فنان

نجاح الموجى
عبدا لله غيث
سناء جميل
عادل أدهم
عزت العلايلى
……………….

الأسماء دي كلها لفنانين أنا بحبهم أوى.. بحب أعمالهم جدا و أدوارهم كلها ماشاءالله روعة بالنسبالى

نجاح الموجى: من الممثلين الجامدين جدااا.. وان كان رأيي انه ماخدش حقه بالكامل من التكريم سواء وهو حي أو بعد وفاته الله يرحمه.. كان ممثل قوى جداا

عبدا لله غيث: بعشقه.. بحب جداا أي عمل فيه عبدا لله غيث و أي دور قام بيه.. بالنسبالى كان مثال للراجل المحترم.. (الراجل لوحدها ) ( والمحترم لوحدها ).. له مسلسل قديم اسمه في ظلال السيوف أداؤه تحفة

سناء جميل: مالهاش حل.. واللي عايز يعرف سناء جميل يتفرج على اعمالها القديمة.. لأنها في أخر 10 أو 15 سنة من عمرها اتحبست في إطار معين ماكانش بيظهر كل موهبتها.. فيلم البداية و النهاية مالوش حل وأفلام غيره كتير خصوصا في فترة السبعينات

عادل أدهم: عبقري.. موش عارف ليه معظم الفنانين العباقرة من وجهة نظري بيبدعو أكتر في أدوار الشر ويمكن أقربهم الخالدين (خالد الصاوي + خالد صالح).. الاتنين دول ماشاءالله فنانين بجد بردو

عزت العلايلى: بالنسبالى عزت العلايلى ملك السبعينات.. عارفين انتم الفترة دي.. و تحديدا من بعد هزيمة 67 لحد 79 تقريبا.. كان في موجة أفلام لها فكر متمرد وفلسفي إلى حد ما .. قام ببطولتها عزت العلايلى

أنا مغرم بفترة السبعينات ,, نور الشريف و محمود عبدالعزيز ومحمود ياسين ,, فاكرين انتم السوالف الطويلة والبناطيل الشارليستون ,, بغض النظر عن موضة اللبس لكن أنا اقصد الفترة دى ,, كانت مصر ساعتها فى مرحلة انتقالية من ثقافة لثقافة وكان شعور التمرد مسيطر على كل شئ و الفن طبعا اخد نصيبه

..........................................................

بالنسبة للفنانين الأجانب ,, أنا متيم بـ روبين ويليامز

و فى ممثل اسمه كريستيان بال ,, تحفة بردو

و باربرا سترايسند

الناس دى بأحس انهم فنانين

وكلمة فنان دى ماتتقالش على أى حد ,, دى كلمة كبيرة أوى

عايزة أتجوز

إمبارح حضرت ندوة فى فرع مكتبة الشروق اللى فى الكوربة كانت مع غادة عبد العال صاحبة كتاب ومدونة

عايزة أتجوز

حضرت هناك الساعة 7 حسب الميعاد اللى كان متحدد ,, طلعت لقيت القاعة فيها مجموعة بنات قاعدين وسألت واحد تبع المكتبة قاللى غادة لسه ماجاتش .. 10 دقايق وتكون على وصول إتفضل

بصراحة اتكسفت اقعد ونا لاقى كل اللى موجودين بنات فقلت له طيب انا ربع ساعة كده وجاى تانى ونزلت اتصلت بـ شريف قاللى لسه فى البيت واحتمال ييجي أو لأ لسه موش عارف

اتصلت بـ حسام قاللى انا حنزل حالا اهوه

فضلت اتمشى تحت وطلعت بعد شوية لقيت غادة لسه ماجاتش والبنات فى القاعة زادو ,, فنزلت تانى وفضلت ألف فى المنطقة لحد ما شريف وصل طلعنا على فوق كانو ابتدو ليهم تلت ساعة تقريبا

ماشاءالله غادة عبد العال ورحاب بسام ( اللى كانت موجودة فى الندوة بردو بس للأسف مشيت بدرى وماعرفتش اكلمها ) و غادة محمد محمود ,, التلات بنات اللى نشرو مدوناتهم فى كتب مع مكتبة الشروق حاجة تفرح بجد

الندوة كانت لذيذة جدا ,, وتقريبا موضوع الكتاب اللى هو بيتكلم عن فكرة العرسان اللى اتقدمو سواء لغادة او لمعارفها عن طريق جواز الصالونات كان بيفتح الكلام عن كل حاجة فى مجتمعنا .. طبعا غادة مقدمة الفكرة بشكل ساخر وأسلوبها روعةةةةةةةة

