Tuesday, July 27, 2010

سعد الدين الإبتدائية

مدرستى الإبتدائية
فى مدينة طنطا
سعد الدين الإبتدائية ... كان عندنا أبلة كريمة وأبلة سامية و أبلة إستر و أستاذ يوسف و أستاذ محمد عبد الحميد و أستاذ يونان و أبلة فتحية وأبلة مارى و أبلة انجيل وغير هم كتير نسيت أسماءهم للأسف وان كنت متذكرهم شكلا كأنى كنت معاهم امبارح

أبلة كريمة كنت بحبها جدااااااااااا ... كانت طيبة أوى كنت تحس انها ماما الحنينة موش أبلة فى مدرسة

كانت المدرسة مميزة بفناءها الكبيير الواسع ... اللى للأسف لما زرتها من سنتين تقريبا لقيتهم بنو فيه مبنى تانى وماعادش فى فناء للمدرسة ... وكنا وقت الفسحة بناخد راحتنا عالأخر جرى ولعب وكورة وكهربا وشد الكوبس واستغماية .... كانت المدرسة كبيرة أوى ... أو يمكن احنا اللى كنا صغيرين خالص فكنا شايفين كل حاجة كبيرة

كانت مدرستنا وكعادة معظم المدارس وقتها فيها فترتين ... فترة صباحية وفترة مسائية ... كانت معانا مدرسة تانية اسمها على مبارك ... وكان التبادل مابيننا بالشهر
شهر احنا الفترة الصباحية وهما المسائية والشهر اللى بعده نغير وهكذا
وكان بواب المدرسة عم محمود لسه فاكر شكله ... كان بيجيب بونبونيهات وحلويات بيبيعهالنا على باب المدرسة وكانت كل الأبلوات بيحذرونا نشترى منه اى حاجة لان حاجته ملوثة وموش نضيفة واننا لازم نشترى من كانتين المدرسة احسن ... وطبعا كنا كلنا بنشترى من عم محمود ومابيهمناش الكلام دا ... لأنه كان أرخص بصراحة من كانتين المدرسة

كان معانا واحد صاحبنا اسمه بطرس كان بيجيب لنا دود القز ... كان بيبيع لنا الدودة بـ عشرة صاغ ... وكان وقتها منتشر لبان بم بم وكان كل واحد فينا معاه علبة كبريت فاضية بيشيل فيها صور بم بم وبنبدلها مع بعض كل واحد يبدل المتكرر عنده مع حد تانى ماعندوش وهكذا ... وطبعا عمرنا ماكسبنا حاجة ولا قدرنا فى يوم نجمع ألبوم بم بم كله
وبردو علب الكبريت الفاضية كان بنحط فيها دود القز ونحط له ورق التوت ونتفرج عليه وهو بياكله وبعد كده لما يعمل الشرنقة بتاعته

كانت حصة الألعاب هى أحلى حصة عندنا ... كانت أبلة مارى هى أبلة الألعاب وكانت بتخلينا فى نص الحصة الأولانى كله نعمل معاها تدريبات جرى ونط وضغط وتمارين سويدى اللى لما كبرنا عرفنا انها اسمها ايروبيكس وكانت نص الحصة التانى تسيبنا براحتنا نلعب ... فكان اغلبية الولاد بيلعبو كورة ... نقسم فرقتين ونلعب ... والبنات كانو بيلعبو أولة ... أو كهربا

كانت لما بتيجي حصة الدين بيفصلونا على فصلين ... المسلمين والمسيحيين وساعات كنا بنزوغ من حصص الدين لان ماكانش بيبقى فيها رقابة سواء هنا ولا هنا ونطلع عالحوش نلعب تانى

وكان كل أستاذ وكل أبلة ... كل واحد فيها له عصاية خاصة بيه ومشهور بيها
فى عصاية أبلة فتحية اللى طولها تلاتين سنتيمتر تقريبا ولفاها بشيترتون احمر وازرق ومن راسها قدام ملبساها قطعة الومينيوم
وجريدة استاذ محمد عبد الحميد بكسر الجيم اللى تقريبا كانت طولنا ... و أبلة سامية كانت معروفة انها بتضرب بـ سن المسطرة على ضهر الكف ... كانت بتوجع أوىىى
وكان أستاذ يونان مابيضربش حد ... هو كان بيزنب اللى يزعجه ويخليه واقف طول الحصة ... هو كان استاذ تاريخ
انا كنت بحبه هو وأبلة سامية لأنهم الاتنين كانو مدرسين تاريخ ... ونا التاريخ بالنسبالى كان عبارة عن حصة حواديت وحكايات

كل ما أفتكر ذكرياتى فى مدرسة سعد الدين ... أفتكر أغنية هشام عباس زمان ونا صغير
كانت أجمل أيام فى الدنيا ... لعب ولعب ولعب وفضول لمعرفة كل حاجة وشعور طاغى بالأمان لأن فى ناس أكبر منك متحملين مسؤوليتك وبياخدو بالهم منك

ربنا يجعل أيام الجميع أمان فى أمان


Monday, July 19, 2010

المصريين و الإهمال

لحد إمتا حاتفضل صفة الإهمال هى الصفة الملاصفة لينا علطول كمصريين ...؟؟
لحد إمتا موش حانتعلم من أخطائنا ...؟؟
لحد إمتا حنفضل نرمى التهمة على الماس الكهربائى والمختل عقليا واللفافة اللى بتتبلع ...؟؟
لحد إمتا كل مانيجي نحاسب المسئول ... مانلاقيش مسئول ويفضل كل واحد يرمى المسئولية عالتانى ...؟؟

مجموعة من 19 بنت صغيرين فى إعدادى أغلبهم ومعاهم مشرف من الكنيسة اللى كانت مطلعة الرحلة غرقو فى مركب فى النيل فى حلوان
لحد دلوقتى طلعو 11 جثة والباقيين فى المستشفى بين الحياة والموت

غلطة مين ...؟؟
المشرف اللى كان معاهم ... لأنه هو المفروض الناضج اللى فى الرحلة واللى مهمته يخلى باله منهم
المراكبى اللى ماعندوش ضمير
شرطة المرافق اللى سمحت له يشتغل سواء كان معاه ترخيص أو لأ
خفر السواحل اللى وصلو بعد حادث الغرق بـ تلات ساعات عشان ينقذو مايمكن انقاذه

كل واحد من دوول له رئيس أو مشرف أعلى منه ... ولو كل واحد فيهم حاسس ان فى رقابة عليه و ان فى محاسبة وثواب وعقاب بعدل و جدية وحزم
لو كل واحد فيهم يعرف ربنا وبيراعيه فى السر والعلن
لو كل واحد من دوول عنده ضمير

لو أى واحد منهم بنى آدم ... ماكانش كل يوم تحصل لنا كوارث بالشكل دا ويضيع بسببها أبرياء

والألم بيبقى اكبر و أكبر لما يكونو أطفال صغيرين

ربنا يرحمهم ويجعل مثواهم الجنة ... ويصبر أهاليهم

و ربنا ياخد اللى كان السبب بداية من أصغر واحد لحد اكبر واحد فى منظومة الفساد اللى بقينا عايشين فيها

