Thursday, April 10, 2008

أشياء بداخلى

فى شوية أفكار وظنون ومعتقدات واستنتاجات معششة جوايا الفترة دى ,, دلوقتى ونا عندى 29 سنة
لما طلعتها عالورق لقيت ان اراء كتير منها (أفكار صبيانية أوى) ,, وحاجات تانية عبارة عن تساؤلات تدل على الحيرة والشتات الفكرى وحاجات تالتة بتدل عليا انا بس المهم انا قررت اطلعها هنا عالمدونة
مفيش بنت عاقلة
الموظفين الرجالة معظمهم مرتشين ,, الموظفات لأ ,, موش عارف ليه ؟؟
معظم الناس إللى شغالين فى المطارات والموانئ لإما حرامية لإما شحاتين
الإمارات حكومة و شعب ناس محترمين جدا والحكومة عاقلة أوى
موش عارف ليه معظم المدونات إللى عجبتنى أصحابها بنات
معظم الناس المثقفة والمحترمة اللى عرفتهم بأى طريقة أو شكل معظمهم بنات
بأحس ان بنى إسرائيل ملعونين من أول ما إتخلقو وعمرهم ما حيحسو بالأمان أبدا لحد ماينتهو
قناة أو تى فى حاسس ان فيها ديفو معين ,, حاسس انها قناة لفئة معينة من الشعب الناس الكلاس
لحد دلوقتى موش قادر أفهم دماغ الشيعة
مسيطرة عليا تماما فكرة العدل الإلهى ,, ربنا مابيظلمش حد و كل شخص منكوب أو فى محنة أو مشكلة أو مصيبة أكيد يستاهل ,, وكلمة يستاهل موش معناها دايما عقاب لان ممكن تكون المحنة مقدمة لخير كبير ماكانش ممكن ييجي إلا بالطريقة دى
لا أعرف ,, هل يفسد الناس بعد توليهم المناصب ,, أم يتم إختيارهم لأنهم فاسدين
مشجعين الكورة إللى بيحضرو المباريات فى الاستادات (حثالة بشرية ),, دى لفظة عنصرية على فكرة
موش عارف ليه الناس بتعلق على موضوع ان كابتن أحمد شوبير بيشتغل أكتر من شغلانة ,, المهم انه يكون ناجح فى شغله وانه مايخليش وقت شغل يأثر عالتانى (يمكن عشان فى بطالة فى البلد وهو واخد مكان عشرة غيره) ,, الله اعلم
مفيش حد عنده ضمير إلا فيما ندر
التشاؤم حرام ,, بس كتير بحس انى متشائم
كريم أساس - بودرة - بلاشر - آى لاينر - روجوجو ,, وحاجات تانية مقدرتش ألقط اسماءها ,, كل دى حاجات البنات بتحطها على وشها وهى خارجة ,, موش عندى حق أقول عليهم مجانين ؟؟
موش بأطيق المدخنين
أنا وحيد جدا
أنا مستمع جيد جدا
بحب نجاة أوى ,, سواء بتغنى أو بتمثل
حاسس ان عندى 19سنة
موضوع انى بأتكلم بسرعة عامل لى مشاكل
لحد دلوقتى موش عارف معنى البرومبة ,, سبع البرومبة
حاسس ان حاجات كتير من اللى كتبتها متناقضة مع بعضها ,, الحمد لله كده انا طبيعى

12 comments:

*سمر* said...

ايه كل ده ...
بس على فكرة ده طبيعى جدا ..
اى حد يحاول يطلع كل الافكار اللى عالقة فى ذهنه على الورق ..هيلاقيها بالشكل ده ..متناقضة ربما ..فيها شتات ..وهكذا ...

انا اعتقد ان ده علشان البنادم مش بيتامل اوى فى الافكار العابرة دى اللى بتيجى فى دماغه...يعنى مش بيحسم موقفه تجاهها (بمعنى انت فكرت بتعمق هل كل الموظفين مرتشين ولا لء )
لما تفكر فى كل فكرة بتعمق ..هتأخد منها موقف ..اما مع او ضد ..لكن طول ما هى فكرة عابرة ..احتمال كبير اوى تكون نتناقضة مع باقى افكار البنادم ..فاهمنى ؟؟؟

ان شاء الله هناقشك فى كام فكرة ..بس لما افوق من اثر الامتحانات :)

تحياتى سمير

Ahmad Shawky said...

http://salafiana.blogspot.com/2008/04/blog-post.html حملة مقاطعة المنتجات الهولنديه .. هنا أغلب المنتجات الهولنديه قاطعوهم وأنصروا دينكم ... أنشرها وأحتسب الأجر

ٍSOU said...