وطول الندوة كان فى مصورة خواجايا اخدت حوالى الفين صورة لغادة والندوة من كل الزوايا و الأركان والاوضاع .. ساعات كنا نلاقيها مستلقية عالأرض فى وسط القاعة وبتصور وساعات تقرب أوى من وش غادة وهى بتتكلم وساعات تنزل لها من فوق ومرة طلعت لها من تحت الكرسى ,, المهم

فى آخر الندوة قعدنا معاها شوية كتبت لنا الإهداءات على الكتاب

ما بعد الندوة

لما خرجنا انا وشريف و حسام بعد الندوة طبعا كان كلامنا كله عالكتاب والمدونات والجواز .. ولقينا فعلا ان موضوع الجواز بيفتح معاه كل المواضيع والمشاكل التانية

أى بنت مولودة وهى حاصلة على لقب عروسة ,, مجرد ما توصل لعمر الجامعة يبتدى الكل يتكلم عن العريس المنتظر

أما بالنسبة للشاب فالوصول لـ لقب عريس فموش بالساهل كده ,, عريس يعنى عندك دخل ثابت ومحترم يعيشك حياة كريمة ,, يعنى عندك شقة وتقدر تجهزها ,, يعنى تقدر على الدفعة الكبيرة فى الأول ( مهر - شبكة - الجهاز ) لما توصل للمرحلة دى وكلها مادية بالأساس تقدر تقول على نفسك عريس وممكن تفكر فى العروسة

هنا احنا موش بنتكلم عن أى جوانب إنسانية خالص ,, لسه فى الجانب المادى الصرف

موضوع بقى جواز صالونات ,, جواز عن معرفة سابقة ومشاعر متبادلة بين الطرفين.. إلخ إلخ ... كل دا بييجي بعد مانخلص من الشق المادى

كنت بأقول ان غادة فى كتابها أو مدونتها عايزة أتجوز هى فى مرحلة الإختيار علطول والمرحلة دى مع البنت من أول مابتتولد ,, لكن بالنسبة للشاب فالأمر مختلف هو موش بيتولد عريس ,, دا لازم يوصل للمرتبة دى .. ويدينا ويديكم طولة العمر

أشياء بداخلى

فى شوية أفكار وظنون ومعتقدات واستنتاجات معششة جوايا الفترة دى ,, دلوقتى ونا عندى 29 سنة

لما طلعتها عالورق لقيت ان اراء كتير منها (أفكار صبيانية أوى) ,, وحاجات تانية عبارة عن تساؤلات تدل على الحيرة والشتات الفكرى وحاجات تالتة بتدل عليا انا بس المهم انا قررت اطلعها هنا عالمدونة

مفيش بنت عاقلة

الموظفين الرجالة معظمهم مرتشين ,, الموظفات لأ ,, موش عارف ليه ؟؟

معظم الناس إللى شغالين فى المطارات والموانئ لإما حرامية لإما شحاتين

الإمارات حكومة و شعب ناس محترمين جدا والحكومة عاقلة أوى

موش عارف ليه معظم المدونات إللى عجبتنى أصحابها بنات

معظم الناس المثقفة والمحترمة اللى عرفتهم بأى طريقة أو شكل معظمهم بنات

بأحس ان بنى إسرائيل ملعونين من أول ما إتخلقو وعمرهم ما حيحسو بالأمان أبدا لحد ماينتهو

قناة أو تى فى حاسس ان فيها ديفو معين ,, حاسس انها قناة لفئة معينة من الشعب الناس الكلاس

لحد دلوقتى موش قادر أفهم دماغ الشيعة

مسيطرة عليا تماما فكرة العدل الإلهى ,, ربنا مابيظلمش حد و كل شخص منكوب أو فى محنة أو مشكلة أو مصيبة أكيد يستاهل ,, وكلمة يستاهل موش معناها دايما عقاب لان ممكن تكون المحنة مقدمة لخير كبير ماكانش ممكن ييجي إلا بالطريقة دى

لا أعرف ,, هل يفسد الناس بعد توليهم المناصب ,, أم يتم إختيارهم لأنهم فاسدين

مشجعين الكورة إللى بيحضرو المباريات فى الاستادات (حثالة بشرية ),, دى لفظة عنصرية على فكرة

موش عارف ليه الناس بتعلق على موضوع ان كابتن أحمد شوبير بيشتغل أكتر من شغلانة ,, المهم انه يكون ناجح فى شغله وانه مايخليش وقت شغل يأثر عالتانى (يمكن عشان فى بطالة فى البلد وهو واخد مكان عشرة غيره) ,, الله اعلم