Sunday, July 11, 2010

رغى ... رغى

مممممممممممم
أولا : موضوع الحكماء من الجانبين ... كل ماتحصل مشكلة بين طرفين تبتدى تظهر الجملة دى ويبتدى البحث عن الحكماء من الجانبين اللى حيقعدو مع بعض ويصالحو الناس ويروقو الجو خالص
القضاة والمحاميين
المصريين والجزائريين
مشاكل الصعيد و على رأسها مواضيع الفتنة الطائفية ... المسلمين والمسيحيين

طيب لما هو فيه حكماء ... ليه مابيطلعوش الا بعد ماتحصل الكوارث ...؟؟
ليه لما هما حكماء مابيسعوش ومابيخططوش من الأول بشكل سليم عشان ماتحصلش المشاكل أصلا
أكيد عندهم حكمة فى كده ... :D
----------------------------------------------------------------
أنا مؤمن بشكل قاطع ان مفيش حاجة اسمها سلام مع إسرائيل ... الموضوع كله مجرد لعبة القط والفار مابيننا ومابينهم لحد ماييجي الوقت ونكسرهم بشكل نهائى ... لأن المشكلة معاهم مالهاش حل ... حلها انهم يمشو من هنا ... كل واحد منهم يرجع بلده ... ودا طبعا موش حايحصل
----------------------------------------------------------------
الأحزاب المصرية ... بلا وكسة ... شوية طراطير ولا ليهم أى لازمة
كلهم تحس ان الحزب الوطنى ماسك لهم ذلة
-----------------------------------------------------------------
إيه موضوع الأفارقة اللى كل يوم بيحاولو يتسللو لإسرائيل عن طريق حدودنا ...؟؟
كل يومين مسكو تلاتة ... قتلو اربعة ... هو الموضوع دا كان بيحصل من زمان بس ماحدش كان واخد باله او بيتم التعتيم عليه ... ولا هو فى سبب ... انهم كترو اوى فى اخر كام سنة بشكل مريب
-----------------------------------------------------------------


المطالب السبعة للجمعية الوطنية للتغيير
1- إنهاء حالة الطوارئ.
2- تمكين القضاء المصري من الإشراف الكامل على العملية الانتخابية برمتها।
3- الرقابة على الانتخابات من قِبل منظمات المجتمع المدني المحلي والدولي.
4- توفير فرص متكافئة في وسائل الإعلام لجميع المرشحين، وخاصة في الانتخابات الرئاسية.
5- تمكين المصريين في الخارج من ممارسة حقهم في التصويت بالسفارات والقنصليات المصرية.
6- كفالة حق الترشح في الانتخابات الرئاسية دون قيود تعسفية؛ اتساقًا مع التزامات مصر طبقًا للاتفاقية الدولية للحقوق السياسية والمدنية، وقصر حق الترشح للرئاسة على فترتين.
7- الانتخابات عن طريق الرقم القومي، ويستلزم تحقيق بعض تلك الإجراءات والضمانات تعديل المواد 76 و77 و88 من الدستور في أقرب وقت ممكن.

الجمعية الوطنية للتغيير


ردود الحكومة على المطالب السبعة للجمعية الوطنية للتغيير

طبعا مستحيل ننهى حالة الطوارئ لأن كده البلد حاتعمها الفوضى وماتنسوش ان قانون الطوارئ هو اللى بيحمى البلد من الارهابيين والمخدرات ( زى خالد سعيد وعمال المصانع اللى بيتظاهرو عشان حقوقهم والمتظاهرين ضد الفساد) ...

كله فى صالح مصر و شعبها

طبعا مرفوض تمكين القضاء من الاشراف على الانتخابات ... القضاء ليه هيبته ايه اللى حايخللى القضاة ينزلو للصناديق ... ثم منين نجيب قاضى لكل صندوق ( عشان التزوير يبقى براحتنا وكويس اننا لاهيناهم فى مشكلتهم مع المحاميين ) ...

كله فى صالح مصر و شعبها

مفيش حاجة اسمها رقابة خارجية على الانتخابات المصرية ... لأنها شأن داخلى ( احنا ناقصين فضايح قصاد العالم ) ...

كله فى صالح مصر و شعبها

عايزيننا نشغل الناس عن متابعة المسلسلات وماتشات الكورة ببرنامج كل مرشح للرئاسة وخطته للبلد ايه والسياسة والاقتصاد والتعليم ( احنا ناقصين قرف ونتعب نفسنا ونفكر ونخطط كفاية عليهم ... فكر جديد - من أجلك انت ) ... كله فى صالح مصر و شعبها

والله لما ييجو يعيشو فى مصر يبقو يختارو رئيسهم ( التصويت اللى من برة دا موش حانعرف نلعب فيه ) ... كله فى صالح مصر و شعبها

عشان كل من هب و دب يقول لك انا عايز ابقا رئيس جمهورية ( و جيمي حبيبنا يرشح نفسه فى مدغشقر يعنى ولا ايه ...؟؟؟ ) ... كله فى صالح مصر و شعبها

لا رقم قومى ولا بطاقة انتخابية ايه رأيكو بقى ...؟؟؟ احنا عارفين مصلحتكم أكتر منكم ... كل واحد يخليه فى بيته واحنا حانختار له الأنسب والأصلح له ... كله فى صالح مصر و شعبها

Tuesday, July 6, 2010

الشاب الذى عاش إلى الأبد

دى مقالة نشرها دكتور علاء الأسوانى النهاردة فى جريدة الشروق و على موقع مصراوى وحبيت أنقلها هنا كمان عشان أكبر عدد يقراها
-------------------------------------------------------------


بعد أن أغلق خالد باب الشقة ونزل عدة درجات على السلم، توقف فجأة وكأنه تذكر شيئا ثم صعد مرة أخرى وفتح الباب ودخل. كانت أمه جالسة فى الصالة تشاهد التليفزيون، سألها خالد ان كانت تحتاج إلى شىء يحضره معه عندما يرجع بالليل، ابتسمت وقالت انها لا تحتاج إلى شىء والحمدلله. تطلع إليها خالد. اقترب منها وقبل جبينها فاحتضنته وهى تدعو له بحرارة. فكر وهو يخرج إلى الشارع أن الله قد أنعم عليه بأم رائعة وأنه يجب أن يفعل كل ما يستطيع لإسعادها.. عزم خالد على أن يمر على مقهى الإنترنت ليقابل بعض أصدقائه ثم يذهب بعد ذلك إلى محطة الرمل ليشترى بعض اللوازم لجهاز اللاب توب الخاص به.. بدا كل شىء عاديا فى الشارع، الزحام والضجيج وأصوات السيارات وصياح الباعة. دفع خالد بيده باب المقهى ودخل لكنه ما إن قطع بضع خطوات حتى أحس بحركة خلفه.

