Thursday, April 3, 2008

تحية إلى الرفاق


أقصد بالخيال هنا الشبكة العنكبوتية ,, أو الواقع الإفتراضى زى مابيسميه البعض
طبيعى فى ناس الواحد بيعرفهم مرة او يوم وناس شهر وناس تفضل علاقتك بيهم سنين
وناس لحد دلوقتى موجودين وممكن تعرف أخبارهم وناس اختفو والدنيا شغلتهم
ناس عرفتهم من الشات وناس عرفتهم من المنتديات
يمكن لما أقول اساميهم فهى بالنسبة للى يقراها موش مفهومة مجرد اسماء مستعارة ,, يمكن البعض يعرفهم والأغلبية لأ
يمكن لسه بيدخلو النيت بس اسماءهم اتغيرت ,, يمكن ليهم مدونات دلوقتى او ممكن يكونو موجودين على الفيس بوك
يمكن يدخلو بعد سنين وحد فيهم يفتكر يكتب اسمه القديم او حد من اصحابه القدام ويكون حظى ويكتب اسمى مؤنس فرحان فى محرك من محركات البحث زى جوجل
ويلاقى البوست دا

لذكرى كل موضوع أو رد على المنتديات ,, لذكرى كل مرة عملنا فيها شات على مصراوى او عالماسنجر
لذكرى كل رأى اتشاركنا فيه و كل رأى اختلفنا عليه ,, لكل شئ جميل جمع بيننا
بأهدى تحياتى لكل رفاق الرحلة الافتراضية على الشبكة العنكبوتية
مؤنس فرحان

:)

8 comments:

*سمر* said...

الله ..جميل جدا الموضوع ده ..مكنتش اتوقع ان حد يكتب عن رفاق المجتمع الافتراضى والشبكة العنكبوتيه :) ..
فيك الخير

بس فعلا التكنولوجيا فرضت علينا مجتمعات جديدة ..وطريقة تعارف جديدة ..مكناش نتخيلها ..
يعنى لو جيت قلت لحد من زمان ..ده فيه ناس كده كتير ..ممكن تعد تكلمهم ..وتناقشهم ..وتبقوا صحاب ..وفى لااخر لا هتشوفهم ..ولا هتعرفهم ..طبعا كانوا هيستغربوا ..

انا لحد دلوقتى مش قادرة استوعب اوى حقيقة الحياة الافتراضية ..خاصة انى لا اؤمن بانصاف العلاقات ..مهو يأما حد اعرفه كويس قوى ..او حد معرفوش ..وكان بيصعب على اوى لما اعمل شات مع اى حد ..ونتكلم ...وبعد كده يختفى ..عمررى ما كنت بعمل بلوك الا لو الطرف التانى عمل ..
يمكن علشان كده انا قررت معملش اى كلام مع اى حد معرفهوش ..تجنبا للزعل ..ولانى لا اؤمن بانصاف العلاقات ..

صدعتك .بس حسيت انك اتكلمت فى موضوع كان جوايه ..ومش قادرة اعبر عنه..
تحياتى :)

JuSt_hUmAn said...

جميل أنت والله يا مؤنس
(f)

dododody said...

بجد يا مؤنس موضوع مهم جدا وانا ع طول بفكر فيه هو انا الناس اللى انا قابلتهم على مدار السنين اللى انا عشتها مش حقابلهم تانى انا بضيق وبزعل جدا لما اكون متعلقه بحد سواء كان فى المدرسه معايا او فى الكليه او حتى العمل وظروف الحياه اخدتنا ومبقناش خلاص لا نشوف بعض ولا نقابل بعض حتى لو كانت علاقتك بهم علاقة زماله لكن بتحب انك تسمع اخبارهم وتدور ع وسيله تعرفك بهم لكن حنعمل ايه بقى هى دى سنة الحياه

مؤنس فرحان said...

