Saturday, July 30, 2011

من وحى جمعة 29 يوليو

إسلامية إسلامية .... لا شرقية ولا غربية
تكبييير ... الله أكبر .. ألله أكبر
------------------------------------------------------
الشعب يريد تطبيق الشريعة
تكبييير ... الله أكبر .. ألله أكبر
------------------------------------------------------
الصحاااافة فيين .. الإسلااام أهوه
تكبييير ... الله أكبر .. ألله أكبر
------------------------------------------------------
إرفع رااسك فووق .. انت مسلم
تكبييير ... الله أكبر .. ألله أكبر
------------------------------------------------------
يا علمانى فينك فينك .. الإسلام بينى و بينك
تكبييير ... الله أكبر .. ألله أكبر
------------------------------------------------------

دا جزء من الهتافات إللى كانت بتتقال النهاردة

النهاردة أنا وصلت الميدان قبل صلاة العصر بـ ربع ساعة تقريبا

من أول وصولى لمحطة المترو كان واضح ان الأعداد مهولة ... لأن الناس كانت زحمة جدا فى محطة المترو وناس كتير قاعدين و نايمبن عالأرض .. و لما طلعت فوق إستعدت تانى ذكريات المليونيات اللى كانت بتتعمل فى أول شهر فبراير قبل التنحى ... نفس  الشكل المهيب للميدان والأعداد الجبارة و  الهتافات إللى بترج الميدان .. مع فرق واحد

إن الغالبية العظمى للمتواجدين بالميدان تبع التيارات الإسلامية سواء  السلفيين أو الإخوان أو الجماعة الإسلامية

كل الناس إللى غير تابعين للتيارات دى كانو بيقولو ان التيارات الدينية ما إلتزمتش بـ وعدها معاهم وحولو التظاهرة لصالحهم هما بس وابتعدو عن النقاط اللى هما اتفقو عليها

لكن إللى شوفته بنفسى .. إنهم ما إبتعدوش عن النقاط إللى اتفقو عليها بالعكس .. كانو كل شوية بيهتفو بيها من على المنصات

لكن أضافو إليها الهتافات  إللى ذكرتها فوق

شئ تانى حصل .. ان من  الشارع اللى ناحية المتحف لقيت مجموعة حوالى 20 نفر تقريبا شايلين لوحة مكتوب عليها مطالب مشتركة - وطن واحد ... و الإمضاء تحت : إئتلاف شباب روكسى

مشيت وراهم أشوف حايعملو إيه .. استمر و بالمشى خمس دقايق بالظبط وبعدين وقفو يتفرجو ماهتفوش خالص وبعد شوية مشيو 

بعد كده عرفت ان الإئتلافات السياسية التانية إنسحبت .. و تركت الميدان

الدنيا كانت شديدة الحرارة .. وكان الناس كل شوية بتجيب زجاجات مياه وترشها عالناس .. و كان فى ناس فى بلكونة جايبين خرطوم مياه و بيرشو عالناس .. عشان الحرارة

المهم أنا مشيت بعد صلاة المغرب علطول

الأفكار اللى دارت فى بالى

إننا لسه بيتم التفريق ما بيننا بـ سهولة

هل فيه حد قال ان مصر ستفقد هويتها الإسلامية ..؟؟

نقطة كمان .. أنا شايف انه ماكانش المفروض ان الإئتلافات التانية تمشى و تنسحب من الميدان

آخر حاجة .. هل ستثق الإئتلافات السياسية المختلفة بعد كده فى التيارات الدينية عند أى إتفاق
  
-------------------------------------------------------
ملاحظة نسيت أضيفها

النهاردة أعلام مصر كانت قليلة أوى

 لإما أعلام سودا عليها الشهادة ... أعلام الإخوان المسلمين
لإما أعلام بيضا عليها الشهادة ... أعلام حزب النور السلفى
لإما  علم بنفس ألوان مصر لكن بدل النسر الشهادة
لإما أعلام السعودية

3 comments:

Tears said...

كانت جمعه كندهار سكوير و نفس الاعلام السودا اترفعت مع المسلحين اللى قتلوا ضباط الجيش فى العريش و هاجموا الاقسام فى نفس اليوم اللى كان تجار الدين رافعين صورة بن لادن فى ميدان التحرير رمز الحرية..ربنا يخسف بيهم الارض شوية نصابيين

كل سنة و انت طيب

رمضان كريم

:)

مؤنس فرحان said...

تيرز
وانتى طيبة وبالف صحة و سلامة

فعلا من ضمن الحاجات اللى ضايقتنى بردو يومها هى صور بن لادن و عمر عبد الرحمن .... إيه علاقة الناس دى بثورتنا و مطالبنا ..؟؟

بس العذر الوحيد للناس دى انهم أول مرة يشتغلو سياسة و كانو مكبوتين سنين طويلة بعيد عن السياسة شغالين دعوة و دين وبس .. حتى دا كان واضح فى لغة الخطاب على المنصات ... نفس الكلام اللى بتسمعيه فى القنوات الفضائية الدينية ... مالوش اى علاقة بالسياسة خالص

ممكن نسميها مراهقة سياسية ... حاجة أول مرة بيجربوها و بيتعلموها

مع الوقت حايفهمو ان السياسة لعبة توازنات و مصالح مشتركة و إللى موش ححتاجه النهاردة ححتاج وقوفه معايا بكرة

المشكلة انهم بيتعلمو فى وقت صعب أوى بيمر عالبلد

ان شاءالله مصر تبقى أحسن و أحسن بكتيير

sandy senlldy said...

2014 has started, and a new year means a new louis vuitton replica chance to update our wardrobes, and our selves, as fashion's constant evolution takes new turns and inspires new themes. From the coldest nights of winter to the hottest summer days and everything in between, at Fashion's we'll be keeping you on trend and in fashion fake gucci belts right across 2014. As we do each year, we're publishing a guide to this year's best looks and major trends. After the break you'll be able to explore the best of what's in fashion in 2014, from the clothes to the accessories, from the hairstyles to the hair colours, for men and swiss replica watches for women. We'll be frequently updating all our trend guides across 2014, so make sure you stay up to date with all the latest fashion trends by subscribing to Fashionising. The spring 2014 season has shuffled off the runways of the big four fashion capitals, giving us plenty to look forward to. But let's face it; we're impatient. Not only do we want these pretty, shiny new things now because they're pretty, new and shiny, we want them so we can get on top of longchamp outlet the trends before everyone else does. It's not only fun to be first, but the surest way to invest wisely in 2014 fashion pieces that will last. And so, to help you get on top of what's in store, here are 5 spring / summer 2014 fashion trends you can start to wear now.