التفت فوجد شخصين يتوجهان نحوه وهما ينظران إليه بغضب. توقف ليسألهما ماذا يريدان لكنهما، بلا كلمة واحدة، انقضا عليه. أمسك أحدهما به من القميص وبدأ الآخر يضربه بيديه وقدميه بكل قوته. صاح خالد معترضا لكن الرجل الممسك بقميصه راح يضرب رأسه بقوة فى حافة المائدة الرخامية. حاول الزبائن الموجودون فى المقهى انقاذ خالد لكن أحد الرجلين صاح:

ــ احنا بوليس..
عندئذ خاف الناس وابتعدوا. تدفق دم خالد بغزارة ولطخ ثيابه وبدأ يسيل على الأرض. استمر الرجل يضرب رأسه فى المائدة فأحس خالد بألم رهيب وصرخ:
ــ كفاية.. حرام عليكم..

قام الرجلان بسحله على الأرض وهما يكيلان له الضربات ثم دخلا به باب العمارة المجاورة وراحا يخبطان رأسه فى البوابة الحديدية للعمارة بكل قوة. هنا صاح خالد:
ـ كفاية. أنا هاموت..

فصاح أحد الرجلين بصوت أجش:

ـ أنت ميت ميت يابن الكلب.
ظل خالد يصرخ لكن الرجلين استمرا فى مهمتهما: واحد يضرب بيديه وقدميه والآخر يخبط رأس خالد بكل قوته فى البوابة الحديدية. صارت آلام خالد فوق الاحتمال وفجأة حدث شىء غريب. تلاشى الألم تماما. أحس خالد براحة مدهشة كأنما كان ينوء بحمل ثقيل ثم تخلص منه فجأة فأصبح خفيفا وحرا. اختفى المشهد من أمام نظره وساد ظلام حالك. لم يعد خالد يرى شيئا، أحس كأنه نائم ثم فجأة بزغ نور قوى ووجد خالد نفسه فى مكان كأنه حديقة جميلة. أحس خالد بدهشة بالغة ثم نظر إلى جسده وتحسس وجهه فلم يجد أى أثر للدماء والجروح. ظهر أمامه رجل عجوز تبدو عليه علامات الطيبة وابتسم وقال:
ـــ أهلا وسهلا يا خالد..

هز خالد رأسه وهو مازال مأخوذا. قال العجوز بود:
ـــ لقد صعدت إلينا هنا لأنك فقدت حياتك من الظلم. من الآن فصاعدا لن يعكر صفوك شىء أو مخلوق..
ــ أشكرك..
هكذا قال خالد وهو يلتفت حوله. كانت الحديقة مليئة بأشجار وزهور بديعة لم ير مثلها فى حياته. ابتسم العجوز وقال:

ــ ستعيش هنا مع أفضل مخلوقات الله فى راحة تامة وبهجة خالصة. بعيدا عن العالم الظالم الذى جئت منه. الناس هنا سعيدون جدا بمجيئك وقد أرسلوا إليك وفدا ليستقبلك. انظر..
نظر خالد خلفه فوجد ثلاثة أشخاص: وجد رجل فى الخمسين من عمره يرتدى الملابس العسكرية وطفلا فى العاشرة وامرأة محجبة فى نحو الثلاثين من عمرها.. كانوا الثلاثة يضحكون وقد ظهرت عليهم السعادة. قال العجوز:

ــ أقدم إليك الفريق عبدالمنعم رياض والطفل الفلسطينى محمد الدرة وهذه الدكتورة مروة الشربينى..
صافحهم خالد بمحبة واحترام وأراد أن يتحدث معهم قليلا لكن العجوز سحبه من يده قائلا:
ــ سيكون لديك وقت طويل للكلام معهم. أريد الآن أن أريك المكان الذى ستعيش فيه إلى الأبد..

ــ انه مكان رائع لم أر مثله من قبل.
ـــ هل تريد شيئا يا خالد..؟. كل طلباتك مجابة..
أريد أن أطمئن على أمى..

ابتسم العجوز وأخرج من جيبه بللورة براقة ومستديرة تماما، فى حجم البرتقالة وناولها إلى خالد وقال:

ــ إذا أردت أن ترى أى شخص من العالم الذى جئت منه. يكفى أن تفكر فيه وسوف تراه بوضوح فى البللورة..

أمسك خالد بالبللورة وفكر فى المخبرين اللذين ضرباه حتى الموت فظهرا فورا على سطح البللورة.. كانا يجلسان فى مكان يشبه غرفة المباحث فى القسم وأمامهما طعام يأكلان منه بشهية ويتبادلان الحديث والضحكات مع العسكرى الواقف بجوارهما.. ثم فكر خالد فى ضابط الشرطة الذى أعطى الأمر للمخبرين بقتله فظهر فورا. يبدو أنه كان فى يوم الراحة لأنه كان يرتدى تريننج سوت فى غاية الأناقة وقد تمدد على أريكة وراح يتابع مباراة كرة القدم فى التليفزيون. ثم فكر فى الصحفى الذى اتهمه ظلما بإدمان المخدرات فظهر على البللورة فى وضع مخجل جعل خالد يصرف نظره بسرعة ثم قال للعجوز:

ــ لا أفهم كيف يستطيع الذين ظلمونى أن يستمتعوا بحياتهم..
ابتسم العجوز وقال:
ــ كل هذا باطل. لن يهنأ الظالمون بحياتهم أبدا.. لقد كتب الله عليهم المعيشة الضنك حتى تحين ساعة الحساب.

فكر خالد فى أمه فظهرت وقد جلست على فراشه فى حجرته. راحت تقرأ القرآن وتبكى. أحس خالد بالحزن من أجلها فقال للعجوز:
ــ من فضلك. هل يمكن أن تخبر أمى أننى بخير.؟!.
ــ لا أستطيع.
ــ قلت لى ان طلباتى مجابة..
ــ إلا الاتصال بالعالم الذى جئت منه. ممنوع. عموما اطمئن يا خالد. أمك سيدة صالحة ومؤمنة وسوف تصعد إلينا يوما. عندئذ ستسعد بصحبتها إلى الأبد.

ساد الصمت بينهما لكن العجوز بدا عليه الغضب فجأة وقال:
ــ ماذا يحدث فى مصر يا خالد.؟!. أنا حزين من أجل المصريين. لماذا..؟
ــ فى الماضى، كان معظم المصريين الذين يصعدون إلينا من العسكريين.. جنودا وضباطا قتلهم أعداء مصر وهم يدافعون عنها. الآن ومنذ سنوات يصعد إلينا كل يوم مصريون قتلهم مصريون مثلهم..

هز خالد رأسه وقال بأسف:
ــ حياة المصرى لم تعد تساوى شيئا..
قال العجوز:
ــ تصور يا خالد اننا أنشأنا قسما خاصا للمصريين. ان عدد الذين يصعدون إلينا من مصر أكثر من الذين يصعدون من أى بلد آخر. تعال معى..

