تبدأ حياتها بحاجات تانية كتير وتتوفق فيها كمان عشان كدة النبت عليها ضغوط اكتر من الولد لان زى ما انت قلت لقب عروسة بيلازمها لحد سن معين وبعد كدة يتقال عليها عانس
بهنيك على مدونتك رائعة
تحياتى

مؤنس فرحان said...

أهلا يا سمر

موضوع الجواز ممكن نتكلم فيه 10 سنين من غير مانخلص .. لأنه مرتبط بكل حاجة فى حياتنا.. إستمرارية المجتمع والناس بشكل عام وتقدم بلدنا وإصلاحها بشكل خاص .. حانلف وندور ونتكلم عالجواز والحالة المادية والاجتماعية والشغل والبطالة والتعليم ومشاكله اللى بيطلع ناس غير صالحة لسوق العمل ومن هنا حندخل على الواسطة والشغل الحكومى والخاص وتربية الأولاد ونختار لهم انهى مدارس حكومى ولا خاص بردو و دى لها عيوبها ودى لها عيوبها بردو
حياتنا كلها حاتلاقيها متمحورة حوالين الجواز (حلوة متمحورة دى) .. عشان كده كان تناول غادة للفكرة ماشاءالله ناجح
شكرا على ردك

مؤنس فرحان said...

أهلا بيكي سمراء
نورتي المدونة

رأيك صحيح عن موضوع الثقافة الشعبية بموروثاتها اللى مأثرة فينا

بس للأسف مهما نقول الأفكار دى غلط او غبية او متخلفة او لازم نفكر بالعقل والمنطق ونحدد أولويات
حاتلاقى اللى يعارضك وياريت لسبب مهم
لكن بسبب ..( الناس تقول علينا ايه .. الكلام دا مايصحش .. هو انا بنتى بايرة .. اصبر ونا اجوزك ست ستها.. دانتى يتمناكى الف واحد .. البنات على قفا مين يشيل) .. وكلام من النوعية دى كتير .. وللأسف ناس من اصحابى جوازاتهم اتفشكلت بسبب حاجات تغيظ .. وتشل

شكرا على زيارتك

مؤنس فرحان said...

واحدة مفروسة

انتى بتقولى فيها .. دا فعلا كلمة جواز بقت بعبع لأسر كتير لما حد من اولادهم يفكر فيه

الإنسان بيسعى للراحة فى كل أموره .. ولما اتنين يقررو يتجوزو بعض اكيد هما حاسين انهم حايرتاحو مع بعض وحياتهم حاتبقا احسن من لو هما لوحدهم

لكن الأعباء والضغوط حاليا بقت هم و حمل كبير على أى عروسين جداد أو حتى قدام موش فارقة
ربنا يسترها مع الجميع

شكرا يا مفروسة و ربنا يفرس اعاديكى

مؤنس فرحان said...

عمروو

بفرح جدا بردودك (بينى وبينك انت الشاب الوحيد اللى بيعبرنى فى المدونة)

بالنسبة للجملة دى .. فأى شاب قبل ماتسمح له ظروفه انه يبقى عريس بجد ويقدر يرتبط .. فأى علاقة من ناحيته بأى انسانة او مجرد تلميح او حتى قرب زيادة عن اللزوم ممكن يخليها هى تتعلق بيه
حرام و لعب عيال .. لانه فى الاخر عذاب له ولها ومفيش بإيديهم حاجة
فالأفضل انه مايسمحش لنفسه انه يتعلق
بحد او العكس

شكرا يا عمرو على زيارتك

مؤنس فرحان said...

فيس موون

على فكرة فى ناس كتير جدا جداا شباب وكبار وصغيرين قرو الكتب التلاتة .. دا كان واضح فى كل الندوات اللى اتعملت ليهم او فى معرض الكتاب .. ماشاءالله التلات بنات موهوبين

ضغوط المجتمع دى مجرد عادات وموروثات شعبية بدليل ان الكلام دا موش موجود فى بقية بلاد العالم .. موجودة فى عالمنا العربى بس

ودلوقتى على فكرة كلمة عانس بيقولوها عالشاب والبنت سواء .. الفرق ان بنت لما تقرب عالتلاتين تبتدى الكلمة دى معاها بالنسبة للشاب لما يقرب عالأربعين

كلام فاضى كله .. احنا طول الوقت بنسعى اننا نعيش حياتنا بأفضل شكل ممكن .. ونحسن من نفسنا طول الوقت ونتعلم من أخطاءنا .. وموضوع الجواز احسن كلمة اتقالت فيه هى كلمة قسمة ونصيب

الشخص اللى حاأرتبط بيه مين ..؟ حعرفه امتا ..؟؟ و فين ..؟؟ و فى أى ظروف ..؟؟

الله أعلم

بس يهمنى انى احضر نفسى للوقت دا.. جا بدرى جا متأخر موش مهم .. كل شئ بييجي فى أوانه

شكرا يا فيس على ردك الجميل

Anonymous said...

bass ba3d ma 2areet ta3likal elbanat wi elwiladd la2ett ino mafish 7al 3'eer "go dutch"and the girls have to be more realistic and for el3ersan they have to be more optimistic as live goes on and the weels won't stop for us .