مسيطرة عليا تماما فكرة العدل الإلهى ,, ربنا مابيظلمش حد و كل شخص منكوب أو فى محنة أو مشكلة أو مصيبة أكيد يستاهل ,, وكلمة يستاهل موش معناها دايما عقاب لان ممكن تكون المحنة مقدمة لخير كبير ماكانش ممكن ييجي إلا بالطريقة دى...دة صحيح ان ربنا مش بيظلم حد ..مكن يبتلى الشخص بميبة عشان يختبرة و ممكن عشان يردعة و يوفوقة عن حاجة هو بيعملها و مممكن بيجهزة لحاجة تانية او يجهزة انة ياخد طريق تانى يغير مسار حياتة للافضل.

بالنسبة ان الرجالة مرتشين فالستات زنانين يعنى لما تحب تقضى مصلحة هتلاقى الموظف هو اللى هيبوس ايدها عشان تبطل زن

انا كنت بكرة التدخين بس لما فكرت فية على انة وسيلة ان الانسان ياخد بيها نفس يحرق حاجة جواة هى اساسا مولعة و بركان ثاير و بيطلع الدخان و يهف فى وش كل حاجة قرفان منها بدءت اتاقلم على الدخان

الناس بتفسد بعد المناصب و لا قبلها ..كل الطرق تؤدى الى روما..كدة كدة النهاية واحدة

بس انت طبيعى بنسبة 100% انت الازدواجية و التناقض عندك فىالمعدل الطبيعى متقلقش ..مش لوحدك كلنا فى الهوا سوا..احنا كعرب اساسا شعب عندة ازدواجية ..يكفى مثلا مثلا مثلا ان نانسى عجرم وهى بطلة كوكاكولا هى نفسها اللى بتعمل اغنية الضمير العربى..يعنى بتشجعى منتج عدو و انتى بتغنى ضدة..تلاقى كل الصحف الرؤسا العرب متصورين وهم بيسلموا على بوش و اولمرت و على وشهم ابتسامة من الاشى للمشى...دى مش ازداجية و لا دة اسمة هبل فى الحالة دى..انى اصافح العدو وانا فرحان و مبسسسسسوط و عارف انى مضحوك على....عايز ازدواجية اكتر من كدة اية

مؤنس فرحان said...

أهلا يا سمر

احنا كل يوم غير اليوم اللى قبله ,, لاننا طالما عايشين يبقى بنفكر و بنمر بتجارب ولو صغيرة خالص .. وكل لحظة تفكير بتمر علينا وكل نفس بيحصل تغيير فينا سواء بالاضافة او التغيير
انا فى اول البوست حددت دلوقتى ونا عمرى 29 سنة
لانى من سنة كانت افكارى مختلفة شوية
ومن خمسة ومن 10 كانت مختلفة
وبكرة حتتغير وبعد خمس سنين ان كان لينا عمر حتكون اكيد مختلفة
.......
منتظر مناقشتك وربنا يوفقك فى الامتحانات ان شاءالله
شدى حيلك

مؤنس فرحان said...

احمد شوقى شكرا على مرورك .. بس كنت عايز اعلق ان المقاطعة ماتتمش الا بالتأكد من مصدر المنتج .. لان كتير ناس بتستغل موضوع المقاطعة دا بشكل تجارى بحت لصالحها عشان تحارب منافس لها فى السوق او تزود من مبيعاتها
بالنسبة لنقطة التأكد اللى بقولك عليها .. كمثال انا اقصد لايز قبل كده قالو شركة امريكية ورجعو قالو اسرائيلية ودلوقتى بيقولو هولندية
واضح ان فى منافس لهم بيحاول يستغل المقاطعة لصالحه
شكرا على مجهودك وكله فى ميزان حسناتك ان شاءالله

مؤنس فرحان said...

سوو
أهلا أهلا

بجد فى موضوع المرتشين انا لاحظت دا فى كتير من المعاملات الحكومية ماقابلتش موظفة مرتشية .. يمكن فى الله اعلم بس ماقابلتهمش لسه
عكس الموظفين النسبة الأغلب مرتشين
بس عالجانب الآخر الموظفات اغلبيتهم كسولين جداا .. فاكرة زمان لما كانو يجيبو فى الافلام مشهد مكتب مليان موظفين وقاعدين ياكلو او يحلو كلمات متقاطعة ونا صغير كنت بأضحك ولما كبرت شوفت بنفسى ان دا حقيقى للأسف
.....
بشكل عام انا كنت بحاول ارسم خريطة ليا دلوقتى .. بحيث اشوف نفسى انا عامل ازاى .. بفكر ازاى ومعتقداتى ايه .. ونا عندى 19 سنة كان عندى خريطة مختلفة اكيد
بحب كذا وبأكره كذا
بأميل لكذا وبأتجنب كذا
بأحكم بالطريقة الفلانية على كذا

كون فى تناقضات فدا يمكن لانى لسه حاسس انى ماليش هوية .. او ممكن لان دا الحال حوالينا فأثر علينا
كل شئ حوالينا زى انتى ماقلتى فيه ازدواجية وتناقضات كتير ودا أصبح الواقع
.....