تبعه خالد وسط الأشجار والورد حتى وصلا إلى ساحة كبرى احتشد فيها آلاف الناس ملامحهم جميعا مصرية. كانوا يبتسمون فى بهجة. أشار إليهم العجوز وقال:
ــ هؤلاء جميعا مصريون قتلهم ظلما مصريون مثلهم.. هنا ستجد الذين ماتوا غرقا فى عبارات الموت والذين احترقوا فى القطارات والذين أصابهم السرطان من الأغذية الفاسدة والذين ماتوا من الاهمال فى مستشفيات الحكومة بالإضافة طبعا إلى الذين ماتوا من الضرب والتعذيب مثلك..

ــ شىء مؤسف..
ــ أنا لا أتخيل كيف يتحمل إنسان ذنب هؤلاء جميعا أمام الله.
ــ وهل المسئول عن موت هؤلاء جميعا.. شخص واحد.
ــ طبعا.. انظر..

نظر خالد إلى البللورة فرأى وجها مألوفا لديه. سأله العجوز:
ــ هل عرفت الشخص الذى أقصده..
ــ نعم..

ــ هذا الرجل لديه فرصة أخيرة..
ــ فرصة أخيرة..؟
ــ لقد أمد الله فى عمره ليمنحه فرصة أخيرة حتى يقيم العدل ويرفع الظلم. أتمنى أن ينتبه ويسعى إلى الإصلاح وإلا فإن موقفه سيكون صعبا للغاية.

ـــ فعلا.. عندما يصعد إلى هنا كيف سيقابل كل هؤلاء الضحايا وماذا سيقول لهم..؟
ــ إذا استمر الظلم فإن هذا الرجل لن يصعد إلى هنا أبدا.. سوف يذهب إلى الضفة الأخرى..

وماذا يوجد فى الضفة الأخرى..؟!
نظر العجوز إلى خالد ولاذ بالصمت

بقلم : علاء الأسوانى


Sunday, June 27, 2010

تلاميذ أحمد سعيد


أول امبارح كنت راكب مترو الأنفاق .... وشوفت ست قاعدة جانبى وماسكة جريدة الأهرام وبتقرا فيها
استغربت جداااا
موش لأن الستات مابتعرفش تقرا
ولا لأن ممنوع قراءة الجرايد فى المترو
لكن انا بقيت بأستغرب جدااا جدااا جداااا لما ألاقى حد بيشترى الأهرام او الاخبار او الجمهورية او اى جريدة حكومية
او من اللى بيتابع الاعلام الحكومى ويصدقه
---------------------------------
عارفين انتم عساكر الأمن المركزى .... الناس الغلابة دى اللى كلهم أميين ومايعرفش هو رايح فين ولا جاى يعمل ايه بالظبط وولاعمره سمع عن أى حاجة فى الدنيا و كلهم جايبينهم من قرى و نجوع مفيش فيها أدنى مستوى من البنية التحتية

وكتير من الناس بتتريق عليهم ويقولو عليهم بهايم .... ودا ظلم كبير ليهم لأن الذنب موش ذنبهم .... الذنب فى النظام اللى وصلهم للمستوى دا وخلاهم كده .... لأنه عايزهم كده وبيستفيد بيهم كده
---------------------------------
أرجع تانى للإعلام الحكومى ... بقيت معتقد ان الاعلام الحكومى هو معمول وموجه لعساكر الأمن المركزى او من على شاكلتهم من حيث مستوى الوعى بإللى حواليهم

أكثر من قناة تليفزيونية عالمية وعربية و عدد كبير من الصحف العالمية والمصرية المستقلة غطت زيارة الدكتور البرادعى للاسكندرية الجمعة اللى فاتت و زيارته وتضامنه مع اسرة الشاب خالد سعيد
وبعد كده تنظيم اعتصام سلمى انضم ليه أسامة الغزالى حرب وأيمن نور وجورج اسحاق و غيرهم كتير
والعدد زاد عن اربع الاف شخص فى الاعتصام وطبعا كان فى جيش من الأمن المركزى محاوطهم عشان يمنع ان العدد يزيد

مصدر_1
مصدر_2
مصدر_3
مصدر_4

نشوف بقى الصحف الحكومية قالت ايه عالخبر دا
زى ماحنا شايفين فى الصورة .... جريدة المسا غطت الخبر بكل حيادية
:D
نضغط كليكة ماوس عالصورة عشان تكبر و نقرا الخبر
---------------------------------------------------------------
احمد سعيد الاذاعى المصرى الشهير فى عهد عبد الناصر .... الناس اللى عاصرت النكسة أكيد تفتكر صوت احمد سعيد وهو بيقول اننا وقعنا تلاتين طيارة وتانى يوم وقعنا خمسين طيارة و ان قواتنا اسرت كام كتيبة .... و غير النكسة على طول عهد عبد الناصر كان اى شخص او جهة مختلفة او معارضة للنظام ... يطلقو عليهم احمد سعيد شتيمة وسخرية واخبار ملفقة واشاعات الخ

وقتها كان كل دا عن طريق الاذاعة بس ... كانت هى دى امكانيات العصر
دلوقتى تلاميذ احمد سعيد لسه على ولاءهم للنظام سواء بقى صحف او قنوات او اذاعات وبرامج

ربنا يستر عالبلد


Sunday, June 6, 2010

التغيير و حركاته - 2

كل مايعملو استطلاع رأى فى مصر عن أكتر شخصية بتحوز على إعجاب المصريين دايما يطلع شخص موش مصرى
فى مرة يطلع أحمدى نجاد ومرة حسن نصر الله وأخيرا رجب طيب أردوغان
والرابط المشترك بين التلاتة هو موقفهم من إسرائيل
---------------------------------
قصة هشام طلعت مصطفى و محسن السكرى وسوزان تميم قصة مثيرة و أجمل من كل مسلسل أو فيلم .. أكشن و حب و وفن وسلطة ونفوذ وغنى فاحش و كوميديا كمان
فطبيعى انها تستحوذ على اهتمام كل الناس وموش فى مصر بس لا دا فى الوطن العربى كله
---------------------------------
عاجبنى أوى الثنائى إبراهيم عيسى و ريم ماجد فى برنامج بلدنا بالمصرى على أون تى فى ....واللى عاجبنى أكتر هى مساحة الحرية اللى واخدينها فى البرنامج بحيث يقولو مابدالهم
---------------------------------
عارفين لما يكون فى عيلة محترمة وكافية خيرها شرها زى مابيقولو .. و بعدين يطلع لهم ابن صايع ولا متشرد ويجيب لأهله الكلام والمشاكل وسخط الناس .. دا بالظبط كان موقف زكريا بطرس
زكريا بطرس .. فى رأيى انه مادة إعلامية مثيرة موش أكتر .. زى كده لما قناة تجيب نجم كبير فى مجاله عشان تجيب اتصالات واعلانات و تحقق نسبة مشاهدة عالية وتكسب من وراه .. سواء نجم رياضى او موسيقى او سياسى او دينى
فزكريا بطرس حقق دا لقناة الحياة القبرصية .. بأسلوبه فى الهجوم على الإسلام والقرآن طول الوقت فقدر فعلا انه يعمل صدى واسم للقناة .. لكن هنا بيظهر لنا ان فكر القناة كان تجارى بحت .. موش همهم الديانة المسيحية او مصلحة الناس زى مابيقولو .. كان همهم تحقيق انتشار للقناة بين مسيحيين الشرق الأوسط وتحقيق نسب مشاهدة عالية
وانتبهو بعد كده لخطأ تانى لما جابو واحد زى زكريا بطرس واطلقو يده على البحرى ..... ان زكريا بطرس جاب أثر عكسى .. وبدأ كثير من شيوخ المسلمين يردو عليه ( بـ لؤم ) .. عملا على نظرية اللى بيته من إزاز
---------------------------------
خالد الجندى و أحمد الطيب و على جمعة .. بردو من نجوم الإعلام الديني وان كانو مروضين .. يعنى ( بيسمعو الكلام ) الحكومة تقول دا حلال يبقى حلال ... الحزب الوطنى يقول دا حرام .. يبقى حرام
ويمكن موضوع النقاب مع على جمعة هو أوضح حاجة على كده
---------------------------------
مرشحى الحزب الوطنى اللى سقطو فى الانتخابات بيعترفو بالتزوير اللى حصل لصالح منافسيهم .. لا تعليق
---------------------------------
مؤخرا وبعد ماسقط كل مرشحى الإخوان المسلمين فى إنتخابات مجلس الشورى وعند بعند بقى
الاخوان يعلنو تأييدهم للدكتور محمد البرادعى ويبدأون فى جمع التوقيعات لصالحه
---------------------------------
هى مصر رايحة على فين ..؟؟ ربنا معانا