مفيش حد عنده ضمير إلا فيما ندر

التشاؤم حرام ,, بس كتير بحس انى متشائم

كريم أساس - بودرة - بلاشر - آى لاينر - روجوجو ,, وحاجات تانية مقدرتش ألقط اسماءها ,, كل دى حاجات البنات بتحطها على وشها وهى خارجة ,, موش عندى حق أقول عليهم مجانين ؟؟

موش بأطيق المدخنين

أنا وحيد جدا

أنا مستمع جيد جدا

بحب نجاة أوى ,, سواء بتغنى أو بتمثل

حاسس ان عندى 19سنة

موضوع انى بأتكلم بسرعة عامل لى مشاكل

لحد دلوقتى موش عارف معنى البرومبة ,, سبع البرومبة

حاسس ان حاجات كتير من اللى كتبتها متناقضة مع بعضها ,, الحمد لله كده انا طبيعى

تحية إلى الرفاق

أقصد بالخيال هنا الشبكة العنكبوتية ,, أو الواقع الإفتراضى زى مابيسميه البعض

طبيعى فى ناس الواحد بيعرفهم مرة او يوم وناس شهر وناس تفضل علاقتك بيهم سنين

وناس لحد دلوقتى موجودين وممكن تعرف أخبارهم وناس اختفو والدنيا شغلتهم

ناس عرفتهم من الشات وناس عرفتهم من المنتديات

يمكن لما أقول اساميهم فهى بالنسبة للى يقراها موش مفهومة مجرد اسماء مستعارة ,, يمكن البعض يعرفهم والأغلبية لأ

يمكن لسه بيدخلو النيت بس اسماءهم اتغيرت ,, يمكن ليهم مدونات دلوقتى او ممكن يكونو موجودين على الفيس بوك

يمكن يدخلو بعد سنين وحد فيهم يفتكر يكتب اسمه القديم او حد من اصحابه القدام ويكون حظى ويكتب اسمى مؤنس فرحان فى محرك من محركات البحث زى جوجل

ويلاقى البوست دا

لذكرى كل موضوع أو رد على المنتديات ,, لذكرى كل مرة عملنا فيها شات على مصراوى او عالماسنجر

لذكرى كل رأى اتشاركنا فيه و كل رأى اختلفنا عليه ,, لكل شئ جميل جمع بيننا

بأهدى تحياتى لكل رفاق الرحلة الافتراضية على الشبكة العنكبوتية

مؤنس فرحان

:)

أرز باللبن لشخصين

إمبارح لسه مخلص كتاب أرز بلبن لشخصين لـ رحاب بسام صاحبة مدونة

حواديت

ممممم ,,كنت قلت قبل كده ان فى كتب لما بخلصها بيصيبنى بعدها حالة نعنشة إنسانية

الحالة دى أعراضها .. السرحان والتفكير الكتيير وانى امسك الكتاب وارجع اقراه تانى من الاول او ارجع لأجزاء فيه واعيد قراءتها من تانى.. وبيبقى جنبى كشكولى الصغير عمال اكتب ملاحظات وارجع اسرح تانى

وممكن أفضل كده من يوم لأسبوع حسب الظروف

ماشاءالله .. رحاب بسام أسلوبها الأدبى عالى جداا ومتمكنة من أدواتها بشكل كبير

البساطة , السلاسة , المشاعر المتدفقة (متدفقة متدفقة يعنى) .. أجمل حاجة انك وانت بتقرا الكتاب بتعرف ان دى بنت مصرية (سبحان الله) .. بس بجد الواحد بيفرح جدا لما يقابل نماذج زى غادة محمد محمود صاحبة مدونة

مع نفسى

واللى كانت دار الشروق نشرت لها كتابها تحت إسم أما هذه فرقصتى أنا

و رحاب بسام .. (ولسه فى غادة عبد العال بس حيبقى لها بوست لوحدها لما اقرا كتابها) .. فى مجتمعنا فى نماذج كتير الواحد يفخر بيها .. انا بجد فرحان جدا بالكتابين دوول

انا مسكت كتاب أرز باللبن لشخصين ماسيبتهوش غير لما خلصته

عجبنى جداا فى الكتاب العناوين دى

بالأمس حلمت بالبطيخ

أرز باللبن لشخصين

المرأة الخارقة

طق حنك

الشباب الدائم للألوان

جمال الدنيا و حقيقة الأشياء

على بياض

المرجيحة

أسباب بسيطة

لما الشتا يدق البيبان

أن تنسى

كيف يبايعون الرئيس فى شارع

نظريتى اللغوية

رحيل

عالم صغير

.....................

غالبا دلوقتى موش حعرف أعبر كويس عن احساسى بالكتاب .. لأنى ونا مبسوط موش بأعرف اتكلم (وونا زعلان بردو) .. كمان شوية كده لما أفوق من نشوة الكتاب