شكرا لزيارتك

مؤنس فرحان said...

Thank's Bill,

I will add the code

Mafrousa said...

مش حتصدق ان كل الاسئله ديه بتدور فى زهنى...اغلبها يعنى
التناقد ده موجود فى كل انسان يريد للحاجه الصح ان تعم
ده مش معناه ان كل اللى الواحد بيعمله صح...بس الغلط ماباقاش يستحي زى زمان..الغلط بقى وشه مكشوف...
على فكرة ربنا عادل جدا و انا بحس ساعات الابتلاء ممكن مايكونش للشخص نفسه..قد مايكون لشخص بجانبه.....حوضح..يعنى ممكن تشوف واحد فى محنه..فبتشكر ربنا على انك مش فى محنته ..وبتحاول تصبره.....و تدعيله عن ظهر غيب..انت اخذت ثواب الحمد و الشكر و الدعاء عن ظهر الغيب..و اتعظت لكى لا تقع فى محنته ..وتحصنت..فى حالة و قوعها..و هو اخذ ثواب الصبر.. واكيد تقرب الى الله لفك كربته..وده فى حد ذاته ثواب...انا مش عارفه اوضح اوى اللى جوايا .زبس اتمن ان تكون الفكره على الاقل وصلت...سلام

مؤنس فرحان said...

واحدة مفروسة
أهلا بيكى

إحنا كل فترة من غير مانحس بتتكون جوانا ليستة معتقدات وظنون وكتير بيكون فيها تناقضات و دا عادى

كلامك صح فى موضوع الإبتلاء .. ساعات كتير موش بنعرف الحكمة من أمر ما.. ممكن نعرفها بعدين وممكن مانعرفهاش خالص و بردو بيكون لحكمة تانية

معنى كلامك واضح وواصل
ربنا يكرم الجميع ويوفقهم للخير دايما

شكرا على ردك

Anonymous said...

Hello. This post is likeable, and your blog is very interesting, congratulations :-). I will add in my blogroll =). If possible gives a last there on my blog, it is about the Monitor de LCD, I hope you enjoy. The address is http://monitor-de-lcd.blogspot.com. A hug.

سمراء said...

الموظفات مبيرتشوش علشان ازواجهم هم اللي بيرتشوا
معظم الناس اللي شغالة في الاماكن السياحية اما حرمية او شحاتين
البنات عندهم فرصة اكبر للثقافة لان الرجالة ملهية في جمع المال
الاسرائليين هيفضلوا كدة لانهم قساة القلوب
فعلا قناة او تي في هي كدة
موافقة على فكرتك عن العدل الالهي
الكراسي بتغير الذين يجلسون عليها
الناس نتعلق على شوبير علشان الملايين التي يحصل عليها يعني ناس ليها حظ وناس ليها ترتر
الحاجات دي هي اللي الامهات بتقول عليها للبنات علشان يتجوزا
وانا كمان بحب نجاة - صوت يخليك عايش فوق السحاب
جميل قوي اسلوبك
اشكرك
سمراء

مؤنس فرحان said...

سمراء

لو حاولت كل سنة مثلا انى اطلع النقط اللى مسيطرة على فكرى أكيد حلاقيها اتغيرت .. لأن انا نفسى بأتغير .. وكل شئ من حوالينا بيتغير

حتى أسلوب طرح الفكرة نفسها بيتغير

كلامك ممكن يكون صح ان لموظفات موش بيرتشو عشان سبع البرومبة (بردو لسه معرفتش معناها) قايم بالواجب وبيرتشى هو.. و بردو هما مكسبهم يعتبر حرام لأنهم بياخدو مرتب بدون شغل .. شكلهم بيكون سئ جداااااا .. شوية كائنات قاعدة على مكاتب عمالين ياكلو فى سندوتشات ويشربو فى شاى وبيرغو فى اى حاجة غير شغلهم
........

وموضوع ان البنات مثقفين اكتر دا كنت بألاحظه من زمان فى معرض الكتاب إقبالهم عالقراءة أكتر بكتير من الشباب وكان دايما بيتقال لى نفس التعليل ان الشباب عندهم حاجات اكتر ممكن تشغل وقتهم لو موش شغل يبقى جلوس عالقهوة او يلعب كورة او يتفرج على كورة وانه وقته برة البيت اكتر والبنت معظم وقتها جوا البيت فبالتالى عندها وقت اكتر للقراءة
دا شئ كويس .. لعل وعسى ان الثقافة دى بإعتبار انهم ان شاءالله حيبقو امهات ينقلوها فى اسلوب تربيتهم لأولادهم
................

نجاة صوتها و أداءها و أغانيها وحتى الكام فيلم اللى مثلتهم بأحس انها مثال حى لكلمة أنثى

شكرا على ردك الجميل