Monday, May 31, 2010

التغيير و حركاته

كالعادة كنت باخد جولة سيبرية على مواقع الانترنيت
فدخلت على موقع الجماعة الاسلامية ... وطبعا عشان الناس تبقى عارفة
الجماعة الإسلامية غير الاخوان المسلمين .... دى جماعة و دى جماعة .... الجماعة الاسلامية هما اللى كانو اغتالوا الرئيس السادات ... وقتها كانت عندهم أفكار تكفيرية للمجتمع والحاكم الخ ... وبعد كده تراجعو عن أفكارهم دى على الأقل رسميا

المهم لقيت مقال عالموقع دا اللينك بتاعه ..... نعم .. أنا لا أريد البرادعي

واللى يتابع مقالات عبدالله كمال على روزاليوسف وا اسامة سرايا فى الاهرام او ممتاز القط فى الأخبار .... حاتلاقوهم كلهم بيتكلمو بـ لسان واحد .... لا للبرادعى

المقال اللى على موقع الجماعة الاسلامية انا كتبت عليه تعليق قلت فيه
----------------------------------------------------------------------
طالما موش لابس توبى يبقى (وحش) بكسر الواو


اللى بيرفضو البرادعى موش بيقدمو بديل .. هما عايزين الوضع يبقى كماهو عليه .. لو بديل يبقى هما وغيرهم لأ

يعنى الناس عايزة تغيير يبقى احنا البديل وإلا لا..
لا احنا ولا غيرنا

أنا نفسى حد يرفض البرادعى على أسس منطقية .. لكن كلهم بيكرروا كلام الحزب الوطنى .. والدليل انهم مابيبحثوش ورا صحة الكلام دا ..
للأسف الحزب الوطنى جهز ردود وأسباب رفض للبرادعى .. تناسب كل الفئات .. الاسلامى و العلمانى والجاهل والمتعلم والأمى

ونشر الكلام دا .. وبكل (براءة) الناس تلقت الكلام دا وبدأت تردده

طبعا من وجهة نظر الجماعة الإسلامية البرادعى ماينفعش وأيمن نور وعمرو موسى والسيد بدوى بتاع حزب الوفد ورفعت السعيد و و و و
لازم يكون واحد منهم
------------------------------------------------------------

طبعا اليومين دوول كله ملاحظ لافتات الدعاية للمرشحين عشان مجلس الشورى فى كل مكان فى القاهرة وطبعا فى كل محافظات مصر
بس انا لاحظت ان كل اللافتات للحزب الوطنى ... فين لافتات مرشحى الاحزاب التانية .... واحد صاحبى قاللى ممكن تلاقى لافتات المستقلين اللى بعد مابينجحو ويدخلو المجلس بيضموهم للحزب الوطنى .... اللى هما طبعا معاه من الأول لكن لزوم الديمقراطية
-------------------------------------------------------------
تصريحات احمد نظيف وصفوت الشريف وعلى الدين هلال واحمد عز و كل الناس الحلوة دى .... كتير من المتابعين بيقولو انهم بيتكلمو عن بلد تانية او شعب تانى .... لكن رأيى الشخصى انهم هما عايشين فى زمن تانى وكوكب تانى
--------------------------------------------------------------
فكرة المثل الأعلى ... بتغيظنى أوى .... مفيش حاجة مطلقة اسمها كده
لكن فى ان كل شخص له عالم مختلف عن شخص تانى بكل احداثياته الزمانية والمكانية وكل ظروفه المختلفة
وان ممكن ان فلان يعجبنى فى كذا ... فى تصرف فى خلق فى شئ ما
---------------------------------------------------------------
لسه عايز أتكلم عن هشام طلعت مصطفى وابراهيم عيسى وخالد الجندى وزكريا بطرس .... بس حخليها المرة الجايا


Thursday, April 22, 2010

الشحاتين بيشوهو صورة مصر و إحنا موش معاهم

 

الشحاتين بيشوهو صورة مصر و إحنا معاهم

 

إمبارح كنت فى مطار القاهرة منتظر وصول عمتى

 

ونا رايح المطار ركبت التاكسى الأبيض الجديد أبو عداد  .. انا من أكتر الناس اللى فرحو بالتاكسى الجديد دا .. عشان بأستريح فى الحساب

 

لكن الطبع يغلب التطبع .. مفيش فايدة .. زى ماكنا بنقول قبل كده عالتاكسى الاسود العادى انهم موش بيقدرو المشوار يتكلف كام .. لكن بيقدرو الزبون ممكن يدفع لحد كام  .. فحتى ابو عداد بردو بيعملو الحركات دى ..  لغاية ماوصلت المطار العداد عمل 15 جنيه ونص قمت طلعت 16 جنيه  ناولتهم له وبنزل من التاكسى .. لقيته بيقوللى يا باشمهندس .. لوهلة قلت فى نفسى معقولة حيرجع لى النص جنيه ..؟؟ لقيته بيقوللى بنبرة لوم انت كده بالظبط يعنى دانا حرجع فاضى وانت شايف المشوار .. قلت فى نفسى ( مفيش فايدة الشحات بيفضل شحات طول عمره ) مهما يحاولو ينضفوهم وتاكسيات جديدة وبدل مايشتغلو بكرامة .. بردو طبع التسول ( والاستقطاع ) فيهم

 

مفيش فايدة طبعا .. المهم ماعبرتهوش ونزلت  .. بعد ساعتين بيتكرر المشهد بس طالع من المطار انا وعمتى وبحاول اوقف تاكسى بردو من الابيض ابو عداد .. وقفت أول واحد بأقول له مصر الجديدة الميريلاند فقاللى تدفع كام .. قلت له كام ايه ..؟؟ موش حسب العداد ..؟؟ قاللى لأ من هنا مفيش عداد .. قلت له كام يعنى .. قاللى 60 جنيه

على هذا المنوال لمدة نص ساعة المشوار اللى انا جيته بـ 15 هما عايزين فيه 60 و 55  كلهم متفقين على نفس السعر وان من المطار مفيش عداد لكن بالمقاولة

 

 

جوا البلد بقى مفيش مرة يطلع العداد بـ 7 او 8 او 9 وتديله 10 جنيه ويرجع لك باقى .. هما طول الوقت مفيش معاهم فكة فإما تكون ماشى بفكة او تسيب الباقى

 

وهكذا .. موش عارف ليه الإصرار على تشويه الصورة الحلوة .. بدل مانبدل التاكسيات عايزين نبدل  مفاهيم الناس وأخلاقهم ..