أهلا يا سمر

ناس كتير من اللى عرفتهم عالنيت كنت أتمنى لو اعرفهم فى الواقع .. بسبب اننا واخنا موش شايفين بعض بنستريح لفكر انسان
تخيلى لو مجموعة كبيرة من البشر قاعدين فى مكان ما مع بعض وماحدش يعرف بعضه
كتير اوى .. مثلا 1000 شخص
وكلنا عندنا القدرة اننا نتواصل فكريا ونقرا افكار بعض وفعلا قاعدين كلنا مغمضين وعمالين نتنقل من عقل لعقل ونتكلم مع دا ومع دا ونعرف اراء دا ايه وفكر دى ايه
واثناء كده بنتعلق بناس ونفرح بناس اوى وممكن نبقى اصحاب جداا ويهمنا رأى بعض فى بعض الأمور
وبعد كده كلنا بنفسح عينينا ونخرج ماحدش يعرف هو كان بيكلم مين.. الطويل اللى هناك دا والست الكبيرة دى والشاب السمين دا والبنت الصغيرة دى
موش مهم هو مين فيهم بس عجبنى اسلوب تفكيره
دا بالظبط اللى بيحصل عالنيت
شكرا على زيارتك وردودك الجميلة

مؤنس فرحان said...

الله يكرمك يا عمرو .. بس بجد ناس كتير الواحد مستحيل ينساهم اتعرف عليهم من خلال الواقع الافتراضى دا .. يمكن قابلت بعضهم فعلا والاغلبية لأ بس مستحيل انساهم ابدا

شكرا ليك وكل سنة ومدونتك وانت طيبين

مؤنس فرحان said...

دودو
احنا باللى حوالينا

يعنى قيمتنا نعرفها لما نحدد الناس اللى بنحبهم ويحبونا.. مهتمين بينا ومهتمين بيهم

والناس اللى بنعرفهم على مدار حياتنا فى اى مكان بأى وسيلة بيبقو زى الكنز .. احنا بنجمع الناس المقربين لينا زى مابنجمع الكنوز لانك عشان تلاقى شخص تستريح له دا بيبقى من خلال انك تعرف ناس كتيير وتقابل ناس عشان تقول فلان دا صديقى
فلان دا بأستريح لما اتكلم معاه
فلان دا بحس بالأمان لما افضفض له
فلان دا طالما جنبى يبقى حنعمل شغل كويس او حنذاكر بشكل كويس

علاقاتنا هى احنا

شكرا يا دودوو على زيارتك

سمراء said...

لما انشأت مدونتي بدعوة من صديق
لم افهم لماذا انشأها
بعد فترة اصبحت المكان الذي اعبر فيه عن نفسي دون قيود
وبعد ان بدء البعض بكتابة تعليقات
اصبحت اشعر ان تعليقاتهم تهمني رغم اني لو قابلتهم في اي مكان لن تعرف على بعضنا البعض
( اصدقاء افتراضيين ( كانت لدي النية ان اكتب عن ذلك
لا اعلق على التعليقات لاني اري انه لا مجال للمناقشة او اقناع احدنا الاخر برأيه وانما هي دعوة منهم لاعادة التفكير والنظر فيما كتبت

اشكرك
سمراء

مؤنس فرحان said...

سمراء

انا ونا بكتب دلوقتى ردودى إنسان مختلف تماما عن الواقع .. بمعنى انى هنا عالمدونة مفيش عندى أى حواجز وعالنيت عامة .. رأيى كذا انا بحب كذا وبأكره كذا .. فى الواقع ممكن نراعى شوية حاجات ممكن نكون موش مقتنعين بيها بس عشان نرضى ناس تانيين بيحبونا وبيقدرونا

وبالتالى دا ميزة ميدو وتوتا ولولو وعفركوش وأى اسم يخطر ببالك ممكن يكون اسم مستعار لأى شخص بنتكلم وبنطلع اللى جوانا ولما بيعجبنى فلان واستمر اعرفه واتكلم معاه موش لانه زميلى او قريبى ولازم اعرفه
ولا لانه شكله حلو
ولا لأنه ذوق معايا فلازم اعامله بالمثل
.....

انا بتعجبنى فكرة مجردة شوية أراء وافكار و معانى تحت اسم كوكو ولا جيجي ولا سوبرمان

بجد تخيلى فى ناس عرفتهم عالنيت من سبع سنين تقريبا ولحد دلوقتى متواصلين مع بعض وعمرنا ماشوفنا بعض ولا سمعنا صوت بعض

............

موش لازم تكتبى تعليقات عالمدونة .. لانه زى ماقلتى احنا موش بنحاول نقنع بعض بأراءنا .. انت ماتهمنيش وانا موش مهم ليك
دا رأيك ودا رأيى
ممكن نتفق وممكن نختلف دا العادى والطبيعى
لكن الفكرة فى التواصل والحوار .. الأخرين بيفكرو ازاى .. وبيتعاملو ازاى .. انا ممكن اتعلم منك وانت ممكن تتعلم منى


شكرا يا سمراء