انا ماروحتش لبنان قبل كده .. لكن كل اللى راح بيرجع يشكر فى الأدب والذوق المتناهى فى التعامل مع الأجانب والأغراب عن البلد تحديدا

وبالعكس الصورة المعروفة عن مصر وخاصة لكل الأشقاء العرب انه من ساعة مايدخلو مصر من المطار من أول سواق التاكسى .. فكل واحد بيحاول يستغلك على قد مايقدر بشتى الصور وبكل أنواع الشحاتة والنصب

 

كل يوم بأركب الـ C.T.A   من التحرير لمصر الجديدة .. حفظت شكل الشحاتين .. ممثلين بارعين جدا و أداءهم ثابت على مدى سنتين تقريبا هما هما بنفس كلامهم وطريقتهم

كل سنة مع موسم الصيف يبتدى موسم الشحاتين .. والشحاتة أنواع و أشكال

 إضافة :

كل نظام حكم فى العالم له مساوئ وله مزايا .. ونظام الحكم الحالى فى مصر بردو له مميزات وله مساوئ .. وأكبر مساوئه انه جعل الشعب يتمنى التغيير  و خلاص .. أى حد غير الناس دى .. أى حد .. لو اللمبى رشح نفسه  حايلاقى مؤيدين ..

 

أيمن نور .. عمرو موسى .. محمد البرادعى .. إلخ

 

الناس كلها عندها فكرة ان اى شخص واى حكومة تانية أكيد أكيد أفضل من اللى موجود لأن مفيش أسوأ من كده

 الإضافة الأخيرة تابعة لنفس عنوان البوست 

Sunday, March 14, 2010

عصر البجاحة

 

0900

دكتور الريجيم والنحافة والتخسيس

اختار الرنات اللى تناسبك

الموضة السنادى الفوشيا مع الأخضر

موضة لفات الطرح

كورة كورة كورة كورة ... اهلى زمالك منتخب .. جماهير وشماريخ .. شوبير و مرتضى .. مدحت شلبى وعلاء صادق .. مصر والجزائر ..

حفل توزيع جوائز السينما المصرية .. تصريحات النجمة :انا بأرفض انى اطلع فى مشهد ساخن او مشهد عرى او انى البس مايوه .. الا اذا كان المشهد متوظف ضمن الدور

فيلم للكبار فقط

..........................

قضايا التحرش .. فى الأعياد والمواصلات

حتى الآن لازالت عقوبة الاغتصاب هى السجن فى معظم الأحوال وعقوبة الاعدام صدرت فى حالات قليلة جدا ولم تنفذ لان فى طعن واستئناف بيوصلها فى الآخر لحبس

...........................

لازال اختيار شاغلى المناصب الكبرى ليس بالكفاءة ولكن بمعايير اخرى او بمنطق : حيبقى الراجل بتاعنا ولا لأ ..؟؟ حيقدر ينفذ كل كلامنا ويوجد له الشرعية المناسبة

.......................................

غلاء الأسعار اللى فى ازدياد مستمر لأسباب كتير على رأسها فساد المسؤولين وعدم كفائتهم

...........................

لازالت الحكومة بتعامل الناس على انهم لسه فى الخمسينات او الستينات .. جهل مطبق وأمية كاسحة و شعب مغيب عن كل شئ إلا لقمة العيش ...

يمين يمين .. شمال شمال ... غيبوبة الاعلام الحكومى راديو وتليفزيون وصحف .. لسه مفيش قنوات فضائية ولا انترنيت

لسه فى عصر أحمد سعيد اللى كان بيقول لنا فى النكسة اننا وقعنا 50 طيارة اول يوم وتلاتين طيارة تانى يوم

والناس فرحانة ومصدقة ............

 

احنا فى عصر البجاحة .. والبجح فى الموروث الشعبى المصرى هى انك تكون غلطان ومخطئ والغلط راكبك من ساسك لراسك زى مابيقولو .. ومع ذلك .. ولا كأن فى حاجة .. تكابر وتعلى صوتك وتتهم غيرك بالباطل كمان وتستغرب من اللى يقول عليك كلمة

 

بصراحة الأخبار بقت تغممممم .. من التليفزيون من الجرايد من النيت ... حاجة تغممم 

 

كل الأخبار بتدل على فساد الضمائر وضعف النفوس و و ...  البجاحة

 وزير الاسكان السابق اللى خصص اراضى بملايين لأولاده ومراته واخواته وعيلته كلها وفيهم ناس عندهم 13 سنة .. لما بيسألوه بيقولو ان كل ورقه قانونى ..!!!!!


عضو مجلس الشعب اللى اتصور فيديو وهو داخل صالة قمار ولما يحققو معاه يقول اصل كان فى واحد بيتخانق جوا وداخل افض الخناقة .. والكاميرا مصوراه لحد ماقعد عالترابيزة



هل أنا موش شايف غير الاخبار السيئة ..؟؟

هل العيب فيا أنا ..؟؟

هل أصبت بمرض بيخليني ( أفلتر ) الأخبار وأشوف منها السئ بس  ..؟؟

هل أنا لوحدى ولا دا مرض معدى ..؟؟

 

كم رهيب من الغبااء والهيافة وانعدام الأخلاق و .. البجاحة .. بيطل على كل يوم سواء فى الشارع فى المواصلات فى التليفزيون فى الجرائد الحكومية او الخاصة .. على النيت .. فى كل مكان

 

ربنا يرحمنا

 

Sunday, March 7, 2010

محمد البرادعى

كل المقالات اللى بتتكلم عن البرادعى عادة بتبتدى بكلمة : بـغض النظر عن أى حاجة

 

كمان اللى واخدين صف ضده لازم يكتبو فى مقالاتهم كلمة : ؟ أعتقد أننا فى حاجة ماسة لرئيس عاش بيننا، ويعلم مواطن الفساد ومخابئه

 

الكلمة الأولى بتوصل انطباعات كتير .. ممكن مساوئ معينة فى البرادعى او اختلافات معاه فى بعض الأراء من وجهة نظر الكاتب

 

الكلمة الثانية بتوصل لى انا تحديدا انطباع معين هو :

ان كل الرؤساء اللى مرو علينا وكانو عايشين مابيننا وعارفين كل مشاكلنا هما اللى عرفو يحلو المشاكل دى وازاى يديرو ويخططو عشان بلدنا صح

 

كمان كلمة احنا موش عايزين واحد ييجيلنا من برة وموش عارف عننا حاجة

الرد : يعنى هو اللى جوا عارف عننا حاجة ..؟؟؟

 

موش مسألة عارف وموش عارف .. مسألة نظام يتطبق صح وفكر تخطيطي وتنفيذى صح

يمكن الناس اللى دارسة ادارة تستوعب أكتر اللى عايز اقوله .. ان المدير الناجح فى قمة الهرم الإدارى بيخطط صح وبيختار طقم المساعدين والناس المناسبة فى الأماكن المناسبة

نظام يتبع وخطة تنفذ ورقابة ترسى مبدأ الثواب والعقاب

 

دا بشكل عام .. لكن بشكل خاص بمصر بس .. فالدكتور محمد البرادعى موش سويدى او تايلندى دا مصرى واتربى و اتعلم فى مصر وبحكم منصبه الأخير كان شغله كله فى منطقتنا العربية والشرق الأوسط

 

ربنا يكرم مصر بخير أولادها ويكرمهم بخير مصر

Thursday, February 11, 2010

سجين الرأى


حرية الصحافة وحرية الكلمة والقلم الحر .. والديمقراطية .. و لا لسجناء الرأى

يمكن الكل تابع أو سمع عن قضية جريدة البلاغ والخبر اللى نشروه عن شبكة سميراميس للشواذ وان كان من ضمنهم فنانين  زى مابيقولو

كمان قضية ياسر بركات ومصطفى بكرى فى جريدة الموجز

و قبل كده ايام حادثة بنت ليلى غفران واللى انكتب وقتها فى الجرايد المختلفة ورجعو بعد كده اعتذرو

 

أولا مفيش اى علاقة بين انك تقول رأيك ونقدك بكل أدب واحترام وانك تسب وتدعى وتكذب وتلفق لمجرد الشهرة وزيادة كمية التوزيع للجريدة او المجلة .. للأسف جو الصحافة والاعلام  جو قائم على الاثارة والادعاءات  اللى هدفها جذب القارئ او المشاهد لا أكثر عشان نبيع اكتر ونجيب اعلانات اكتر .. والفوضى دى سببها غياب الرقابة والعقوبات الرادعة  .. الرقابة والعقوبات الرادعة دى لازم تكون مطبقة فى كل مجالات الحياة ..

 

موش كل صحفى يفبرك خبر أو موضوع او يشتم ويسب او بنتهك عرض اى انسان على صفحات جريدته او مجلته  ويتحاسب ويسجن يبقى سجين رأى .. المقصود بكلمة سجين الرأى ,, هو سجين (الرأى المحترم)  اللى له هدف وقيمة تخدم الناس والمجتمع وتفيدهم او بتسعى لمصلحتهم

 

لكن أشهر بالناس واشتم فيهم وأشوه سمعتهم وسمعة عائلاتهم و لما اتحاسب اقول انا سجين رأى ومفيش حرية ومفيش ديمقراطية .. الحرية لازم يوازيها مسؤولية تقدر الحرية دى وتحميها من الطيش



Wednesday, October 7, 2009

أبى








فى يوم 8 أغسطس الماضى توفى أبى رحمه الله

هذه صور له هو و زملاؤه فى حرب أكتوبر

سعيد محمود ابراهيم البيه

Sunday, March 15, 2009

مجرد كتاب

كتب كتير أوى اتجمعت عندى
حاجات اشتريتها من معرض الكتاب ولسه ماقريتهاش .. كتب اليكترونية عمال بجمع فيها انا ومجموعة من اصدقائى قربت على 30 جيجا تقريبا

كتب كتب كتب فى كل المجالات تقريبا .. وموش لاقى وقت خالص أقرا اى حاجة .. كل فترة بأختلس فترات اقرا فيها كتاب ومابحبش ابدأ فى كتاب من غير ما انهيه

البشر ...كل واحد منهم كتاب مختلف عن التانى ... سواء فى الجلاد او التغليف او الصورة اللى برة او اسم المؤلف او المحتوى
لما فكرت فى موضوع تشبيه البشر بالكتب لقيت ان
شكل الكتاب من برة هو مماثل لشكل البنى آدم يعنى ممكن يكون كتاب شكله فخم .. او جلدته مقطعة .. ممكن يكون حجمه كبير .. او صغير .. ممكن يكون ملون وعليه رسومات وممكن يكون ابيض واسود ومفيش فيه اى بهرجة خالص ... كمان الكتاب الجديد ممكن يجرح بكل سهولة لان حواف اوراقه بتكون حادة وقاسية والكتاب القديم بتكون أوراقه لينة او مهترئة حسب عمره(هل بتكون عنده خبرة ومعرفة انه مايقسوش على قراءه ومتصفحيه .. بعكس الكتاب الجديد معدوم الخبرة فى التعامل مع البشر)
اما بالنسبة للمؤلف .. فالمؤلف هو بمثابة الأصل .. المصدر .. الأب و الأم
المؤلف هو (الكل) اللى بيعطينا (جزء) منه
كمان حجم الكتاب .. هل هو ثابت ..؟؟؟
معظم الكتب حجمها ثابت .. قليل منها حجمها بيكبر مع الزمن .. زى اليوميات والمذكرات وبعض معاجم المصطلحات
يمكن موضوع ارتباطى بالكتب من صغرى هو اللى خلانى اربط بين البشر والكتب .. طبعا مجرد تشبيه قاصر لكن بستريح له
ساعات بأشترى كتاب بالشئ الفلانى لمجرد اسم مؤلفه .. وبعد كده أندم انى اشتريته
وساعات بأشترى كتاب بالصدفة .. و يفضل مركون (مركون : أى موضوع فى ركن ما) قدامى فترات طوييييلة ومفيش عندى أى شغف انى افتحه وأقراه .. ولما يحصل .. أندم بردو انى إتأخرت كل دا فى قراءته

فى كتب عمرى ما أنساها أبدا .. وكتب كل ما أقراها أشعر بشعور أول مرة قريتها من المتعة والفايدة (شعور زى النور اللى بينور جواك فجأة)
وكتب تانية بكملها بالعافية وبحس انها تقيلة على قلبى اوى .. ومرة وحيدة مقدرتش اكمل كتاب ورميته من غير مااكمله

فى كتاب ونا شايله فى ايدي الناس تنظر لك بإستهزاء او سخرية .. وكتاب تانى بينظروا لك بإكبار واحترام .. وكتاب تانى بيخوفهم منك

انا اتعلمت ومؤمن ان الغريب غبى .. بمعنى بما انى غريب عنك فأكيد حكون بالنسبالك غبى فى حاجات كتير والعكس بالعكس
اتعلمت انى مااستغربش حاجة مهما كانت من غير ماأتأكد انى عرفت كل خلفياتها وجوانبها

لما بأقابل شخص جديد .. مثلا زميل جديد فى الشغل .. طبيعى ان جهاز التصنيف والتنميط جوايا بيشتغل ويحددله (Category) خاص بيه

بس بقيت بأحتفظ بأفكارى وارائى دى جوايا موش بظهرها ابدا لحد ما اقراه كله .. اقصد اتعرف عليه اكتر من التعامل معاه

ادعولى اقدر الاقى وقت اقرا الكتب اللى عندى .. و أنا آسف عالفترة اللى فاتت واللى جايا كمان لان الظروف هى هى .. بس ان شاءالله على قد مااقدر ححاول اتابع جو المدونات من تانى لان كل مدونة عبارة عن كتاب بردو
دا إيميلى .. سواء عالماسنجر او الفيس بوك عشان تتعرفو بالكابتن حنتيرة
samerawy@hotmail.com

Tuesday, December 30, 2008

فضفضة عالسريع

ليا أكتر من شهرين ماكتبتش حاجة عالمدونة .. بسبب ان الوقت كان معاندنى شوية وكمان الرغبة فى الكتابة
..
ساعات كان يبقى فى فكرة ما او موضوع ما عايز افضفض عنه لكن بعد خمس دقايق بالظبط الرغبة دى تروح
..
كمان كتير كنت ادخل مدونة ما وألاقى بوست يعجبنى اوى .. لكن ما الاقيش عندى رد او تعليق .. موش عارف موضوع الرغبة فى الكتابة سواء موضوع جديد او رد على موضوع دى بتيجي من ايه وبتختفى من ايه .. الله اعلم
زى بالظبط الرغبة فى القراءة .. ساعات نفسى تتفتح للقراءة بشكل شره .. وساعات نفسى تتسد موش عارف ليه .. غالبا الموضوع حسب الحالة النفسية للشخص..
وحتى دلوقتى انا لسه فى مود عدم الرغبة فى الكتابة .. لكن أوقات كتير فى حاجات بتستفز الواحد انه يغير موده ويكسره غصب عنه
ودا حاصل معايا حاليا ..

غزة – بوش والجزمة – غزة – قضية بنت ليلى غفران – غزة – أعياد و احتفالات الكريسماس – غزة – أوباما – غزة – كاس الخليج الـ 19 – غزة – الأهلى و الزمالك – غزة – وفاة الحاج مدبولى (صاحب مكتبة مدبولى) – غزة – حسام و ابراهيم حسن – غزة – الحكم فى قضية المدرس اللى قتل التلميذ فى اسكندرية – غزة – هشام طلعت و سوزان تميم – غزة – الدكتور مصطفى السيد مبتكر علاج السرطان – غزة – حالة التعليم فى مصر – غزة – الحالة الاقتصادية – غزة – نهى رشدى و الحكم فى قضية التحرش -- غزة – إسرائيل – غزة – أمريكا – غزة – الدول العربية – غزة – فتح و حماس – غزة – غزة – غزة – غزة
فلسطين
مصر

بردو ماليش نفس اكتب اى حاجة دلوقتى ..

Saturday, October 18, 2008

نون .. ظل الأفعى .. الأنثى

نون
ظل الأفعى
--------------
من فترة قريبة خلصت رواية نون لـ سحر الموجى
ساعة ماخلصتها بعت رسالة لواحد صاحبى كان دا نصها
I finished NooN
Sooooo Humantik
Sooooo Astrojinitek
Toutched my inside very deep
كنت حضرت قبل كده ندوة وكانت سحر الموجى هى اللى بتديرها بس وقتها ماكنتش لسه قريت نوون و شتان ما بين حالتى واهتمامى وقتها بالشخصية دى وحالى بعد ما قريت نوون
الرواية دسمة و ممتعة جدا واللى يقراها من غير ما يعرف مؤلفها ,, حيحس علطول انها مؤلفة أنثى فاهمة كويس اوى وبتعبر بشكل جميل جداا عن مشاعر الأنثى
الرواية اجتماعية بتتناول أكتر من جانب من جوانب حياتنا وخاصة الجوانب العاطفية منها ,, وبتوضح لنا أكتر من نقطة زى احتياج الحبيبة لشعور الأب والأمان فى حبيبها واحتياج الحبيب لشعور الأم والحنان والسند فى حبيبته شعور كل واحد منهم انه ملجأ للآخر وان الآخر ملجأ ليه
كمان نقطة الإستغراب من تغير شخصياتنا بمرور الزمن مع إختلاف المؤثرات والضغوط المختلفة
و شئ كمان هو مناقشة نقطة اننا لما بنكون فى حالة حب وتنتهى الحالة دى بأى شكل ونشعر بحنين للفترة دى ,, هل شعورنا دا للشخص أو الإنسان اللى كان مشاركنا الحالة دى ولا شوقنا دا للحالة نفسها بكل مشاعرها وافراحها والامها وجنانها وسعادتها بـغض النظر عن الشخوص او الانسان دا تحديدا
دى سطور من الرواية
( لا يمكنك أن تقترب من الورود و لا يجرحك شوكها ,, و إن لم تنزف تجمع الدم الفاسد فى شرايينك فسممها فمت )
( إرتجف صوتها ببحة دموع تتأهب للمجئ : كان لسه عندنا حاجات كتير نعملها مع بعض .. أفلام هنشوفها و كتب هنقراها و صناديق قديمة لينا قلنا هنفتحها و نشوف عقدنا و مشاكلنا ونبقى مع بعض و إحنا بنحلها .. كانت لسه دنيتنا واسعة )
---------------------------------------------------------------------------------------
من حسن حظى أو قدرى انى بعد ما خلصت رواية نون بدأت فى رواية ظل الأفعى لـ يوسف زيدان
يمكن كنت اتكلمت قبل كده عن الدكتور يوسف زيدان مؤلف رواية عزازيل
رواية ظل الأفعى بإختصار كده بتتكلم عن الأنثى فى الثقافة البشرية وعلوها ودنوها من زمان لزمان ومن مكان لمكان
يمكن جمعيات حقوق المرأة حتعجبهم أوى الرواية دى
أحداث الرواية بكاملها بتدور فى سبع ساعات تقريبا ,, يمكن فى ظلم شوية لشخصية الرجل او بمعنى أصح ماينفعش نعمم حالات او صفات معينة سواء على الرجل أو المرأة
انا حسيت انها دراسة او بحث اكتر منها رواية ,, لكن فى المجمل عجبتنى أوى وخليتنى أفكر كتير
------------------------------------------------------------------------
الفترة اللى فاتت حصل عندى زحمة فى دماغى ,, حاجات كتير كنت عايز اكتبها عالمدونة هنا وموش لاقى وقت او فرصة ,, وقررت انى فى اول فرصة أبدأ بالروايات اللى خلصتها الأول وان كان تعبيرى دلوقتى عنها اكيد ناقص وفقير جدا عن تعبيرى بعد انتهائى من قراءتها مباشرة